ଲିଭିଗଲା ପରିବାରର ୬ ଜଣଙ୍କ ଜୀବନ ଦୀପ
Srikant Kumar Rout
ଭୁବନେଶ୍ୱର:ମୃତୁ୍ୟ ଏମିତି ବି ଆସେ । ବାଇପାସରେ କାର ଯାଉଥିବାବେଳେ ହଠାତ ଆଗରେ ଯାଉଥିବା ଟ୍ରକ ସଡ଼ନ ବ୍ରେକ ମାରିଦେଇଥିଲା । କାରଟି ଆଗ ଟ୍ରକରେ ପିଟି ହୋଇଥିବାବେଳେ ପଛପଟୁ ଆଉ ଏକ ଟ୍ରକ ମଧ୍ୟ ପିଟିଦେଲା । ଦୁଇ ଟ୍ରକ ମଝିରେ କାର ଗୁଣ୍ଡ ହୋଇଯିବା ସହ ୬ ଜଣଙ୍କର ମୃତୁ୍ୟ ଘଟିଛି । ଏମିତି ଏକ ଅଘଟଣ କେନ୍ଦୁଝର ଜିଲ୍ଲାର ଚମ୍ପୁଆ ରିମୁଳି ବାଇପାସ୍ ଠାରେ ଘଟିଛି ।
ମିଳିଥିବା ସୂଚନା ଅନୁଯାୟୀ, କେନ୍ଦୁଝର ଜିଲାର ଚମ୍ପୁଆ ଅନ୍ତର୍ଗତ ରିମୁଳି ବାଇପାସରେ ଏହି ମର୍ମନ୍ତୁଦ ସଡ଼କ ଦୁର୍ଘଟଣା ଘଟିଛି । କାର ଆଗରେ ଏକ ଟ୍ରକ୍ ଯାଉଥିବା ବେଳେ ପଛରୁ ଆଉ ଏକ ଟ୍ରକ୍ ଯାଉଥିଲା । ଆଗ ଟ୍ରକ୍ ବ୍ରେକ ମାରିବାରୁ କାରଟି ପିଟି ହୋଇଥିଲା ଏବଂ ପଛରେ ଆସୁଥିବା ଟ୍ରକଟି ଚାପି ଦେଇଥିଲା । କାରଟି ସମ୍ପୂର୍ଣ୍ଣ ଚୂରମାର ହୋଇଯାଇଥିବାରୁ କଟର ସାହାଯ୍ୟରେ କଟାଯାଇ ମୃତକମାନଙ୍କୁ ବାହାରକୁ ଅଣାଯାଇଥିଲା । କାର ନମ୍ବର ଓଡ଼ି ୦୨ ଏୱାଇ ୭୮୬୦ ହୋଇଥିବାବେଳେ ବଡ଼ବିଲ ଭଦ୍ରାସାହି ଅଞ୍ଚଳରୁ ହିରାଲ ପଲେଇ ନିଜ ପରିବାର ସହ ବାଂଶପାଳ ବ୍ଲକ୍ ତରମାକାନ୍ତକୁ ଯାଉଥିଲେ । ମୃତକଙ୍କ ମଧ୍ୟରେ ଦୁଇ ପୁରୁଷ, ତିନି ମହିଳା ଏବଂ ଜଣେ ଛୋଟ ଝିଅ ଥିବା ସୂଚନା ମିଳିଛି ।
