ମୋହନ-ଧର୍ମେନ୍ଦ୍ର ଫାଟ

ଯାହା ଆଶଙ୍କା କରାଯାଉଥିଲା ସେଇଆ ହିଁ ହେଲା  । ମୁଖ୍ୟମନ୍ତ୍ରୀ ମୋହନ ଚରଣ ମାଝୀ ଓ କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନଙ୍କ ମଧ୍ୟରେ ଫାଟ ସୃଷ୍ଟି ହୋଇଛି  । ଉଭୟଙ୍କ ମଧ୍ୟରେ ଆଉ ପୂର୍ବଭଳି ସୁସମ୍ପର୍କ ନାହିଁ  । ମୋହନ ଏବେ ଏକେଲା ଚଲୋ ରାସ୍ତା ଆପଣାଇ ନେଇଛନ୍ତି  । ଆଉ ପ୍ରଶାସନିକ କ୍ଷେତ୍ରରେ ଧର୍ମେନ୍ଦ୍ରଙ୍କ ହସ୍ତକ୍ଷେପ ଚାହୁଁନାହାନ୍ତି  । ଯାହା ଏବେ ବିଜେପି ରାଜନୀତିରେ ରୋଚକ ଚର୍ଚ୍ଚା ସୃଷ୍ଟି କରିଛି  ।
ସମ୍ପ୍ରତି ଧର୍ମେନ୍ଦ୍ର ପ୍ରଧାନ ଦିଲ୍ଲୀରେ କମ୍‌, ସମ୍ବଲପୁର, ଢେଙ୍କାନାଳ ଓ ଅନୁଗୁଳରେ ଅଧିକ ସମୟ ବିତାଉଥିବା ଲକ୍ଷ୍ୟ କରାଯାଉଛି  । ସେ ନିଜ ନିଜ ବାଟରେ ସଂଗଠନକୁ ମଜବୁତ୍‌ କରିବାରେ ଲାଗି ପଡ଼ିଛନ୍ତି  । ସେପଟେ ମୋହନଙ୍କ କାର୍ଯ୍ୟକ୍ରମରେ ଧର୍ମେନ୍ଦ୍ରଙ୍କୁ ଦେଖିବାକୁ ମିଳୁନଥିବାବେଳେ, ଧର୍ମେନ୍ଦ୍ରଙ୍କ କାର୍ଯ୍ୟକ୍ରମରେ ବି ମୋହନଙ୍କୁ ଦେଖିବାକୁ ମିଳୁନାହିଁ  । ଏମିତିକି ଭୁବନେଶ୍ୱରରେ ବି ଦୁଇ ନେତା ଗୋଟିଏ କାର୍ଯ୍ୟକ୍ରମରେ ଏକାଠି ହେଉନାହାନ୍ତି  । ନିକଟରେ ବୁର୍ଲା ହସପିଟାଲରେ ଏକ ଉଦଘାଟନ କାର୍ଯ୍ୟକ୍ରମ ହୋଇଥିଲା  । ସେଠାରେ ମୁଖ୍ୟଅତିଥି ଭାବେ ମୁଖ୍ୟମନ୍ତ୍ରୀ ଯୋଗଦେବାର କାର୍ଯ୍ୟକ୍ରମ ଥିଲା  । ଧର୍ମେନ୍ଦ୍ର ବି ଉପସ୍ଥିତ ରହିଥା’ନ୍ତେ  । କିନ୍ତୁ ମୁଖ୍ୟମନ୍ତ୍ରୀ ସେହି କାର୍ଯ୍ୟରେ ଯୋଗଦେଲେ ନାହିଁ  । କେବଳ ଧର୍ମେନ୍ଦ୍ର ହିଁ ଉଦଘାଟନ କରିଥିଲେ  । ସମ୍ପ୍ରତି ପ୍ରତିଦିନ ଧର୍ମେନ୍ଦ୍ର ବିଭିନ୍ନ ପ୍ରକଳ୍ପର ଉଦଘାଟନ କରୁଛନ୍ତି  । ରୋଡ଼ଶୋ’ ବି କରୁଛନ୍ତି  ।
