ତାତିର ରୁଦ୍ର ରୂପ

ମୁଣ୍ଡଫଟା ଖରା  । ଘରୁ ପଦାକୁ ବାହାରିଲେ ସିଝିଯାଉଛି ସାରା ଦେହ  । ଗ୍ରୀଷ୍ମଲହର ଦିନକୁ ଦିନ ଅସହ୍ୟ ହେବାରେ ଲାଗିଛି  । ଆକ୍ତାମାକ୍ତା ହୋଇ ଯାଉଛି ଜନଜୀବନ  । ଆଇପିଏଲ ଭଳି ତାପମାତ୍ରାରେ ବି ପ୍ରତିଦିନ ନୂଆ ନୂଆ ରେକର୍ଡ଼ ହେବାରେ ଲାଗିଛି  । ଓଡ଼ିଶା ଓ ଭାରତର ତାତି ମାନଚିତ୍ରକୁ ଦେଖିଲେ ଲାଲ ଟହଟହ କଟା ତରଭୁଜ ଭଳି ପ୍ରତୀୟମାନ ହେଉଛି  । ଅତି ସର୍ବତ୍ର ଗର୍ହିତମ ଭଳି ଅଧିକ ଖରା ବି ଜୀବାତ୍ମାକୁ ଶୋଷି ନେଇଯାଇଥାଏ  । ଏହି ପରିପ୍ରେକ୍ଷୀରେ ଭାରତରେ ହୋଇଥିବା ପ୍ରଚଣ୍ଡ ତାପ ଓ ଏହାର ଭୟାବହତା ସମ୍ପର୍କରେ ରଶ୍ମିତା ବେହେରାଙ୍କ ଉପସ୍ଥାପନା  ।

କିଲର ହିଟ ୱେଭ୍  
୧୯୯୮ ମସିହାରେ ଓଡ଼ିଶାରେ ହୋଇଥିଲା ପ୍ରଚଣ୍ଡ ଗ୍ରୀଷ୍ମପ୍ରବାହ  । କେହିକେହି ଏହାକୁ କିଲର ହିଟ ୱେଭ୍ ବୋଲି ବି କୁହନ୍ତି  । ଏହାର ପ୍ରଭାବ ଏତେ ଭୟଙ୍କର ଥିଲାଯେ, ଖରାରେ ୨୫ ଶହ ଲୋକଙ୍କର ଜୀବନ ଚାଲି ଯାଇଥିଲା  । କରୋନାଠୁ ବି ଏହା ମାରାତ୍ମକ ଥିଲା ବୋଲି କହିଲେ ଭୁଲ ହେବନାହିଁ  । ସେତେବେଳେ ତାପମାତ୍ରା ୪୯.୫ ଡିଗ୍ରୀ ପହଁଚି ଯାଇଥିଲା  । ଖାଲି ଓଡ଼ିଶା ନୁହେଁ, ବିହାର, ପଶ୍ଚିମବଙ୍ଗ, ଆନ୍ଧ୍ରପ୍ରଦେଶ, ଉତ୍ତରପ୍ରଦେଶ, ମହାରାଷ୍ଟ୍ର ଓ ଗୁଜୁରାଟରେ ବି ହଜାର ହଜାର ଲୋକଙ୍କ ଜୀବନ ନେଇଥିଲା ଏହି ପ୍ରାଣଘାତୀ ଖରା  ।
୨୦୦୨ ଆନ୍ଧ୍ର ହିଟ ୱେଭ୍  ୨୦୦୨ରେ ଆନ୍ଧ୍ର ତତଲା କଡ଼େଇରେ ଭାଜି ହୋଇଯାଇଥିଲା  ।  ଆନ୍ଧ୍ରପ୍ରଦେଶର ଇଷ୍ଟ ଗୋଦାବରୀ, ପ୍ରକାଶମ ଓ ୱେଷ୍ଟ ଗୋଦାବରୀରେ ପ୍ରଚଣ୍ଡ ଗ୍ରୀଷ୍ମଲହର ବହିଥିଲା  । ଯାହାଫଳରେ ପାରଦ ୪୯ ଡିଗ୍ରୀ ଛୁଇଁ ଯାଇଥିଲା  । ଫଳରେ ଆନ୍ଧ୍ରରେ ୧ ହଜାର ଲୋକଙ୍କ ଜୀବନ ଚାଲି ଯାଇଥିଲା  । ଏହି ଗ୍ରୀଷ୍ମ ଲହରର ପ୍ରଭାବ ପଞ୍ଜାବ, ହରିୟାଣାକୁ ବି ଚରିଯାଇଥିଲା  ।
୨୦୧୫ ଆନ୍ଧ୍ର-ତେଲେଙ୍ଗାନା ଗ୍ରୀଷ୍ମଲହର : ୨୦୧୫ରେ ପୁଣିଥରେ ଆନ୍ଧ୍ର ଦେଖିଥିଲା ଭୟଙ୍କର ଗ୍ରୀଷ୍ମପ୍ରବାହ  । ଯେଉଁଥିରେ ଆନ୍ଧ୍ରପ୍ରଦେଶର ୧୭୩୫ ଓ ତେଲେଙ୍ଗାନାରେ ୫୮୫ ଜଣଙ୍କର ଜୀବନ ଚାଲି ଯାଇଥିଲା  । ସେହି ବର୍ଷ ପଶ୍ଚିମବଙ୍ଗ ଓ ଓଡ଼ିଶାରେ ବି ପ୍ରଚଣ୍ଡ ତାତି ଯୋଗୁଁ ଲୋକେ କଲବଲ ହୋଇଯାଇଥିଲେ  ।
୨୦୧୬ରେ ତାତି ଟପିଥିଲା ୫୧ ଡିଗ୍ରୀ : ୨୦୧୬ରେ ତାତି ସବୁ ରେକର୍ଡ଼ ଭାଙ୍ଗି ଦେଇଥିଲା  । ରାଜସ୍ଥାନରେ ତାପମାତ୍ରା ୫୧ ଡିଗ୍ରୀ ଟପି ଯାଇଥିଲା  । ଯାହାକୁ ଫାଲୋଡ଼ି ଗ୍ରୀଷ୍ମ ପ୍ରବାହ ବୋଲି କୁହାଯାଏ  । ସେହିବର୍ଷ ବିହାର, ଝାରଖଣ୍ଡ, ପଶ୍ଚିମବଙ୍ଗ, ଓଡ଼ିଶା, ପଞ୍ଜାବ, ହରିୟାଣା, ଚଣ୍ଡୀଗଡ଼, ଦିଲ୍ଲୀ, ରାଜସ୍ଥାନ, ମହାରାଷ୍ଟ୍ର, ପଶ୍ଚିମ ମଧ୍ୟପ୍ରଦେଶ ଓ ଗୁଜୁରାଟରେ ବି ପ୍ରଚଣ୍ଡ ଗ୍ରୀଷ୍ମ ଲହର ଅନୁଭୂତ ହୋଇଥିଲା  ।
ଚୁରୁ ହିଟୱେଭ
୨୦୧୯ରେ ରାଜସ୍ଥାନରେ ଆଉଥରେ ପ୍ରଚଣ୍ଡ ଗ୍ରୀଷ୍ମଲହର ପ୍ରବାହିତ ହୋଇଥିଲା  । ଯେତେବେଳେକି ପାରଦ ୫୦.୮ ଡିଗ୍ରୀ ଛୁଇଁଥିଲା  । ଏହି ଗ୍ରୀଷ୍ମଲହରର ପ୍ରଭାବ ମଧ୍ୟପ୍ରଦେଶ, ଉତ୍ତରପ୍ରଦେଶ, ମହାରାଷ୍ଟ୍ର ଓ ବିହାରରେ ଅନୁଭୂତ ହେବା ସହ ପ୍ରାୟ ୨୦୦ ଲୋକଙ୍କ ଜୀବନ ଚାଲି ଯାଇଥିଲା 

