ଚୋରା ମଦ ବ୍ୟବସାୟୀ ଗିରଫ
Rasmita Behera
ସାଲେପୁର : ବେଆଇନ ଭାବେ ଚୋରାରେ ମଦ ବିକ୍ରି କରୁଥିବା ବ୍ୟବସାୟୀକୁ ଚୋରାମଦ ବିକ୍ରି କରିବାକୁ ବାରଣ କରିବାରୁ ସଂପୃକ୍ତ ନିଶା ବ୍ୟବସାୟୀ ଜଣକ ଜଣେ ଅବସରପ୍ରାପ୍ତ ସେନା କର୍ମଚାରୀଙ୍କୁ ଗାଳିଗୁଲଜ କରିବା ସହ ମରଣାନ୍ତକ କରିବା ଅଭିଯୋଗରେ ପୁଲିସ ସଂପୃକ୍ତ ବ୍ୟବସାୟୀକୁ ଗିରଫ କରିଥିବା ଜଣାଯାଇଛି । ପୁଲିସ ସୂତ୍ରରୁ ପ୍ରକାଶ ଯେ, ସାଲେପୁର ଥାନା ଅଧିନ ବାଲିସାହି ପଞ୍ଚାୟତ ରାଘବପୁର ଗ୍ରାମର ସୁକାନ୍ତ ବାଇ ବାଲିସାହି ଗ୍ରାମରେ ଘର କରି ରହୁଥିବା ଅବସରପ୍ରାପ୍ତ ସେନା କର୍ମଚାରୀ ଲକ୍ଷ୍ମୀଧର ଦାସଙ୍କ ଶ୍ୱଶୁର ଘର ନିକଟରେ ଚୋରାରେ ମଦ ବିକ୍ରି କରୁଥିଲା । ଲକ୍ଷ୍ମୀଧର ତାଙ୍କୁ ବାରଣ କରିବାରୁ ସୁକାନ୍ତ ବାଇ ଓ ଅନ୍ୟ ୩ଜଣ ନିଶାସକ୍ତ ବ୍ୟକ୍ତି ତାଙ୍କୁ ଗାଳିଗୁଲଜ କରିବା ସହ ମାରଧର କରିଥିଲେ । ଏହାନେଇ ଲକ୍ଷ୍ମୀଧର ସାଲେପୁର ଥାନାରେ ଲିଖିତ ଅଭିଯୋଗ କରିଥିଲେ । ସାଲେପୁର ପୁଲିସ ଏ ସଂପର୍କରେ ସାଲେପୁର ଥାନାରେ କେସ ନ୪୪୬/୨୪ରେ ଏକ ମାମଲା ରୁଜୁ କରି ସଂପୃକ୍ତ ନିଶା ବ୍ୟବସାୟୀ ସୁକାନ୍ତ ବାଇକୁ ଗିରଫ କରି କୋର୍ଟ ଚାଲାଣ କରିଥିବା ଜଣାଯାଇଛି ।
