ଏଥର ଦୁଇ ପୂର୍ବତନ ବିଧାୟକଙ୍କ ମଧ୍ୟରେ ଲଢ଼େଇ

ସମ୍ବଲପୁରରୁ ରାଜରାମ ପାଢୀ :    ସାଧାରଣ ନିର୍ବାଚନ ପାଇଁ ତାରିଖ ଘୋଷଣା ହେବା ପରେ ବିଭିନ୍ନ ରାଜନୈତିକ ଦଳ ଗୁଡିକ ପ୍ରାର୍ଥୀ ଚୟନରେ ବିଶେଷ ଗୁରୁତ୍ୱ ଦେଉଛନ୍ତି । ଏଥର ମଧ୍ୟ ଜିଲ୍ଲାର କୁଚିଣ୍ଡା ବିଧାନସଭା ନିର୍ବାଚନ ମଣ୍ଡଳୀରେ ପାରମ୍ପାରିକ ପ୍ରତିଦ୍ୱନ୍ଦ୍ୱୀ ମଇଦାନକୁ ଓହ୍ଲାଇଛନ୍ତି । ବିଜୁ ଜନତା ଦଳ ପକ୍ଷରୁ କୁଚିଣ୍ଡା ପାଇଁ ପୂର୍ବତନ କଂଗ୍ରେସ ବିଧାୟକ ତଥା ଜିଲ୍ଲା କଂଗ୍ରେସ ସଭାପତି ରହିଥିବା ରାଜେନ୍ଦ୍ର ଛତି୍ର୍ରଆଙ୍କ ନାମ ଏବଂ ବିଜେପି ପକ୍ଷରୁ ପୂର୍ବତନ ବିଧାୟକ ରବିନାରାୟଣ ନାୟକଙ୍କ ନାମ ଘୋଷଣା କରାଯାଇଛି । ବର୍ତ୍ତମାନର ବିଜେଡ଼ି ବିଧାୟକ କିଶୋର ଚନ୍ଦ୍ର ନାୟକଙ୍କ ବଦଳରେ ରାଜେନ୍ଦ୍ର ଛତି୍ରଆଙ୍କୁ ବିଜେଡ଼ି ପ୍ରାର୍ଥୀ କରିଛି । ଏଠାର ପୂର୍ବତନ ବିଜେପି ବିଧାୟକ ବୃନ୍ଦାବନ ମାଝୀ ଏବଂ ଗତ ଥରର କଂଗ୍ରେସ ପ୍ରାର୍ଥୀ ଶୋଭାରାମ ପ୍ରଧାନ ବିଜେଡ଼ିରେ ଯୋଗ ଦେଇ ସାରିଛନ୍ତି । ଏଣୁ ଏଥର କୁଚିଣ୍ଡାରେ ବିଜେଡ଼ି ଓ ବିଜେପି ମଧ୍ୟରେ କଡ଼ା ଟକ୍କର ହେବ । ଗତ ୨୦୧୯ ନିର୍ବାଚନରେ ବିଜେଡ଼ି ପ୍ରାର୍ଥୀ ୭୨, ୬୦୧ ଅର୍ଥାତ୍ ୪୧.୭୧ ପ୍ରତିଶତ ଭୋଟ ପାଇ ବିଜୟ ହୋଇଥିଲେ । ତକ୍ରାଳୀନ ବିଧାୟକ ରବିନାରାୟଣ ନାୟକ ବିଜେପି ପ୍ରାର୍ଥୀ ହୋଇ ୬୯,୦୯୩ ଅର୍ଥାତ୍ ୩୯.୬୯ ପ୍ରତିଶତ ଭୋଟ ପାଇଥିବା ବେଳେ ବର୍ତ୍ତମାନ ବିଜେଡ଼ିକୁ ଆସିଥିବା ଜିଲ୍ଲା ଉନ୍ନୟନ ପରିଷଦର ଅଧ୍ୟକ୍ଷ କଂଗ୍ରେସ ପ୍ରାର୍ଥୀ ଭାବରେ ୨୪, ୭୯୫ ଅର୍ଥାତ୍ ୧୪.୨୪ ପ୍ରତିଶତ ଭୋଟ ପାଇଥିଲେ । ତା’ ପୂର୍ବ ଥର ବିଜେପି ପ୍ରାର୍ଥୀ ରବିନାରାୟଣ ନାୟକ ୪୩.୪୪ ପ୍ରତିଶତ ଭୋଟ ପାଇ ବିଜୟ ହୋଇଥିଲେ । ସେଥର ବିଜେଡ଼ି ପ୍ରାର୍ଥୀ ଭୁବନେଶ୍ୱର କିସାନ ୨୯.୪୩ ଏବଂ କଂଗ୍ରେସ ପ୍ରାର୍ଥୀ ତଥା ତକ୍ରାଳୀନ ବିଧାୟକ ୨୦.୮୧ ପ୍ରତିଶତ ଭୋଟ ପାଇଥିଲେ । ରାଜେନ୍ଦ୍ର ଛତି୍ରଆ କଂଗ୍ରେସ ପ୍ରାର୍ଥୀ ଭାବରେ ୨୦୦୯ରେ ବିଜୟୀ ହୋଇଥିବା ବେଳେ ବିଜେପିର ତଥା ବର୍ତ୍ତମାନର ପ୍ରାର୍ଥୀ ୨୮.୯୧ ଏବଂ ବୃନ୍ଦବନ ମାଝୀ ୨୧.୩୫ ପ୍ରତିଶତ ଭୋଟ ହାସଲ କରିଥିଲେ । ବିଜେପି ଏଥର ଶୀଘ୍ର ପ୍ରାର୍ଥୀ ଘୋଷଣା କରିଥିବାରୁ ପ୍ରଚାର ଅଭିଯାନ ଆରମ୍ଭ କରି ସାରିଛି । 
