ବାବୁଙ୍କ କ୍ୱାର୍ଟର ଲୋଭ : ଅବସର ପରେ ବି ମାଡ଼ି ବସିଛନ୍ତି
OFFICER
Ramachandi Prasad
କେବେ ବିଦା କରିବେ ନୂଆ ସରକାର ?
କନକ ଓ ସୁରେଶଙ୍କ ଡରରେ ଛାନିଆ
ଭୁବନେଶ୍ୱର : ମୋଟା ଅଙ୍କର ଦରମା ପାଉଥିଲେ । ଭୁବନେଶ୍ୱର ଛାତି ଉପରେ ବଡ଼ ବଡ଼ ମହଲ ବି କରିଛନ୍ତି । ତଥାପିବି କ୍ୱାର୍ଟର ଲୋଭ ଛାଡୁନାହିଁ । ଅବସରର ଅନେକ ବର୍ଷ ପରେବି କ୍ୱାର୍ଟର ମାଡ଼ି ବସିଛନ୍ତି । ମାଗଣା ବିଜୁଳି, ମାଗଣା ପାଣିର ମୋହ ଏବେବି ଯାଇନାହିଁ । ସରକାରୀ ବିଧି ବିଧାନକୁ ଚୁଲିରେ ପୋଡ଼ି ଦେଇଛନ୍ତି । ଏଥିପାଇଁ ସରକାରଙ୍କୁ ଯେତିକି ପ୍ରାପ୍ୟ ଦେବା କଥା ତାହା ବି ଦେଉନାହାନ୍ତି । ଧଳାହାତୀଙ୍କ ଏଇ କ୍ୱାର୍ଟର ଲୋଭକୁ ନେଇ ପାୱାର କରିଡ଼ରରେ ଚର୍ଚ୍ଚା ଜୋରଧରିଛି । ତେବେ ନୂଆ ସରକାର ସେମାନଙ୍କୁ କ୍ୱାର୍ଟରରୁ ବିଦା କରିବେ ନା ନିଜ ମାନ ମହତ ରଖିବାକୁ ବାବୁମାନେ କ୍ୱାର୍ଟର ଛାଡ଼ିବେ ସେନେଇ ରୋଚକ ଆଲୋଚନା ଚାଲିଛି ।
ବିଜେଡ଼ି ସରକାର ଥିଲା ବାବୁମାନଙ୍କ ଅମରାବତୀ । ଚାକିରୀ ସରିବା ପରେ ବି ବାବୁମାନେ ପୂର୍ବଭଳି ପତିଆରା ଜାରି ରଖୁଥିଲେ । ସତେଯେମିତି ବାବୁମାନଙ୍କୁ ମିଳିଥିଲା ଇଚ୍ଛାମୃତ୍ୟୁ । ସେମାନେ ନଚାହିଁଲେ ପତିଆରା କମୁନଥିଲା । ପ୍ରଭାବ ବିସ୍ତାର କରି ରାଜଧାନୀର ଛାତି ଉପରେ ଥିବା ବଡ଼ ବଡ଼ କ୍ୱାର୍ଟରଗୁଡ଼ିକୁ ଅକ୍ତିଆରରେ ରଖିଥିଲେ । ପେନସନ ସହ ଦରମା ବି ପାଉଥିଲେ । ପ୍ରଦୀପ ମହାପାତ୍ର ହୁଅନ୍ତୁ କି ଗୋପବନ୍ଧୁ ଦାଶ, ତାଙ୍କ ଭଳି ଅନେକ ଅଫିସର ଅବସର ପରେବି ସରକାର ଓ ପ୍ରଶାସନରେ ନିଜର ଦବଦବା ଜାହିର କରି ଆସୁଥିଲେ । କିଛି ଅଫିସର ନୂଆ ସରକାର ଆସିବା ପରେପରେ ଡରରେ ଚାକିରୀ ଛାଡ଼ି ସାରିଲେଣି । ଆଉ କିଛି ଅଧିକାରୀଙ୍କୁ ନୂଆ ସରକାର ବଦଳି ବି କରିଦେଲେଣି । ଏସବୁ ଭିତରେ ଉପମୁଖ୍ୟମନ୍ତ୍ରୀ କନକବର୍ଦ୍ଧନ ସିଂହଦେଓ ଓ ରାଜସ୍ୱ ମନ୍ତ୍ରୀ ସୁରେଶ ପୂଜାରୀଙ୍କ ଧମକ କେତେକ ଖାଉଆ ଅଫିସରଙ୍କ ମନରେ ଛନକା ପୂରେଇ ଦେଇଛି । ପୁରୁଣା ସରକାରଙ୍କ ଅମଳରେ ଯେମିତି କାମ କରୁଥିଲ, ଏବେ ସେମିତି ନକରିବାକୁ କନକ ଚେତାବନୀ ଦେଇଥିବାବେଳେ ସୁରେଶ ମୋଦିଙ୍କ ଷ୍ଟାଇଲରେ ନା ଖାଉଗାଁ, ନା ଖାନେ ଦୁଗାଁ ଡାଇଲଗ ମାରିଛନ୍ତି । ଫଳରେ ବିଜେଡ଼ି ସରକାର ଅମଳରେ ଗମ୍ଭୀରାରେ ପଶି ଫଳପୁଷ୍ପ ଖାଉଥିବା ଅଫିସରମାନେ ଏବେ ପ୍ରମାଦ ଗଣିବା ଆରମ୍ଭ କଲେଣି ।
