ମମତାଙ୍କ ଉତ୍ତରାଧିକାରୀ କିଏ ହେବେ ?

ନୂଆଦିଲ୍ଲୀ:  କିଏ ହେବେ ପଶ୍ଚିମବଙ୍ଗ ମୁଖ୍ୟମନ୍ତ୍ରୀ ମମତା ବାନାର୍ଜୀଙ୍କ ଉତ୍ତରାଧିକାରୀ? ମମତାଙ୍କ ପରେ କିଏ ସମ୍ଭାଳିବେ ଭବିଷ୍ୟତରେ ଟିଏମସିର କମାଣ? ଏହି ପ୍ରଶ୍ନ ଏବେ ଖାଲି ପଶ୍ଚିମବଙ୍ଗ ନୁହେଁ ପୁରା ରାଜନୀତିରେ ଚର୍ଚ୍ଚାର ବିଷୟ ହୋଇଛି। ଟିଏମସି ଭିତରେ କିମ୍ବା ବାହାରେ ଏହି ପ୍ରଶ୍ନ ବାରମ୍ବାର ଉଠୁଛି। ବର୍ତ୍ତମାନ ମମତା ଏନେଇ ନିଜେ ମୁହଁ ଖୋଲିଛନ୍ତି। ମମତା ଏକ ଜାତୀୟ ଗଣମାଧ୍ୟମକୁ ସାକ୍ଷାତକାର ଦେଇ ଏସମ୍ପର୍କରେ ସ୍ପଷ୍ଟ କରିଛନ୍ତି। ତୃଳମୂଳକଂଗ୍ରେସର ଉତ୍ତରାଧିକାରୀ କିଏ ହେବେ ଏନେଇ ସେ ଖୁଲାସା କରିଛନ୍ତି।ସାକ୍ଷାତକାରରେ ମମତା ବାନାର୍ଜୀ କହିଛନ୍ତି ଯେ, ଉତ୍ତରାଧିକାରୀ କିଏ ହେବ ତାହା ଦଳ ସ୍ଥିର କରିବ। ଟିଏମସି ଏକ ଶୃଙ୍ଖଳିତ ଦଳ, ଯେଉଁଠାରେ କେହି ନିଜର ସର୍ତ୍ତ ରଖିପାରିବେ ନାହିଁ କିମ୍ବା କାହା ଉପରେ ପ୍ରାଧାନ୍ୟ ବିସ୍ତାର କରିପାରିବେ ନାହିଁ। ସେ ଆହୁରି କହିଛନ୍ତି, ଲୋକଙ୍କ ପାଇଁ କ’ଣ ସର୍ବୋତ୍ତମ ତାହା ଦଳ ସ୍ଥିର କରିବ। ଆମର ବିଧାୟକ, ଏମପି, ବୁଥ କର୍ମଚାରୀ ଅଛନ୍ତି। ଏହା ଏକ ମିଳିତ ପ୍ରୟାସ। ନୂଆପିଢିକୁ ସୁଯୋଗ ଦେବା ପ୍ରସଙ୍ଗରେ ଏକ ସନ୍ତୁଳିତ ଆଭିମୁଖ୍ୟ ଗ୍ରହଣ କରି ମମତା ବାନାର୍ଜୀ କହିଛନ୍ତି ଯେ, ସମସ୍ତ (ପୁରୁଣା ଏବଂ ନୂଆ ପିଢିର ନେତା) ଗୁରୁତ୍ୱପୂର୍ଣ୍ଣ। ଆଜିର ନବାଗତ ଆସନ୍ତାକାଲିର ଭେଟେରାନ ହେବେ। ଦଳ ଭବିଷ୍ୟତରେ ଏକଜୁଟ ହୋଇ ରହିଆସିଛି ଏବଂ ରହିବ। ଇର୍ଷା ଏଠାରେ କାମ କରିବ ନାହିଁ ।ଯଦିଓ ଟିଏମସି ମମତା ବାନାର୍ଜୀଙ୍କ ଉତ୍ତରାଧିକାରୀ ଘୋଷଣା ହୋଇନାହିଁ, ପୁରୁଣା ନେତା ଏବଂ ପରବର୍ତ୍ତୀ ପିଢି ନେତାଙ୍କ ମଧ୍ୟରେ ଚାଲିଥିବା ବିତର୍କ ମଧ୍ୟରେ ଏହି ମନ୍ତବ୍ୟ ଆସିଛି। ପୁରୁଣା ନେତାମାନେ ମମତା ବାନାର୍ଜୀଙ୍କ ପ୍ରତି ବିଶ୍ୱସ୍ତ ବୋଲି ବିବେଚନା କରାଯାଉଥିବାବେଳେ ନୂଆପିଢିର ନେତାମାନେ ଅଭିଷେକ ବାନାର୍ଜୀଙ୍କ ନିକଟତର ବୋଲି ବିବେଚନା କରାଯାଏ। ଟିଏମସିର ଜାତୀୟ ସାଧାରଣ ସମ୍ପାଦକ ତଥା ମମତା ବାନାର୍ଜୀଙ୍କ ଭଣଜା ଅଭିଷେକ ବାନାର୍ଜୀ ଦଳର ଅନ୍ୟ ନେତାଙ୍କ ଅପେକ୍ଷା ବଙ୍ଗଳା ଯୁବକମାନଙ୍କ ମଧ୍ୟରେ ଅଧିକ ଲୋକପ୍ରିୟ ବୋଲି ବିବେଚନା କରାଯାଏ। ପଶ୍ଚିମବଙ୍ଗ ବିଧାନସଭା ପାଇଁ ପରବର୍ତ୍ତୀ ନିର୍ବାଚନ ମାର୍ଚ୍ଚ-ଏପ୍ରିଲ ୨୦୨୬ରେ ଅନୁଷ୍ଠିତ ହେବ। ଯେଉଁଥିରେ ସମସ୍ତ ୨୯୪ ଜଣ ସଦସ୍ୟ ନିର୍ବାଚନ ଲଢିବେ। ନିକଟ ଅତୀତରେ ଭାଜପା ରାଜ୍ୟର ପ୍ରମୁଖ ବିରୋଧୀ ଦଳ ଭାବରେ ଉଭା ହୋଇଛି। ଆସନ୍ତା ନିର୍ବାଚନରେ ମୁଖ୍ୟ ପ୍ରତିଯୋଗିତା ମମତାଙ୍କ ଟିଏମସି ଏବଂ ଭାଜପା ମଧ୍ୟରେ ହେବ।