ବେଧଡକ ଚାଲିଛି ବାଲି ଚୋରା ଚାଲାଣ

 ନିଆଳି ତହସିଲ୍ ଅଧିନସ୍ଥ ବିଭିନ୍ନ ନଦୀରେ ବାଲି ମାଫିଆଙ୍କ ଦୌରାତ୍ମ ଦିନକୁ ଦିନ ବଢି ଚାଲିଛି । ପ୍ରତ୍ୟେକ ଦିନ ଦ୍ୱୀପାଞ୍ଚଳର ବିଭିନ୍ନ ଅଞ୍ଚଳରୁ ବେଆଇନ୍ ଭାବେ ବାଲି ବୋଝେଇ ଶହ ଶହ ଟ୍ରକ କଟକ ଜିଲ୍ଲା ସମେତ ପଡୋଶୀ ଜିଲ୍ଲାକୁ ଚାଲାଣ ହେଉଛି । ପରିସ୍ଥିତି ଏଭଳି ହେଲାଣି ଯେ, ଦେବୀ ନଦୀ ସମେତ ଅନେକ ନଦୀରେ ବାଲି ଶେଷ ହୋଇ ଏବେ ପଙ୍କ ବାହାରିଲାଣି । ଏ ସବୁ ସତ୍ତ୍ୱେ ବାଲି ମାଫିଆଙ୍କ ପେଟ ପୁରୁନାହିଁ । ଦିନରାତି ବାଲି ବୋଝେଇ ଗାଡି ଗୁଡିକ ନିଆଳି ତହସିଲ୍ର ବିଭିନ୍ନ ରାସ୍ତାରେ ଯାତୟତ କରୁଛି ।  କେଉଁ ଦିନ ବାଲି ବୋଝେଇ ଗାଡି ଧକ୍କାରେ କିଏ ମୃତୁ୍ୟବରଣ କରିଛି ତ ଆଉ କେତେବେଳେ ବାଲି ବୋଝେଇ ଟ୍ରକ ଆଉ କା ଘର ଭିତରେ ପଶି ଗଲାଣି । ଚୋରା ବାଲି ଚାଲାଣରେ କେବଳ ଯେ ଧନ ଜୀବନ ନଷ୍ଟ ହେଉଛି ତା ନୁହେଁ, କୋଟି କୋଟି ଟଙ୍କାର ନିର୍ମାଣ ହେଉଥିବା ରାସ୍ତାଘାଟ ସବୁ ଭାଙ୍ଗି ରୁଜି ଖାଲଖମାରେ ପରିଣତ ହେଲାଣି । ଯାହାର ଜ୍ୱଳନ୍ତ ଉଦାହରଣ ଦେଖିବାକୁ ମିଳିଛି କୂଳଶ୍ରୀରୁ ଅଡଶପୁର, ସିଠାଳରୁ ଅଡଶପୁର, ଅଳତଳଙ୍ଗରୁ ଅଡଶପୁର ରାସ୍ତାରେ ।  ଏକ ବେସରକାରୀ ସୂତ୍ରରୁ ମିଳିଥିବା ତଥ୍ୟ ଅନୁଯାୟୀ, ସମଗ୍ର ଦ୍ୱୀପାଞ୍ଚଳରେ ୯ଟି ବେଆଇନ ବାଲିଘାଟରୁ ଏବେ ବି ଚୋରାରେ ବାଲି ଉତ୍ତୋଳନ କରାଯାଇ ବାହାର ଜିଲ୍ଲାକୁ ଚାଲାଣ କରାଯାଉଛି । ଆଉ କେତେକ ଜାଗାରେ ବାଲି ଗଦା କରି ଚଢା ଦରରେ ବିକ୍ରି କରାଯାଉଛି । ଏହି ବେଆଇନ୍ ବାଲିଘାଟର ମାଫିଆଙ୍କ ଠାରୁ ମାସିକିଆ ଲକ୍ଷଲକ୍ଷ ଟଙ୍କା