ଏମ୍ସିଏଲ୍ କର୍ମଚାରୀଙ୍କୁ ଆକ୍ରମଣ
Jitendra Kumar Jena
ସମ୍ବଲପୁର: ବୁର୍ଲା ଥାନା ଅନ୍ତର୍ଗତ ପିସି ବ୍ରିଜ ରାସ୍ତାରେ ଅଫିସ କାମ ସାରି ଘରକୁ ଫେରୁଥିବା ମହାନଦୀ କୋଇଲା କମ୍ପାନୀ ବିତ୍ତ ବିଭାଗର ସହକାରୀ ପ୍ରବନ୍ଧକ ଅମୀୟ କୁମାର ସାହୁଙ୍କ ଉପରେ ଦୃବୁର୍ତ୍ତ ମାନେ ମରଣାନ୍ତକ ଭାବେ ଆକ୍ରମଣ କରିଛନ୍ତି । ଏଥିସହ ତାଙ୍କ ସ୍କୁଟି ଚାବି ଛଡାଇ ନେଇଥିବା ଅଭିଯୋଗ ହୋଇଛି । ଏନେଇ ବୁର୍ଲା ଥାନାରେ ଏକ ମାମଲା ରୁଜୁ କରାଯାଇ ପୁଲିସ ତଦନ୍ତ କରୁଛି । ଅଭିଯୋଗରୁ ପ୍ରକାଶ ଯେ, ଶ୍ରୀସାହୁ ଏମ୍ସିଏଲ୍ର ଜାଗୃତି ବିହାର ମୁଖ୍ୟାଳୟର ଅଫିସ କାମ ସାରି ଗତ ରାତି ପ୍ରାୟ ସାଢେ ୭ଟା ସମୟରେ ଆନନ୍ଦ ବିହାର ସ୍ଥିତ କମ୍ପାନୀର କଲୋନୀର ନିଜ ଘରକୁ ଫେରୁଥିଲେ । ତେବେ ଏହି ବ୍ରିଜ ନିକଟରେ ଅନ୍ଧକାରର ସୁଯୋଗ ନେଇ ୨ଜଣ ଦୃବୁର୍ତ୍ତ ତାଙ୍କୁ ଅଟକାଇଥିଲେ । ଏକ ଛୁରୀ ଦେଖାଇ ତାଙ୍କୁ ଭୟଭୀତ କରିବା ସହ ଟଙ୍କା ମାଗିଥିଲେ । ମାତ୍ର ଟଙ୍କା ନପାଇ ସେମାନେ ତାଙ୍କ ମୋବାଇଲ ଲୁଟ ଉଦ୍ୟମ କରିଥିଲେ । ଏଥିରେ ବିଫଳ ହୋଇ ତାଙ୍କୁ ଛୁରିରେ ଆକ୍ରମଣ କରିଥିଲେ । ଫଳରେ ଅଭିଯୋଗକାରୀଙ୍କ ପିଠି, କାନ୍ଧ ଓ ହାତରେ ଗଭୀର ଆଘାତ ହୋଇଥିଲା । ଏହାବାଦ୍ ଦୃବୁର୍ତ୍ତମାନେ ଘଟଣାସ୍ଥଳରୁ ଫେରାର ହୋଇ ଯାଇଥିଲେ । ତେବେ ଅନ୍ୟ କର୍ମଚାରୀ ମାନେ ତାଙ୍କୁ ଉଦ୍ଧାର କରିବା ସହ ଚିକିତ୍ସାଳୟକୁ ନେଇଥିଲେ । ଏହି ରାସ୍ତାରେ ଆଲୋକୀକରଣ ସହ ସୁରକ୍ଷା ବ୍ୟବସ୍ଥା କରିବାକୁ ସାଧାରଣରେ ଦାବି ହେଉଛି ।
