ସାହସୀ ଯୁବକଙ୍କୁ ସମ୍ବର୍ଦ୍ଧନା
Srikant Kumar Rout
ରାଜକନିକା, ୬ା୪: କଣ୍ଟପଡ଼ା ବଜାର ଠାରେ ସମାଜସେବୀ ଡ଼. ହୟଗ୍ରୀବ ଗୁରୁଙ୍କ ଗୁରୁ ବ୍ରଦର୍ସ ପକ୍ଷରୁ ଆଳି ବ୍ଲକ ବାଳକାଟି ଗ୍ରାମର ୫ ଜଣ ସାହସୀ ଯୁବକଙ୍କୁ ସମ୍ବର୍ଦ୍ଧିତ କରାଯାଇଛି । ସୂଚନା ରୁ ପ୍ରକାଶ ୫ ତାରିଖ ଶୁକ୍ରବାର ପୂର୍ବାହ୍ନରେ ଆଳି ଅଟାଳ ପଞ୍ଚାୟତ ଖନେ୍ଦାଳ ଗ୍ରାମର ବିଶ୍ୱରଞ୍ଜନଙ୍କ ପତ୍ନୀ ମୋନାଲିସା ତାଙ୍କ ୯ ମାସର ଶିଶୁ କନ୍ୟାକୁ ଧରି କୌଣସି କାରଣରୁ ଗଡ଼ଗଡି ସେତୁ ଉପରୁ ଖରସ୍ରୋତା ନଦୀକୁ ଡେଇଁ ପଡ଼ିଥିଲେ । ତାଙ୍କୁ ଉଦ୍ଧାର କରିବାକୁ ପରେ ପରେ ତାଙ୍କ ସ୍ୱାମୀ ମଧ୍ୟ ନଦୀକୁ ଡେଇଁ ଉବୁଟୁବୁ ହେଉଥିଲେ । ଏହି ସମୟରେ ନଦୀ କୂଳରେ ବସିଥିବା ବାଳକାଟି ଗ୍ରାମର ବୀରେନ ରାଉତ, ଅଲେଖ ସେଠୀ, ସୁଶାନ୍ତ ମଲ୍ଲିକ, ଅଭିଷେକ ମଥାନ, କୁମାର ଶିବୁ ନଦୀ କୂଳରେ ଥିବା ଏକ ଭୁଟୁଭୁଟିକୁ ନିଜେ ନେଇ ଉକ୍ତ ଶିଶୁ କନ୍ୟା ସହିତ ମହିଳା ଓ ତାଙ୍କ ସ୍ୱାମୀକୁ ଉଦ୍ଧାର କରିଥିଲେ । ନିଜ ଜୀବନକୁ ବାଜି ଲଗାଇ କୁମ୍ଭୀର ପ୍ରବଣ ଏହି ନଦୀରୁ ଉକ୍ତ ପରିବାରକୁ ଉଦ୍ଧାର କରିଥିବାରୁ ସେମାନଙ୍କର ଏହି ସାହାସିକ କାର୍ଯ୍ୟ ପାଇଁ ଗୁରୁ ବ୍ରଦର୍ସ ପକ୍ଷରୁ ସାମାଜିକ କର୍ମୀ କୈଳାସ ଚନ୍ଦ୍ର ସେଠୀ ସେମାନଙ୍କୁ ଫୁଲ ତୋଡ଼ା, ଉତ୍ତରୀୟ ଓ ଅର୍ଥରାଶି ଦେଇ ସମ୍ବର୍ଦ୍ଧିତ କରିଥିଲେ ।