ହିଟୱେଭ କ’ଣ ?  
ଯେତେବେଳେ ବାୟୁମଣ୍ଡଳ ଶୁଷ୍କ ବାୟୁରେ ଆଚ୍ଛାଦିତ ହୋଇଯାଏ, ସେତେବେଳେ ସୂର୍ଯ୍ୟଙ୍କ ତାତି ପ୍ରଚଣ୍ଡ ଅନୁଭୂତ ହୋଇଥାଏ  ।  ଜଳବାୟୂ ପରିବର୍ତ୍ତନ ପାଇଁ ୧୯୫୦ ଦଶକରୁ ସାରା ବିଶ୍ୱରେ ଗ୍ରୀଷ୍ମ ପ୍ରବାହର ଦିନ ସଂଖ୍ୟା ବୃଦ୍ଧି ପାଇବାରେ ଲାଗିଛି  । ହିଟୱେଭର ସଂଜ୍ଞା ବିଭିନ୍ନ ଅଞ୍ଚଳ ପାଇଁ ଭିନ୍ନଭିନ୍ନ ହୋଇଥାଏ  । ହାରାହାରି ତାପମାତ୍ରା ଠାରୁ ଯେତେବେଳେ ସେହି ଅଞ୍ଚଳର ତାପମାତ୍ରା ବହୁମାତ୍ରାରେ ବଢ଼ିଯାଏ ସେତେବେଳେ ତାହାକୁ ଗ୍ରୀଷ୍ମ ଲହର ବୋଲି କୁହାଯାଏ  । ଅର୍ଥାତ ଗରମ ଜଳବାୟୁରେ ହିଟୱେଭର ସଂଜ୍ଞା ଓ ଥଣ୍ଡା ଜଳବାୟୁରେ ହିଟୱେଭର ସଂଜ୍ଞା ଭିନ୍ନ ଭିନ୍ନ ହୋଇଥାଏ  ।