ଆଦାୟ କରାଯାଇ ସରକାରୀ କର୍ମଚାରୀ ଲୁଟୁଛନ୍ତି । ସବୁଠାରୁ ବଡ କଥା ହେଉଛି ଜିଲ୍ଲା ପରିବହନ ବିଭାଗ ବାଲିଗାଡି ଓଭରଲୋଡ ଥିବା ସତ୍ତ୍ୱେ ଚଢାଉ କରି ଫାଇନ୍ କାଟୁନାହିଁ । ସେହିଭଳି ଜିଲ୍ଲା ମାଇନ୍ସ ବିଭାଗ ଚୋରା ବାଲିଘାଟର ତଥ୍ୟ ଜାଣି ମଧ୍ୟ ଘାଟ ଉପରେ କୌଣସି କାର୍ଯ୍ୟାନୁଷ୍ଠାନ ନେଉନାହାଁନ୍ତି । ଏମିତିକି ଲକ୍ଷାଧିକ ଟଙ୍କା ଖର୍ଚ୍ଚ କରି ବାଲି ମାଫିଆମାନେ ଦୀର୍ଘଦିନ ଗଡା ପ୍ରସ୍ତୁତ କରୁଥିବାବେଳେ ସ୍ଥାନୀୟ ପୁଲିସ ଜଳ ସମ୍ପଦ ବିଭାଗ, ପୂର୍ତ୍ତ ବିଭାଗ ଓ ଗ୍ରାମ୍ୟ ଉନ୍ନୟନ ବିଭାଗ ଦେଖି ଆଖି ବନ୍ଦ କରିଦେଉଛନ୍ତି ।  
ଉଲ୍ଲେଖଥାଉକି, ପ୍ରତ୍ୟେକ ଦିନ କସରଦା ଦେଇ ବାଲି ଗାଡି ଯାତାୟତ କରୁଥିବାବେଳେ ଉକ୍ତ ରାସ୍ତା କଡରେ କସରଦା ବିଟ୍ ହାଉସ୍ ଅଛି । ଏହି ବିଟ୍ହାଉସ୍ର ଅଧିକାରୀ ବାଲି ଗାଡିଗୁଡିକୁ ଜବତ ନ କରିବା ସନେ୍ଦହ ଘେରକୁ ଆସିଛନ୍ତି । କେତେକ ଗାଡି ଚାଳକ ନିଜ ନାମ ଗୋପନ ରଖି କହିଛନ୍ତି ଯେ, ମାସିକିଆ ଚାନ୍ଦା ମାଲିକମାନେ ଦେଉଥିବାରୁ ବାଲି ଗାଡି ଗୁଡିକ ଓଭରଲୋଡିଂ ହୋଇଗଲେ କୌଣସି ଅସୁବିଧା ନାହିଁ । ସେହିପରି ଅନ୍ୟ କେତେକ ବିଭାଗ ମଧ୍ୟ ମାସିକିଆ ନେଉଛନ୍ତି । ତେବେ ବାଲି ଚୋରା ଚାଲାଣ ହେବା କଥା ନୂଆ କଥା ନୁହେଁ, କିନ୍ତୁ ୩ ମାସ ହେବ ବାଲି ଚୋରା ଚାଲାଣ ଅଧିକ ମାତ୍ରାରେ ହେଉଛି । କଟକ ଜିଲ୍ଲା ପ୍ରଶାସନ ଏହାକୁ ଜଳଜଳ ହୋଇ ଦେଖୁଥିଲେ ମଧ୍ୟ ଏହି ଦିଗରେ କୌଣସି କାର୍ଯ୍ୟାନୁଷ୍ଠାନ ଗ୍ରହଣ କରୁନାହିଁ । ତେଣୁ ଏଥିପ୍ରତି କଟକ ଜିଲ୍ଲାପାଳ ଦୃଷ୍ଟି ଦେବାକୁ ଅଞ୍ଚଳବାସୀ ଦାବି କରିଛନ୍ତି ।