ସମ୍ବଲପୁର ଜିଲ୍ଲାର କୁଚିଣ୍ଡା ବିଧାନସଭା ନିର୍ବାଚନ ମଣ୍ଡଳୀ ଏକ ସଂରକ୍ଷିତ ଆସନ ଅଟେ । ସମ୍ବଲପୁର ଲୋକସଭା କ୍ଷେତ୍ରର ୭ଟି ବିଧାନସଭା ନିର୍ବାଚନ ମଣ୍ଡଳୀରୁ କୁଚିଣ୍ଡା ଆସନଟି ବାମରା, ଜମନକିରା, କୁଚିଣ୍ଡା ବ୍ଲକ ଓ ଏନ୍ଏସିକୁ ନେଇ ଗଠିତ । ଏଠାରେ ବିଶେଷ ଭାବେ ଆଦିବାସୀ ସମ୍ପ୍ରଦାୟର ଲୋକ ବାସ କରନ୍ତି । ଏମାନଙ୍କ ମଧ୍ୟରୁ ଅଧିକାଂଶ କିସାନ ବର୍ଗର ଅଟନ୍ତି । ଏମାନଙ୍କ ଭୋଟ ଉପରେ ପ୍ରାର୍ଥୀମାନଙ୍କ ପରିଶ୍ରମ ଏବଂ ଭବିଷ୍ୟତ ନିର୍ଭର କରିବ ବୋଲି କୁହାଯାଉଛି । ସେମାନେ ଚାଷ ଓ ଜଙ୍ଗଲଜାତ ଦ୍ରବ୍ୟ ଉପରେ ନିର୍ଭର କରନ୍ତି । ପୂର୍ବରୁ ଦେବଗଡ ଓ ବାମଣ୍ଡା ବିଧାନସଭା ନିର୍ବାଚନ ମଣ୍ଡଳୀ ସହ ଥିବା କୁଚିଣ୍ଡା ବିଧାନସଭା ନିର୍ବାଚନ ମଣ୍ଡଳୀ ୧୯୬୭ମସିହାରେ ଗଠିତ ହୋଇଥିଲା । ସେଠାରୁ ଏ ପର୍ଯ୍ୟନ୍ତ ଅନୁଷ୍ଠିତ ୧୩ଟି ନିର୍ବାଚନରୁ କଂଗ୍ରେସ ୭ଥର ବିଜୟୀ ହୋଇଛି । ସ୍ୱତନ୍ତ୍ର ପାର୍ଟି ଓ ଜନତା ଦଳକୁ ଥରେ ଲେଖାଏଁ ଏବଂ ବିଜେପି ପ୍ରାର୍ଥୀ ୩ଥର ସଫଳତା ପାଇଛନ୍ତି । ଗତ ତ୍ରିସ୍ତରୀୟ ପଞ୍ଚାୟତ ନିର୍ବାଚନରେ ବିଜେଡ଼ି ଭଲ ପ୍ରଦର୍ଶନ କରିଥିଲା ।  
ତେବେ କେଉଁ ଦଳ କାହାକୁ ପ୍ରାର୍ଥୀ କରିବ ତାହା ଉପରେ ସମସ୍ତଙ୍କ ନଜର ରହିଛି । ଚଳିତ ନିର୍ବାଚନ ପୂର୍ବରୁ ବିଭିନ୍ନ ଦଳରେ ଗୋଷ୍ଠୀ କନ୍ଦଳ ଦେଖାଯାଇଛି । ଦଳର ପୁରାତନ କର୍ମୀ ମାନେ ନବାଗତମାନଙ୍କୁ ନେଇ ନିଜର ଅସନ୍ତୋଷ ଜାହିର କରିଛନ୍ତି । ଏପରିକି ନିଜ ନିଜ ଦଳର ସୁପ୍ରିମୋଙ୍କ ଠାରେ ଫେରାଦ ହୋଇଥିବା ଦେଖିବାକୁ ମିଳିଛି । ୨୦୧୯ରେ ଝାରସୁଗୁଡା ବିଧାୟକ ନବ ଦାସ କଂଗ୍ରେସ ଛାଡି ବିଜେଡିରେ ଯୋଗ ଦେବା ପରେ ରାଜନୀତି ପାଣି ପାଗରେ ପରିବର୍ତ୍ତନ ହୋଇଛି । ତାଙ୍କ ମାମୁଁ ଘର କୁଚିଣ୍ଡା ଏବଂ ରାଜନୈତିକ ଦୃଷ୍ଟିରୁ ମଧ୍ୟ ଏହି ଅଞ୍ଚଳ ସହ ତାଙ୍କର ପୁରୁଣା ସମ୍ପର୍କ ରହିଥିଲା । ବିଜେଡି ନେତୃବୃନ୍ଦ ଏଥର ଅସନ୍ତୁଷ୍ଟ ଆଶାୟୀ ମାନଙ୍କୁ ସନ୍ତୁଷ୍ଟ କରି ନିର୍ବାଚନୀ ମିଶନ ହାସଲ କରିବାକୁ କେଉଁ ରଣନୀତି ଅନୁସରଣ କରୁଛନ୍ତି ତାହା ସମୟ କହିବ । ବିଜେପି ଓ ବିଜେଡି ମଧ୍ୟରେ କଡା ଟକ୍କର ସମ୍ଭାବନା ଥିବା ବେଳେ ଉଭୟ ଦଳର ପୁରୁଖା ନେତା ରହିଛନ୍ତି ।