ସୁନା ଚୋରି: ଚୋରକୁ ଗିରଫ କଲା ପୁଲିସ
Jitendra Kumar Jena
ସୁନା ଚୋରି କରି ବ୍ୟାଙ୍କରେ ଜମା ରଖିଥିବା ଆସାମୀକୁ ମାଲକାନଗିରି ପୁଲିସ ଗିରଫ କରିଛି । ଏ ସମ୍ବନ୍ଧରେ ମାଲକାନଗିରି ଥାନା ଭାରପ୍ରାପ୍ତ ଅଧିକାରୀ ରିଗାନ କିଣ୍ଡୋଙ୍କ ସୁଚନା ଅନୁଯାୟୀ ମାଲକାନଗିରି ବ୍ଲକ ପରଜାଗୁଡା ଗ୍ରାମର ଅଜୟ କୁମାର ବିଶ୍ୱାସ ନାମକ ବ୍ୟକ୍ତି ମାଲକାନଗିରି ଥାନାରେ ଏକ ଲିଖିତ ଅଭିଯୋଗ କରିଥିଲେ । ତାଙ୍କ ଅଭିଯୋଗ ଅନୁଯାୟୀ ଅଜୟ ଓ ତାଙ୍କ ପରିବାର ବର୍ଗ ଏମ୍ଭି ୭ ଗ୍ରାମକୁ ଯାଇଥିବା ବେଳେ ଉକ୍ତ ରାତିରେ ତାଙ୍କ ଘର ସମ୍ମୁଖ ଗେଟ ଚାବି ଭାଙ୍ଗି ଘର ଭିତରେ ପସି ଚୋରି ହୋଇଥିଲା । ତେବେ ଶ୍ରୀ ବିଶ୍ୱାସ ଚୋରି ହୋଇଥିବା ଜାଣି ଥାନାରେ ଅଭିଯୋଗ କରିଥିଲେ । ଅଭିଯୋଗକୁ ଭିତ୍ତିକରି ପୁଲିସ ତଦନ୍ତ କରି ଏମ୍ ଭି. ୧୧ ଗ୍ରାମର ଶଙ୍କର ମଜୁମଦାରଙ୍କୁ ଗିରଫ କରିଥିଲେ । ପରେ ତାଙ୍କୁ ପଚରାଉଚୁରା କରିବାରୁ ଏହି ଚୋରି କରିଥିବା ସୁନା ମଧ୍ୟରୁ କିଛି ସୁନା ବ୍ୟାଙ୍କରେ ରଖିଥିବା ବେଳେ କିଛି ସୁନା ନିଜ ଘରେ ରଖିଥିଲେ ବୋଲି ସ୍ୱୀକାର କରିଥିଲେ । ଏ ସମ୍ବନ୍ଧରେ ପୁଲିସ ସୁନାକୁ ଜବତ କରିବା ସହ ଆସାମୀଙ୍କୁ ଗିରଫ କରି କୋର୍ଟ ଚାଲାଣ କରିଥିବା ପ୍ରକାଶ ।
