ନବୀନଙ୍କ ତଣ୍ଟିରେ ‘ବିଦ୍ରୋହୀ’ କଣ୍ଟା
Naveen Pattanaik Biju Janata Dal
Ramachandi Prasad
ଏ ନାଟକର ଖଳନାୟକ ପାଣ୍ଡିଆନ୍ ନୁହଁନ୍ତି ତ ?
।। ପ୍ରଭାନ୍ୟୁଜ୍ ।। ଭୁବନେଶ୍ୱର, ୩୦ା୯ : ବାଘ ବୁଢ଼ା ହେଲେ, ଘାସ ସିନା ଖାଏନାହିଁ । କିନ୍ତୁ ନିରେଖି ଦେଖୁଥିବା ଠେକୁଆର ବାଘପ୍ରତି ଡର ଭୟ ରହେନାହିଁ । ବିଜେଡ଼ି ସୁପ୍ରିମୋ ନବୀନ ପଟ୍ଟନାୟକଙ୍କର ଠିକ୍ ଏମିତି ହିଁ ଅବସ୍ଥା ହୋଇଯାଇଛି । ନବୀନ କେତେଦିନ ଦଳ ସମ୍ଭାଳିବେ ତାହାକୁ ନେଇ ନେତାମାନେ ଦୋଛକିରେ । ଯେଉଁଥିପାଇଁ ବିଜେଡ଼ିରେ ଗୋଷ୍ଠୀକନ୍ଦଳ, ଛକାପଞ୍ଝା, ଗୋଛିକଟା ବଢ଼ିବାରେ ଲାଗିଛି । ସତେଯେମିତି ନବୀନଙ୍କ ତଣ୍ଟିରେ ଏବେ ବିଦ୍ରୋହୀ କଣ୍ଟା ଲାଗିଯାଇଛି । ନା ଢେ଼ାକି ପାରୁଛନ୍ତି ନା ଖାଇ ପାରୁଛନ୍ତି । ଟାଣୁଆ ନେତାଙ୍କୁ ଦଳରୁ ବିଦା କଲେ ଦଳ ଦୁର୍ବଳ ହେବା ସହ ବିଜେପି ମଜବୁତ୍ ହେବାର ବି ଆଶଙ୍କା ରହିଛି । ହେଲେ ନବୀନଙ୍କୁ ଏମିତି ଅକଳରେ ପକାଇଥିବା ଖଳନାୟକ ପାଣ୍ଡିଆନ୍ ନୁହଁନ୍ତି ତ ? ଏମିତି ପ୍ରଶ୍ନ ଉଠିବା ସ୍ୱାଭାବିକ ।
ଭୁବନେଶ୍ୱର ବିଜେଡ଼ିର ଗୋଷ୍ଠୀକନ୍ଦଳ ଏବେ ସାରା ରାଜ୍ୟରେ ଚର୍ଚ୍ଚା ସୃଷ୍ଟିକରିଛି । ଅମରେଶ ଜେନା ଓ ବିରଞ୍ଚି ମହାସୁପକାର ଯୁଦ୍ଧଂଦେହୀ ଡାକରା ବି ଦେଇଛନ୍ତି । ତେବେ ଅମରେଶ ଓ ବିରଞ୍ଚିଙ୍କୁ ବଳଶାଳୀ କରିବାରେ ଭିକେ ପାଣ୍ଡିଆନଙ୍କର ଏକ ବଡ଼ ଭୂମିକା ରହିଛି । ଅନନ୍ତ ଜେନାଙ୍କୁ ଗତ ଦଶ ବର୍ଷ ଧରି ଅମରେଶ ଜୋରଦାର ବିରୋଧ କରୁଛନ୍ତି । କିନ୍ତୁ ଆକ୍ସନ ନେବା ବଦଳରେ ଅମରେଶଙ୍କୁ ସନ୍ତୁଷ୍ଟ କରିବା ପାଇଁ ଦଳ ତାଙ୍କୁ ବହୁ ଗୁରୁ ଦାୟିତ୍ୱ ଦେଇଥିଲା । ସେହିପରି ଅଶୋକ ପଣ୍ଡାଙ୍କୁ ଚେକ୍ ଦେବା ପାଇଁ ବିରଞ୍ଚି ମହାସୁପକାରଙ୍କୁ ପାଣ୍ଡିଆନ ହିଁ ବଳବାନ କରିଥିଲେ । ନଚେତ୍ ୨୦୧୯ରୁ ୨୦୨୪ ପର୍ଯ୍ୟନ୍ତ ଅନନ୍ତ ଜେନାଙ୍କୁ ଅମରେଶ ଓ ଅଶୋକ ପଣ୍ଡାଙ୍କୁ ବିରଞ୍ଚି ଅକଳରେ ପକାଇଥିଲେ । ସେତେବେଳେ ଯଦି କାର୍ଯ୍ୟାନୁଷ୍ଠାନ ନିଆ ଯାଇଥା’ନ୍ତା ଆଜି ଏଭଳି ସ୍ଥିତି ଦେଖିବାକୁ ମିଳିନଥା’ନ୍ତା । ଦଳ କ୍ଷମତାରେ ଥିଲା, ତେଣୁ କ୍ଷତି ଭରଣା ବି କରିପାରିଥା’ନ୍ତା । କିନ୍ତୁ ପାଣ୍ଡିଆନ୍ ଚାହିଁନଥିଲେ, ବରଂ ବୁନୁ ଓ ଅଶୋକଙ୍କୁ ଅକଳରେ ପକାଇବା ପାଇଁ ବାଇଁଆ ଓ ଲିଟୁଙ୍କୁ ଅଧିକ ଶକ୍ତିଶାଳୀ କରିଥିଲେ ବୋଲି କେତେକ ବିଜେଡ଼ି ନେତା ମତବ୍ୟକ୍ତ କରୁଛନ୍ତି ।
