ଦୀପାବଳିରେ ବାଣ ଫୁଟାଇବାବେଳେ ଅବଲମ୍ବନ କରନ୍ତୁ ସତର୍କତା
Rasmita Behera
ଦୀପାବଳୀ ହେଉଛି ଆଲୋକର ପର୍ବ । ମାତ୍ର ସାମାନ୍ୟ ଅନ୍ୟମନସ୍କତା ଯୋଗୁଁ ଘଟିଥାଏ ଦୁର୍ଘଟଣା । ଖୁସିର ପର୍ବ ଦୀପାବଳିରେ ପିଲାଠାରୁ ବୁଢ଼ା ପର୍ଯ୍ୟନ୍ତ ସମସ୍ତେ ମିଶି ବାଣ ଫୁଟାଇଥାନ୍ତି । ଫୁଲଝରି ,ଅନାର,ରକେଟ ବାଣର ଆଲୁଅ ଦୃଷ୍ଟିଶକ୍ତି ଉପରେ ପ୍ରଭାବ ପକାଇଥାଏ । ବାଣର ଧୂଆଁରେ ଶ୍ୱାସ ରୋଗ ଏବଂ ବାଣର ଜୋର ଶବ୍ଦରେ ହୃଦରୋଗୀଙ୍କ ସମସ୍ୟା ହୋଇଥାଏ । ଏଥିପାଇଁ ବାଣ ଫୁଟାଇବା ବେଳେ ସାବଧାନତା ଅବଲମ୍ବନ କରନ୍ତୁ ।
ବାଣ ଫୁଟାଇବା ଦ୍ୱାରା ବାୟୁମଣ୍ଡଳ ପ୍ରଦୂଷିତ ହୋଇଥାଏ । ଅତ୍ୟଧିକ ଧୂଆଁ ପାଇଁ ଫୁସଫୁସ ରୋଗୀ ଏବଂ ଶ୍ୱାସ ରୋଗୀମାନେ କଷ୍ଟ ପାଇଥାନ୍ତି । ଶ୍ୱାସରୋଗୀମାନେ ପାଖରେ ଇନହେଲର ରଖନ୍ତୁ ଏବଂ ମାସ୍କ ଲଗାନ୍ତୁ । ଶବ୍ଦ ପ୍ରଦୂଷଣ କରୁଥିବା ବାଣ ଫୁଟାନ୍ତୁ ନାହିଁ । ୯୦-୧୧୫ ଡେସିବଲ୍ ତୀବ୍ରତାରେ ବାଣ ଫୁଟିଲେ ଏହା ସହିହେବ । ୧୪୦ଡେସିବଲ ତୀବ୍ରତା କିମ୍ବା ଏହାଠାରୁ ଅଧିକ ତୀବ୍ରତା ବିଶିଷ୍ଟ ଶବ୍ଦ ହେଲେ କାନର ପରଦା ଏବଂ ଏହାର ଭିତର ଅଂଶ ଫାଟିଯିବାର ସମ୍ଭାବନା ରହିଛି । ବାଣର ଧୂଆଁ ଦ୍ୱାରା ନାକ ଏବଂ ଗଳାରେ ସମସ୍ୟା ଦେଖାଯାଇଥାଏ । ଛୋଟଛୁଆମାନଙ୍କୁ ବାଣ ଫୁଟାଇବାକୁ ଏକୁଟିଆ ଛାଡ଼ନ୍ତୁ ନାହିଁ । ଛୋଟପିଲାଙ୍କୁ କେବଳ ଆଲୋକିତ ହେଉଥିବା ବାଣ ଫୁଟାଇବାକୁ ଦିଅନ୍ତୁ । ଶ୍ୱାସରୋଗଗ୍ରସ୍ତ ପିଲାମାନଙ୍କୁ ବାଣଠାରୁ ଦୂରେଇ ରଖନ୍ତୁ । ଦୀପାବଳିରେ ଉଚ୍ଚ ରକ୍ତଚାପଥିବା ବ୍ୟକ୍ତି ଏବଂ ହୃଦରୋଗୀମାନେ ସତର୍କ ରୁହନ୍ତୁ ।
ବାଣର ଜୋର ଶବ୍ଦରୁ ବଞ୍ଚିବା ପାଇଁ ଘରୁ ବାହାରନ୍ତୁ ନାହିଁ । ହଠାତ୍ ଜୋର ଶବ୍ଦ ଶୁଣିବା ଦ୍ୱାରା ରକ୍ତଚାପ ଅନିୟନ୍ତ୍ରିତ ହୋଇଥାଏ । ଏହାଦ୍ୱାରା ହୃଦଘାତର ସମ୍ଭାବନା ଦେଖାଯାଇଥାଏ ।ଦୂରରେ ରହି ବାଣ ଫୁଟାନ୍ତୁ । ବାଣର ନିଆଁ ଦ୍ୱାରା ଆଖିରେ କ୍ଷତ ସୃଷ୍ଟି ହୋଇଥାଏ ଓ ଦୃଷ୍ଟିଶକ୍ତି ମଧ୍ୟ ଚାଲି ଯାଇପାରେ । ଯଦି ବାଣ ଫୁଟାଇବାବେଳେ ଟିକେ ବାରୁଦ କିମ୍ବା ନିଆଁ ପଡ଼ିଯାଇଥାଏ ତେବେ ଥଣ୍ଡା ପାଣିରେ ୧୫ମିନିଟ ପର୍ଯ୍ୟନ୍ତ ଲଗାତାର ଧୁଅନ୍ତୁ । ଜୋର ଶବ୍ଦ କରୁଥିବା ବାଣଦ୍ୱାରା ଆମ ଆଖିପିତୁଳା ମଧ୍ୟ ଫାଟିବାର ସମ୍ଭାବନା ରହିଛି । ଅନାର ଏବଂ ରକେଟ ଛାଡ଼ୁଥିବାବେଳେ ସାବଧାନତା ଅବଲମ୍ବନ କରନ୍ତୁ । ଯଦି ସମ୍ଭବ ତେବେ ବାଣ ଫୁଟାଇବାବେଳେ ଚଷମା ବ୍ୟବହାର କରନ୍ତୁ ।