ଦଳୀୟ ଅଳିନ୍ଦରେ ହେଉଥିବା ଚର୍ଚ୍ଚା ଅନୁଯାୟୀ, ମୋହନ ଆଉ ଧର୍ମେନ୍ଦ୍ରଙ୍କ କଥାରେ ଚାଲିବାକୁ ଚାହୁଁନାହାନ୍ତି  । ଧର୍ମେନ୍ଦ୍ରଙ୍କ କେତେକ ପରାମର୍ଶ ମଧ୍ୟ ମୋହନ  ଗ୍ରହଣ କରିନାହାନ୍ତି  । ମୋହନ ନିଜେ ମୁଖ୍ୟମନ୍ତ୍ରୀ ହୋଇଥିବାରୁ ନିଜେ ହିଁ ସରକାର ଚଳାଇବାକୁ ସମର୍ଥ ବୋଲି ବାର୍ତ୍ତା ଦେଉଛନ୍ତି  । ସେପଟେ ଧର୍ମେନ୍ଦ୍ର ହିଁ ମୋହନଙ୍କୁ ମୁଖ୍ୟମନ୍ତ୍ରୀ କରିଥିଲେ  । ଅନେକ ବରିଷ୍ଠ ନେତା ଥିଲେ ବି ଧର୍ମେନ୍ଦ୍ରଙ୍କ ଗୋଟିଚାଳନା ପାଇଁ ମୋହନ ମୁଖ୍ୟମନ୍ତ୍ରୀ ହୋଇପାରିଛନ୍ତି  । ଏକଥା ବିଜେପିରେ ସମସ୍ତେ ଜାଣିଛନ୍ତି  । ଯେଉଁଥିପାଇଁ ମୋହନ ପ୍ରଥମେ ଧର୍ମେନ୍ଦ୍ରଙ୍କ କଥା ହିଁ ଶୁଣୁଥିଲେ  । ରାଜ୍ୟ ବିଜେପି ସଭାପତି ମନମୋହନ ସାମଲଙ୍କର କଥାର ଗୁରୁତ୍ୱ ରହୁନଥିଲା  । ଏବେ କିନ୍ତୁ ଧର୍ମେନ୍ଦ୍ରଙ୍କୁ ଛାଡ଼ି ମନମୋହନ, କନକବର୍ଦ୍ଧନଙ୍କ ଭଳି ନେତାଙ୍କ ସହ ମୋହନ ଭଲ ସମ୍ପର୍କ ରଖିଛନ୍ତି  । ସେହିପରି କେନ୍ଦ୍ରମନ୍ତ୍ରୀ ଭାବେ ଆଉ ପୂର୍ବଭଳି ଧର୍ମେନ୍ଦ୍ରଙ୍କର କାଟତି ନଥିବା ବାର୍ତ୍ତା ଯାଇଛି  । ସେଥିପାଇଁ ମୁଖ୍ୟମନ୍ତ୍ରୀ ମଧ୍ୟ ଧର୍ମେନ୍ଦ୍ର ବିରୋଧୀ ଅଭିଯାନରେ ସାମିଲ୍‌ ହୋଇଯାଇଥିବା କୁହାଯାଉଛି  । ଏବେବି ଧର୍ମେନ୍ଦ୍ର ଜାତୀୟ ବିଜେପି ସଭାପତି ରେସ୍‌ରେ ଅଛନ୍ତି  । ଯଦି ଧର୍ମେନ୍ଦ୍ର ରାଷ୍ଟ୍ରୀୟ ବିଜେପି ସଭାପତି ହୁଅନ୍ତି ତେବେ ରାଜ୍ୟ ବିଜେପି ରାଜନୀତି କଡ଼ ଲେଉଟାଇବା ନିଶ୍ଚିତ  ।