ସତ୍ୟବାଦୀରେ କିଏ ଧରିବେ କଂଗ୍ରେସ ମଙ୍ଗ ?

 ଭୁବନେଶ୍ୱର : ଏଥର ପୁରୀ ଜିଲ୍ଲା ରାଜନୀତିକ ସମୀକରଣ ବଦଳିଯାଇଛି  । ବ୍ରହ୍ମଗିରିର ଟାଣୁଆ ନେତା ସଂଜୟ ଦାସବର୍ମା ସତ୍ୟବାଦୀରୁ ନିର୍ବାଚନ ଲଢୁଥିବାବେଳେ ବ୍ରହ୍ମଗିରିରେ ଲଢ଼ିବେ ସତ୍ୟବାଦୀ ନେତା ଉମା ସାମନ୍ତରାୟ  । ସେପଟେ ପୁରୀରେ ଶୁଭାଶିଷ ଷଡ଼ଙ୍ଗୀ ଓ ସୁନୀଲ ମହାନ୍ତିଙ୍କ ବିବାଦ ବି ତୁଟିଯାଇଛି  । ବ୍ରହ୍ମଗିରିରେ ଏବେ ଦାଦାଙ୍କ ବଦଳରେ ଝିଆରୀ ଉପାସନା ମହାପାତ୍ର ବିଜେପି ଟିକେଟରେ ଲଢ଼ିବାକୁ ଯାଉଛନ୍ତି । ଏସବୁ ଭିତରେ ସତ୍ୟବାଦୀରେ କିଏ କଂଗ୍ରେସ ମଙ୍ଗ ଧରିବେ ତାହାକୁ ନେଇ ଚର୍ଚ୍ଚା ଜୋରଧରିଛି  ।
ଖାଲି ସତ୍ୟବାଦୀ କି ପୁରୀ ନୁହେଁ, ରାଜ୍ୟର ଅନ୍ୟତମ ଟାଣୁଆ କଂଗ୍ରେସ ନେତା ହେଉଛନ୍ତି ପ୍ରସାଦ ହରିଚନ୍ଦନ  । ସତ୍ୟବାଦୀରୁ ୧୯୯୫, ୨୦୦୦ ଓ ୨୦୦୯ରେ  ପ୍ରସାଦ ଜିତିଥିଲେ  । ତେବେ ୨୦୧୪ରେ ସେ ୨୫ ହଜାର ଓ ୨୦୧୯ରେ ୧୧ ହଜାର ଭୋଟରେ ସନ୍ତୁଷ୍ଟ ରହିଥିଲେ  । ତେଣୁ ସେ ଆଗାମୀ ନିର୍ବାଚନ ଲଢ଼ିବାକୁ ଚାହୁଁନାହାନ୍ତି  । ଦଳର ସ୍ଥିତି ଭଲ ନଥିବାରୁ ସେ ଲଢ଼ିବେନାହିଁ ବୋଲି ଜଣାପଡ଼ିଛି  । ଏଥିରୁ ହିଁ ସତ୍ୟବାଦୀରୁ କଂଗ୍ରେସ ହାରିବା ନିଶ୍ଚିତ ବୋଲି କହିଲେ ଭୁଲ ହେବନାହିଁ  ।
 ପୂର୍ବତନ ପିସିସି ସଭାପତି ପ୍ରସାଦ କରଛଡା ଦେଉଥିବାରୁ ସତ୍ୟବାଦୀ କଂଗ୍ରେସ ନେତୃତ୍ୱ ଶୂନ୍ୟ ହୋଇପଡିଛି  । ଏମିତିକି କଂଗ୍ରେସ ଟିକେଟରୁ ଲଢ଼ିବାକୁ ଏଠାରେ  ପ୍ରାର୍ଥୀବି ମିଳୁନାହାନ୍ତି  । ଏକଦା ସତ୍ୟବାଦୀରୁ ବହୁବାର କଂଗ୍ରେସ ଜିଣିବାରେ ସକ୍ଷମ ହୋଇଥିଲା  । ସତ୍ୟବାଦୀରେ କଂଗ୍ରେସର ପ୍ରଥମ ବିଧାୟକ ଥିଲେ ପଣ୍ଡିତ ନୀଳକଣ୍ଠ ଦାସ  । ଦଳ ଏଠାରୁ ୮ଥର ବାଜିମାତ କରିବାରେ ସଫଳ ହୋଇଛି  । କିନ୍ତୁ ଆଜି ଦଳୀୟ ଟିକେଟ ନେବାକୁ ନେତାମାନେ ବି ଆଗ୍ରହ ପ୍ରକାଶ କରୁନାହାନ୍ତି  । 
ସତ୍ୟବାଦୀର ଅଙ୍କ କହୁଛି, ୧୯୯୫ ଓ ୨୦୦୦ରେ ପ୍ରସାଦ କଂଗ୍ରେସ ବିଧାୟକ ଥିଲେ । ପରେ ୨୦୦୪ରେ ସ୍ୱାଧୀନ ପ୍ରାର୍ଥୀ ରମାରଞ୍ଜନ ବଳିୟାର ସିଂହ ବିଧାୟକ ପଦ ଛଡାଇ ନେଇଥିଲେ । ୨୦୦୯ରେ ପୁଣି ପ୍ରସାଦଙ୍କ ଲେଉଟାଣି ହୋଇଥିଲା । କିନ୍ତୁ ଏହାପରଠାରୁ କଂଗ୍ରେସର ଅଧୋପତନ ଘଟିଛ  । ସବୁଠୁ ଅଧିକ ନିରାଶଜନକ ସ୍ଥିତି ଦେଖିବାକୁ ମିଳିଥିଲା ଗତ ପଞ୍ଚାୟତ ନିର୍ବାଚନରେ  । କଣାସର ୩ ଓ ସତ୍ୟବାଦୀର ୩ ଜିଲ୍ଲା ପରିଷଦ ଜୋନରେ କଂଗ୍ରେସ ପ୍ରାର୍ଥୀ ବି ଦେଇନଥିଲା  । ଗାଏମୋଟ କହିଲେ ସତ୍ୟବାଦୀରେ କଂଗ୍ରେସ ଏବେ ଜିରୋ ହୋଇଯାଇଛି  ।