ଯୁବପୀଢିଙ୍କ ଫାଶ ନୁ୍ୟଡ୍ କଲ୍

ବର୍ତ୍ତମାନ ଦିନକୁ ଦିନ ମୋବାଇଲ୍ ଫୋନ୍ରେ ଉପଯୋଗିତା ଅପେକ୍ଷା ଅନୁପଯୋଗୀ କାର୍ଯ୍ୟର ସଂଖ୍ୟା ବଢ଼ି ବଢ଼ି ଚାଲିଛି । ମୋବାଇଲ୍ ଫୋନ୍ଟି ମୁଖ୍ୟତଃ ସୁବିଧାଜନକ ଯୋଗାଯୋଗ ନିମିତ୍ତ ଉଦ୍ଦିଷ୍ଟ ରହିଥିଲା । କିନ୍ତୁ ପରବର୍ତ୍ତୀ ସମୟରେ ଏହାକୁ ଏକ କମ୍ପୁ୍ୟଟର ଭାବରେ ବ୍ୟବହାର କରାଯାଇଛି । କମ୍ପୁ୍ୟଟରରେ ରହିଥିବା ସମସ୍ତ ସୁବିଧା ବର୍ତ୍ତମାନ ମୋବାଇଲ୍ ଫୋନ୍ରେ ଉପଲବ୍ଧ । ତେଣୁ ଯୋଗାଯୋଗ ଭଳି ଏହାର ମୁଖ୍ୟ ଉପଯୋଗୀତା ଠାରୁ ଅନ୍ୟାନ୍ୟ ଉପଯୋଗୀତା ଗୁଡ଼ିକ ଅଧିକ ପରିମାଣରେ ବ୍ୟବହାର କରାଯାଉଛି । ତେବେ ଯୁବଗୋଷ୍ଠୀ ଏହି ମୋବାଇଲ୍ ଫୋନ୍ର ବ୍ୟବହାର କ୍ଷେତ୍ରରେ କେତେ ସଚେତନ ବର୍ତ୍ତମାନ ତାହା ପ୍ରଶ୍ନବାଚୀ ସୃଷ୍ଟି କରୁଛି । ମୋବାଇଲ୍ ଫୋନ୍ ମାଧ୍ୟମରେ ଭିଡ଼ିଓ କଲ୍ର ସୁବିଧା ରହିଥିବାରୁ ଏହି ସୁବିଧାକୁ ଅପବ୍ୟବହାର କରାଯାଇ ତାକୁ ନୁ୍ୟଡ୍ କଲ୍ରେ ପରିଣତ କରାଯାଉଛି । ଏହା ଫଳରେ ବିଚାରବୋଧ ନଥିବା ଯୁବଗୋଷ୍ଠୀ ଭୟଙ୍କର ସମସ୍ୟାର ସମ୍ମୁଖୀନ ହେଉଛନ୍ତି । ସାଇବର୍ ଠକେଇକୁ ନୁ୍ୟଡ୍ କଲ୍ ଗୁଡ଼ିକ ବହୁ ପରିମାଣରେ ବଢ଼େଇ ଦେଇଛି । କାରଣ ଅଧିକାଂଶ ନୁ୍ୟଡ୍ କଲ୍ ସହିତ ସାଇବର୍ ଠକେଇ ସଂପୃକ୍ତ ଥିବା ଜଣାପଡ଼ିଲାଣି । ଯେତେ ପ୍ରକାରର ମୋବାଇଲ୍କୁ ନେଇ ଅପରାଧ ଘଟୁଛି, ଏସବୁ ଗୁଡ଼ିକର ବିଶ୍ଳେଷଣରୁ ଦେଖାଯାଉଛି ଯେ ମୋବାଇଲ୍ ଫୋନ୍ର ବ୍ୟବହାର ଅପେକ୍ଷା ଅପବ୍ୟବହାର ଅଧିକ ହେଉଥିବାରୁ ଅପରାଧ ମଧ୍ୟ ବଢ଼ି ବଢ଼ି ଚାଲୁଛି । ଉପଯୋଗୀତା ନଥାଇ ଦୈନିକ ଦେଢ଼ରୁ ୩ ଜିବି ପର୍ଯ୍ୟନ୍ତ ଏବଂ ସ୍ଥଳ ବିଶେଷରେ ଅସୀମିତ କଲ୍ର ସୁବିଧା ବର୍ତ୍ତମାନ ବିଭିନ୍ନ ମୋବାଇଲ୍ କମ୍ପାନୀମାନେ ଦେଉଛନ୍ତି । ମୋବାଇଲ୍ କମ୍ପାନୀ ଗୁଡ଼ିକ କ୍ଷେତ୍ରରେ ଏହା ଏକ ବ୍ୟବସାୟ ହୋଇଥିବା ସ୍ଥଳେ ବେକାର