ଦିଲ୍ଲେଶ୍ୱର ତ୍ରିପାଠୀଙ୍କ ପୂଣ୍ୟତିଥି
Jitendra Kumar Jena
ବଲାଙ୍ଗୀର: ବଲାଙ୍ଗୀର ସଦର ବ୍ଲକ ଅନ୍ତର୍ଗତ ବାନ୍ଧନଘୋର ଶ୍ରୀରାମ ବାଟିକା ପରିସରରେ ଏ ଅଞ୍ଚଳର ବିଶିଷ୍ଟ ସଂଗୀତ ସାଧକ ସାହିତ୍ୟିକ ତଥା ଶିକ୍ଷାବିତ୍ ଗୁରୁ ସ୍ୱର୍ଗତ ଦିଲ୍ଲେଶ୍ୱର ତ୍ରିପାଠୀଙ୍କ ସପ୍ତମ ପୂଣ୍ୟତିଥି ଅବସରରେ ବିଭିନ୍ନ କାର୍ଯ୍ୟକ୍ରମ ଅନୁଷ୍ଠିତ ହୋଇଥିଲା । ପବିତ୍ର ରମା ଏକାଦଶୀ ଠାରୁ ବିଶିଷ୍ଟ ଭଗବତ ସଂଗଠକ ପଣ୍ଡିତ ଶ୍ରୀବତ୍ସ ମିଶ୍ରଙ୍କ ତତ୍ତ୍ୱାବଧାନରେ ସମୂହ ଅନନ୍ତମୁଖୀ ପାରାୟଣ କରାଯାଇଥିଲା । ଗୁରୁପୁତ୍ର ମଳୟ ତ୍ରିପାଠୀ ସପତ୍ନୀକ କର୍ତ୍ତା ଦାୟିତ୍ୱ ତୁଳାଇଥିଲେ । ଏହି ଆଧ୍ୟାତ୍ମିକ ସମାବେଶରେ ଆଖ ପାଖ ଗ୍ରାମ ମାଗୁରବେଡ, ବ୍ରାହ୍ମଣୀ ଡୁଙ୍ଗୁରି, କୁଟୁମଡୋଲା, ପଥରଖଣ୍ଡି ତଥା ଶିଆଲବାହାଲର ବହୁ ଭକ୍ତ ତଥା ଶ୍ରଦ୍ଧାଳୁ ଯୋଗଦାନ କରି ଭଗବତ ରସ ଆସ୍ୱାଦନ କରିଥିଲେ । ଅପରାହ୍ନରେ ଗୁରୁ ପୂଜନ ପର୍ବରେ ସମୂହ ପରିବାର ଓ ଛାତ୍ରଛାତ୍ରୀ ଉପସ୍ଥିତ ରହି ସ୍ୱର୍ଗତ ପ୍ରତିଭାଙ୍କୁ ସ୍ମରଣ କରିଥିଲେ । ଅବସରପ୍ରାପ୍ତ ଶିକ୍ଷକ ରମାକାନ୍ତ ହୋତାଙ୍କ ସଂଯୋଜନା ତଥା ଅଧ୍ୟାପକ ପ୍ରଣୟ ତ୍ରିପାଠୀଙ୍କ ସଭାପତିତ୍ୱରେ ଅନୁଷ୍ଠିତ ଏ ଆସରରେ ଏ ଅଞ୍ଚଳର ଅବସରପ୍ରାପ୍ତ ଗୁରୁଜୀ ପ୍ରେମରାଜ ମିଶ୍ର, ବିରଞ୍ଚି ସିଂ ଏବଂ ଧ୍ରୁବ ଚରଣ ପଟେଲଙ୍କୁ ଫୁଲ ଚନ୍ଦନ, ଅଙ୍ଗବସ୍ତ୍ର ପ୍ରଦାନ ପୂର୍ବକ ମାନପତ୍ର ଦେଇ ସ୍ୱର୍ଗତ ଗୁରୁ ଦିଲେଶ୍ୱର ସ୍ମୃତି ସମ୍ମାନ ଅର୍ପଣ କରାଯାଇଥିଲା ।
