ଭୁବନେଶ୍ୱର: ରାଜ୍ୟ ବିଜେପିର ବଡ଼ ଚେହେରା ତଥା ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କର ଏକଦା ଦୃଢ଼ ସମାଲୋଚକ ଶ୍ରୀମତୀ ଲେଖାଶ୍ରୀ ସାମନ୍ତସିଂହାର ଦଳର ପ୍ରାଥମିକ ସଦସ୍ୟ ପଦରୁ ଆଜି ଇସ୍ତଫା ଦେଇଛନ୍ତି । ରାଜ୍ୟ ବିଜେପିର ସେ ଉପସଭାପତି ଥିଲେ । ଲେଖାଶ୍ରୀ ନିଜ ସୋସିଆଲ୍ ମିଡିଆ ଆକାଉଣ୍ଟରେ ନିଜର ଇସ୍ତଫା ସଂକ୍ରାନ୍ତରେ ସୂଚନା ଦେବାର ଦୁଇ ଘଣ୍ଟା ପରେ ଶଙ୍ଖ ଭବନ ଆସି ବିଜେଡିରେ ଯୋଗ ଦେଇଛନ୍ତି ।

ଶଙ୍ଖ ଭବନରେ ଆୟାଜିତ ମିଶ୍ରଣ ପର୍ବରେ ବିଜେଡିରେ ଯୋଗଦେବା ପରେ ଶ୍ରୀମତୀ ସାମନ୍ତସିଂହାର ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ, ୫-ଟି ଅଧ୍ୟକ୍ଷ କାର୍ତ୍ତିକ ପାଣ୍ଡିଆନ୍, ବିଜେଡି ସାଂଗଠନିକ ସମ୍ପାଦକ ପ୍ରଣବ ପ୍ରକାଶ ଦାସ ତଥା ଦଳର ସମସ୍ତ ନେତୃବୃନ୍ଦଙ୍କୁ ଧନ୍ୟବାଦ ଓ କୃତଜ୍ଞତା ଜଣାଇଛନ୍ତି । କହିଛନ୍ତି, ଖୋଲା ହୃଦୟରେ ମୋତେ ଗ୍ରହଣ କରିଥିବାରୁ ସମସ୍ତଙ୍କୁ ଧନ୍ୟବାଦ । ଓଡ଼ିଶାର ଲୋକପ୍ରିୟ ମୁଖ୍ୟମନ୍ତ୍ରୀଙ୍କ ବିକାଶ କାର୍ଯ୍ୟ ମୋତେ ଅନୁପ୍ରାଣିତ କରିଛି । ୫-ଟି ଅଧ୍ୟକ୍ଷଙ୍କ ତତ୍ତ୍ୱାବଧାନରେ ଏହି ବିକାଶ କାର୍ଯ୍ୟ ଆଗକୁ ବଢ଼ି ଚାଲିଛି । ମୁଁ ଗୁଣ୍ଡୁଚି ମୂଷା ଭଳି ଏଥିରେ ସହଯୋଗ କରିବାକୁ ଚେଷ୍ଟା କରିବି ।

୧୦ ବର୍ଷ ଧରି ବିଜେପିରେ ଥିଲି । ଓଡ଼ିଶା ଓ ଓଡ଼ିଶାବାସୀଙ୍କ କାମ କରିବାକୁ ଇଚ୍ଛା ଥିଲା । ସେଥିପାଇଁ ନିଷ୍ଠାର ସହ କାମ ବି କରୁଥିଲି । ଯାହା ମୋ ଦ୍ୱାରା ସମ୍ଭବ ବିଜେପି ପାଇଁ କରିଥିଲି । ମାତ୍ର ସେଠାରେ ବିଶ୍ୱାସ ଭାଜନ ହୋଇପାରିଲି ନାହିଁ । ଏବେ ମାନ୍ୟବର ମୁଖ୍ୟମନ୍ତ୍ରୀ ଏବଂ ଦଳ ଯେଉଁ ଦାୟିତ୍ୱ ଦେବେ ତାକୁ ନିଷ୍ଠାର ସହ ପାଳନ କରିବାକୁ ଚେଷ୍ଟା ରଖିବି ବୋଲି କହିଛନ୍ତି ଲେଖାଶ୍ରୀ ।

ଏହି ମିଶ୍ରଣ ପର୍ବରେ ବିଜେଡିର ସାଧାରଣ ସମ୍ପାଦକ ତଥା ରାଜ୍ୟସଭା ସାଂସଦ ମାନସ ମଙ୍ଗରାଜ, ରାଜ୍ୟସଭା ସାଂସଦ ଡ. ସସ୍ମିତ୍ ପାତ୍ରଙ୍କ ସମେତ ଅନ୍ୟ ନେତାମାନେ ଉପସ୍ଥିତ ଥିଲେ ।