ତାତିର ପ୍ରଭାବ

ଜିଡ଼ିପି ହ୍ରାସ : ତାତିର ପ୍ରଭାବରେ ଜିଡ଼ିପି ବି ହ୍ରାସ ପାଇଥାଏ । ଏହା ଅର୍ଥନୀତିକୁ ବହୁଳ ଭାବେ ପ୍ରଭାବିତ କରେ  । ୨୦୨୨ରେ କେବଳ ଖରା ପାଇଁ ବିଶ୍ୱ ଅର୍ଥନୀତି ୧% ହ୍ରାସ ପାଇ ଯାଇଥିଲା  ।  ଖରା ଯୋଗୁଁ ଶ୍ରମଶକ୍ତି ହ୍ରାସ ପାଇବା ସହ କୃଷି ଓ ଶିଳ୍ପ କ୍ଷେତ୍ର ପ୍ରଭାବିତ ହୋଇଥାଏ  ।
କୃଷି ଉତ୍ପାଦନ ହ୍ରାସ : ଅଧିକ ତାତି ଯୋଗୁଁ କୃଷି ଉତ୍ପାଦନ ହ୍ରାସ ପାଇଥାଏ  । କାହିଁକିନା ଜଳାଭାବରୁ  ଫସଲ  ବାଧାପ୍ରାପ୍ତ ହେଉଥିବାବେଳେ କୃଷି ଶ୍ରମିକ ମଧ୍ୟ କାର୍ଯ୍ୟ କରିବାକୁ ଆଗ୍ରହ ପ୍ରକାଶ କରିନଥା’ନ୍ତି  ।
ବନାଗ୍ନି : ଅଧିକ ଖରା ହେଲେ ଜଙ୍ଗଲରେ ନଅାଁ ଲାଗିଯାଏ  । ଫଳରେ ହଜାର ହଜାର କିଲୋମିଟର ଅଞ୍ଚଳ ଜଳିପୋଡ଼ି ଛାରଖାର ହୋଇଯାଏ  । ସବୁଜିମା ଅଞ୍ଚଳ ମରୁଭୂମିରେ ରୂପାନ୍ତରିତ ହୋଇଥାଏ  । ଓଡ଼ିଶାରେ ବି ଶହ ଶହ ଜଙ୍ଗଲରେ ଏବେ ନିଅାଁ ଲାଗିଯାଇଛି  । ୨୦୦୩ରେ ପର୍ତ୍ତୁଗାଲରେ ଜଙ୍ଗଲରେ ନିଅାଁ ଲାଗିଯିବାରୁ ୩୦୧୦ କିଲୋମିଟର ଜଙ୍ଗଲ ଓ ୪୪୦ ବର୍ଗ କିଲୋମିଟର କୃଷିକ୍ଷେତ୍ର ଜଳି ଯାଇଥିଲା  । ଯାହାଫଳରେ ୧ ବିଲିୟନ ପାଉଣ୍ଡ କ୍ଷତି ହୋଇଥଲା  । ପ୍ରତିବର୍ଷ ଅଧିକ ତାତି ଯୋଗୁଁ ଭାରତ ଓ ଓଡ଼ିଶାରେ ମଧ୍ୟ ହଜାର ହଜାର ଏକର ଜଙ୍ଗଲ ପାଉଁଶ ହୋଇଯାଉଛି  ।
ବନ୍ୟା : ପ୍ରବଳ ଖରାରେ ଗ୍ଲାସିୟର ତରଳିଥାଏ  । ୨୦୨୨ ମେ’ରେ ଗ୍ଲାସିୟର ତରଳି ଯିବାରୁ ପାକିସ୍ତାନରେ ଭୟଙ୍କର ବନ୍ୟା ସ୍ଥିତି ସୃଷ୍ଟି ହୋଇଥିଲା  । ଯାହାଫଳରେ ୧୧ ଶହ ଲୋକଙ୍କ ଜୀବନ ଚାଲି ଯାଇଥିଲା  ।
ବିଜୁଳି ସଂକଟ : ପ୍ରବଳ ଖରା ଯୋଗୁଁ ଏସି, ଫ୍ରିଜ ଆଦିର ବ୍ୟବହାର ବଢ଼ି ଯାଇଥାଏ  । ଲୋକମାନେ ଗରମରୁ ତ୍ରାହି ପାଇଁ ଫ୍ୟାନ ଓ କୁଲର ଆଦି ବି ବ୍ୟବହାର କରିଥା’ନ୍ତି  । ସେହିପରି ଜଳ ବିଦୁ୍ୟତ ପ୍ରକଳ୍ପଗୁଡ଼ିକ ମଧ୍ୟ କାମ କରିନଥାଏ  । ଶକ୍ତିର ଚାହିଦା ବଢ଼ିବାରୁ ବିଜୁଳି ସଂକଟ ଏକ ଭୟଙ୍କର ସମସ୍ୟା ଭାବେ ଉଭା ହୋଇଥାଏ  ।