ସରପଞ୍ଚଙ୍କୁ ପିଟିଲେ; ସୁନା ,ଟଙ୍କା ଲୁଟିନେଲେ
Jitendra Kumar Jena
4248
ସରପଞ୍ଚଙ୍କୁ ଆକ୍ରମଣ କରି ସୁନା,ଟଙ୍କା ଲୁଟିନେଲେ । ଏହିପରି ଘଟଣା ଘଟିଛି କଟକ ଜିଲ୍ଲା ଖୁଣ୍ଟୁଣୀ ଥାନା ଅଞ୍ଚଳରେ । ଏନେଇ ଖୁଣ୍ଟୁଣୀ ଥାନାରେ ସରପଞ୍ଚ ଲିଖିତ ଅଭିଯୋଗ କରିଛନ୍ତି ।
ଅଭିଯୋଗ ଅନୁସାରେ, ଗତକାଲି ରାତିରେ କୌଣସି କାମ ପାଇଁ ଅନନ୍ତପୁରର ସରପଞ୍ଚ ଶକ୍ତିକାନ୍ତ ସାହୁ ଖୁଣ୍ଟୁଣୀ ଥାନାକୁ ଆସିଥିଲେ । ଥାନାରୁ କାମ ସାରି ଘରକୁ ଫେରିବା ବେଳେ ଘାଣ୍ଟିଖାଲ ନଦୀମୁହାଣ ନିକଟରେ ୪ ଜଣ ଦୁର୍ବୃତ୍ତ ତାଙ୍କ କାରକୁ ଅଟକାଇଥିଲେ ।
ସରପଞ୍ଚ ଗାଡି ରଖିବାରୁ ଟଙ୍କା ଓ ସୁନା ଦେବାକୁ ତାଙ୍କୁ ଧମକ ଦେଇଥିଲେ ଦୁର୍ବୃତ୍ତମାନେ । ପରେ ସରପଞ୍ଚଙ୍କୁ ଗାଡିରୁ ଟାଣି ଆଣି ଦୁର୍ବୃତ୍ତମାନେ ନିର୍ଧୂମ ମାଡ ମାରିବା ସହ ତାଙ୍କ ପାଖରେ ଥିବା ଟଙ୍କା ଓ ସୁନା ନେଇ ଚମ୍ପଟ ମାରିଥିଲେ । ଏଥିସହ ଦୁର୍ବୃତ୍ତମାନେ ସରପଞ୍ଚଙ୍କ ଗାଡି ଭାଙ୍ଗି ଦେଇଥିବା ଅଭିଯୋଗ ହୋଇଛି । ଏନେଇ ସରପଞ୍ଚ ଖୁଣ୍ଟୁଣୀ ଥାନାରେ ଅଭିଯୋଗ କରିଛନ୍ତି । ଅଭିଯୁକ୍ତକୁ ଧରିବାକୁ ଖୋଳତାଡ ଆରମ୍ଭ କରିଛି ପୁଲିସି ।