ସୂଚନାଥାଉକି, କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନଙ୍କର ଖାସ୍ ଅନୁଗତ ଭାବେ ପରିଚିତ ଏହି ଫାୟାରବ୍ରାଣ୍ଡ ନେତ୍ରୀଙ୍କୁ ରାଜ୍ୟ ବିଜେପି ନେତୃତ୍ୱ ବାରମ୍ବାର ଉପେକ୍ଷା କରି ଆସୁଥିଲେ । ଗତଥର ନୀଳଗିରି ବିଧାନସଭା ଆସନରୁ ସେ ଟିକେଟ ଆଶାୟୀ ଥିଲେ । ତାଙ୍କର ଦ୍ୱିତୀୟ ପସନ୍ଦ ଥିଲା ବାଲେଶ୍ୱର ସାଂସଦ ଟିକେଟ୍ । ମାତ୍ର ତାଙ୍କୁ ନିରାଶ ହେବାକୁ ପଡ଼ିଥିଲା । ଗତ ବିଏମସି ନିର୍ବାଚନରେ ବିଜେପିର ମେୟର ପ୍ରାର୍ଥୀ ଭାବେ ତାଙ୍କ ନାଁ ଚର୍ଚ୍ଚାର ଆଗରେ ଥିଲେ ମଧ୍ୟ ତାହା ବି ହୋଇପାରିଲାନି । ଏହାପୂର୍ବରୁ ୨୦୧୪ ନିର୍ବାଚନରେ ମଧ୍ୟ ସେ ନିର୍ବାଚନ ଲଢ଼ିବାକୁ ଅଣ୍ଟା ଭିଡ଼ି ରହିଥିଲେ । ମାତ୍ର ତାଙ୍କର ଆଶା ପୂରଣ ହୋଇପାରିଲା ନାହିଁ ।

ଚଳିତ ନିର୍ବାଚନରେ କନ୍ଧମାଳ ଆସନରୁ ଏମପି ଟିକେଟ୍ ପାଇଁ ସେ କୁଆଡ଼େ ପ୍ରତିଶ୍ରୁତି ପାଇଥିଲେ । ସେହି ଅନୁଯାୟୀ ଗତ ୬ ମାସ ହେଲା ସେଠାରେ ପଡ଼ି ରହି ପ୍ରଚାର ଅଭିଯାନ ଚଳାଇଥିଲେ । ମାତ୍ର ସୁକାନ୍ତ ପାଣିଗ୍ରାହୀଙ୍କ ନାଁ ଘୋଷଣା ହେବା ପରେ ସେ ଭାଙ୍ଗି ପଡ଼ିଥିଲେ । ତାଙ୍କୁ ଆଉ କେଉଁଠୁ ଯେ ଟିକେଟ୍ ମିଳିବ ସେ ଆଶା ମଉଳି ଗଲା ପରେ ଆଜି ଦଳ ଛାଡ଼ିଛନ୍ତି ।

ରାଜ୍ୟ ସଭାପତି ମନମୋହନ ସାମଲଙ୍କ ପାଖକୁ ଆଜି ସକାଳେ ସେ ଇସ୍ତଫାପତ୍ର ପଠାଇ ତାହାକୁ ସୋସିଆଲ୍ ମିଡିଆରେ ସାର୍ବଜନୀନ କରିଥିଲେ । ଇସ୍ତଫାପତ୍ରରେ ଶ୍ରୀମତୀ ସାମନ୍ତସିଂହାର ଲେଖିଛନ୍ତି,

‘ଗତ ୧୦ ବର୍ଷ ଧରି ବିଜେପିକୁ ମୋର ଝାଳ ଏବଂ ରକ୍ତ ଦେଇଛି । କାର୍ଯ୍ୟନିଷ୍ଠତା ଏବଂ କଠିନ ପରିଶ୍ରମ ସତ୍ତ୍ୱେ ମୁଁ କିନ୍ତୁ ନେତୃତ୍ୱଙ୍କର ବିଶ୍ୱାସଭାଜନ ହୋଇପାରିଲି ନାହିଁ । ଏହାଦ୍ୱାରା ଲୋକଙ୍କ ସେବା କରିବା ପାଇଁ ମୋ ମନରେ ଥିବା ଇଚ୍ଛାରେ ବ୍ୟାଘାତ ସୃଷ୍ଟି ହୋଇଛି । ମୋ ଇଚ୍ଛା ସାକାର କରିବାକୁ ଏହି ଦଳରେ ମୋ ପାଇଁ ସ୍ଥାନ ନ ଥିବା ମୋର ଅନୁଭବ ହୋଇଛି । ଏଣୁକରି ମୁଁ ବିଜେପିର ପ୍ରାଥମିକ ସଦସ୍ୟ ପଦରୁ ଇସ୍ତଫା ଦେଉଛି । ମୋତେ ଏତେବର୍ଷ ଧରି ଦଳରେ କାମ କରିବାର ସୁଯୋଗ ଦେଇଥିବାରୁ ଧନ୍ୟବାଦ ।’