ପାକ୍କୁ ଭାରତର କଡ଼ା ଚେତାବନୀ
Samir Kumar Rout
ଆତଙ୍କବାଦକୁ ପ୍ରୋତ୍ସାହନ ଦେଲେ ଚୁପ୍ ବସିବୁନି
ନୂଆଦିଲ୍ଲୀ : ପାକିସ୍ତାନକୁ କଡା ଚେତାବନୀ ଦେଇଛନ୍ତି ବୈଦେଶିକ ମନ୍ତ୍ରୀ ଏସ ଜୟଶଙ୍କର । ପାକିସ୍ତାନକୁ କଡ଼ା ସମାଲୋଚନା କରି ଏକ "ଖରାପ ପଡୋଶୀ’ ଭାବରେ ବର୍ଣ୍ଣନା କରିଛନ୍ତି । ପାକିସ୍ତାନ ନିରନ୍ତର ଭାବରେ ଆତଙ୍କବାଦକୁ ରାଷ୍ଟ୍ର ନୀତି ଭାବରେ ବ୍ୟବହାର କରି ଆସିଛି । ତେଣୁ ଏଣିକି ଆତଙ୍କବାଦକୁ ପ୍ରୋତ୍ସାହନ ଦେଲେ ଆମେ ଆଉ ଚୁପ ବସିବୁନି ବୋଲି ଦୃଢ଼ ଭାବରେ କହିଛନ୍ତି ଜୟଶଙ୍କର । ଭାରତ ବାହ୍ୟ ହସ୍ତକ୍ଷେପ ବିନା ନିଜ ଲୋକଙ୍କୁ ରକ୍ଷା କରିବାର ସାର୍ବଭୌମ ଅଧିକାର ବଜାୟ ରଖିଛି । ଇଣ୍ଡିଆନ୍ ଇନଷ୍ଟିଚ୍ୟୁଟ୍ ଅଫ୍ ଟେକ୍ନୋଲୋଜି (ଆଇଆଇଟି) ମାଡ୍ରାସରେ ଛାତ୍ରମାନଙ୍କ ସହିତ ଆଲୋଚନା ସମୟରେ ଜୟଶଙ୍କର କହିଛନ୍ତି ଯେ ଦେଶର ସୁରକ୍ଷା ପ୍ରତି ବିପଦ ଆସିଲେ କିପରି ତାହାର ଜବାବ ଦିଆଯିବ ତାହା ନୂଆଦିଲ୍ଲୀ ନିଜେ ନିର୍ଣ୍ଣୟ କରିବ ଓ କୌଣସି ବାହ୍ୟ ଶକ୍ତିର ପରାମର୍ଶ ଗ୍ରହଣ କରିବ ନାହିଁ । ସେ କହିଛନ୍ତିି ଯେ ସୀମାପାର ଆତଙ୍କବାଦ ଦ୍ୱିପାକ୍ଷିକ ସହଯୋଗର ମୂଳଦୁଆକୁ ମୌଳିକ ଭାବରେ ପ୍ରଭାବିତ କରେ ।
ଜୟଶଙ୍କର କହିଛନ୍ତି ଯେ ଖରାପ ପଡୋଶୀ ଦେଶ ଆତଙ୍କବାଦର "ଇଚ୍ଛୁକ, ନିରନ୍ତର ଏବଂ ଅନୁତାପହୀନ’ ବ୍ୟବହାର ଦ୍ୱାରା ଭାରତର ଚ୍ୟାଲେଞ୍ଜ ବୃଦ୍ଧି ପାଉଛି । ଯଦି କୌଣସି ଦେଶ ଆତଙ୍କବାଦ ଜାରି ରଖିବାକୁ ବାଛିଥାଏ, ତେବେ ଭାରତର ନିଜ ଲୋକଙ୍କୁ ରକ୍ଷା କରିବାର ସମ୍ପୂର୍ଣ୍ଣ ଅଧିକାର ଅଛି ଓ ସେହି ଅଧିକାରକୁ ବ୍ୟବହାର କରିବ ବୋଲି ସେ କହିଛନ୍ତି । କେହି ଆମକୁ କହିପାରିବେ ନାହିଁ ଯେ ଆମେ କ'ଣ କରିବା ଉଚିତ କିମ୍ବା କ'ଣ କରିବା ଉଚିତ ନୁହେଁ । ଆମ ଲୋକଙ୍କୁ ସୁରକ୍ଷା ଦେବା ପାଇଁ ଆମେ ଯାହା ଆବଶ୍ୟକ ତାହା କରିବୁ ବୋଲି ସେ କହିଛନ୍ତି । ସେ ସୀମାପାର ଆତଙ୍କବାଦକୁ ଜଳ ବଣ୍ଟନ ଭଳି ଚୁକ୍ତିନାମା ସହିତ ମଧ୍ୟ ଯୋଡ଼ିଥିଲେ । ଜୟଶଙ୍କର କହିଛନ୍ତି ଯେ ଭାରତ ଦଶନ୍ଧି ପୂର୍ବରୁ ଜଳ ବଣ୍ଟନ ଚୁକ୍ତିନାମା ସ୍ୱାକ୍ଷର କରିଥିଲା, କିନ୍ତୁ ଏପରି ଚୁକ୍ତିନାମା ଭଲ ପଡୋଶୀ ସମ୍ପର୍କରେ ଆଧାରିତ । ଆପଣ ଆମ ଦେଶରେ ଆତଙ୍କବାଦ ପ୍ରସାର କରିବା ଜାରି ରଖିଥିବା ବେଳେ ଆମେ ଆପଣଙ୍କ ସହିତ ପାଣି ବାଣ୍ଟିବା ପାଇଁ ଆଶା କରିପାରିବେ ନାହିଁ ବୋଲି ସେ କହିଛନ୍ତି ।