ଯୁବଗୋଷ୍ଠୀଙ୍କ କ୍ଷେତ୍ରରେ ଏହା ଏକ ପ୍ରକାର ଅଭିଷାପରେ ପରିଣତ ହୋଇଛି । ନିଜର ଅନ୍ତରଙ୍ଗ ମୁହୂର୍ତ୍ତର ଫଟୋ ଗୁଡ଼ିକୁ ସାମାଜିକ ଗଣମାଧ୍ୟମରେ ପୋଷ୍ଟ୍ କରିବା ପାଇଁ ଯୁବଗୋଷ୍ଠୀଙ୍କ ଭିତରେ ପ୍ରବଳ ଆଗ୍ରହ ଦେଖିବାକୁ ମିଳୁଛି । ଆଉ ଏହି ଆଗ୍ରହ ହିଁ ପରବର୍ତ୍ତୀ ସମୟରେ ସେମାନଙ୍କୁ ସ୍ଥଳବିଶେଷରେ ଆତ୍ମହତ୍ୟା ପର୍ଯ୍ୟନ୍ତ ପରିସ୍ଥିତିରେ ସମ୍ମୁଖୀନ କରାଇ ଦେଉଛି । ମୋବାଇଲ୍ ଫୋନ୍ଟି ହାତରେ ଧରିଲେ ତାକୁ କେତେଦୂର ବ୍ୟବହାର କରାଯିବ ଏବଂ କେଉଁ ବ୍ୟବହାରଟି ଅପବ୍ୟବହାର ସେସମ୍ପର୍କରେ କାହାରି ପକ୍ଷରୁ ସତର୍କ ସୂଚନା ଯୁବଗୋଷ୍ଠୀଙ୍କୁ ଦିଆଯାଉନାହିଁ । 
ତେବେ ଉକ୍ରଟ ବେକାରୀ ଏବଂ ସମୟର ଅପଚୟ ଭଳି ପରିସ୍ଥିତି ଆଜି ଦେଶର ଯୁବଗୋଷ୍ଠୀଙ୍କୁ ମୋବାଇଲ୍ ମାଧ୍ୟମରେ ବିପଥଗାମୀ କରୁଛି କହିଲେ ଭୁଲ୍ ହେବ ନାହିଁ । ଉପଯୋଗୀତା ନଥାଇ କୌଣସି ଏକ ପଦାର୍ଥର ବ୍ୟବହାର ନିଶ୍ଚିତ ରୂପେ ଏକ ଚିନ୍ତାର କାରଣ । ଏ ଦୃଷ୍ଟିରୁ ଯୁବଗୋଷ୍ଠୀଙ୍କୁ ସତର୍କ କରାନଗଲେ ନୁ୍ୟଡ୍ କଲ୍ ଭଳି ଫାଶରେ ସେମାନେ ନିଜେ ନିଜେ ଫସି ଯାଉଛନ୍ତି । ମୋବାଇଲ୍ ଫୋନ୍ଟିଏ କିଣିବା ସମୟରେ ବାପାମାଆମାନେ ଏ ସମ୍ପର୍କରେ ପିଲାମାନଙ୍କୁ ସଚେତନ କରାଇବା ଯେତିକି ଆବଶ୍ୟକ, ସାଇବର୍ ଅପରାଧ ନିୟନ୍ତ୍ରଣ କରୁଥିବା ବିଭିନ୍ନ ସଂସ୍ଥା ମଧ୍ୟ ମୋବାଇଲ୍ ଫୋନ୍ ବ୍ୟବହାର କ୍ଷେତ୍ରରେ ଅପରାଧର ଏକ ତାଲିକା ମଝିରେ ମଝିରେ ପ୍ରକାଶ କରିବା ସେତିକି ଆବଶ୍ୟକ । ମୋବାଇଲ୍କୁ ନେଇ କେଉଁ କାମ ଗୁଡ଼ିକ ଅପରାଧ ସେ ସମ୍ପର୍କିତ ତାଲିମ୍ ଏବଂ ସଚେତନତା ଏ ପର୍ଯ୍ୟନ୍ତ ଆମ ଦେଶରେ ନାହିଁ କହିଲେ ଚଳେ । ତେଣୁ ଯୁବଗୋଷ୍ଠୀଙ୍କୁ ବିପଥଗାମୀ ହେବା ପୂର୍ବରୁ ସେମାନଙ୍କୁ ସତର୍କ କରାଇ ଦେବା ଭଳି ପଦକ୍ଷେପ ନିଆଯିବା ଜରୁରୀ । ବିଭିନ୍ନ ସମୟରେ ସାଇବର୍ ଥାନା ପକ୍ଷରୁ ନିଜ ଅନ୍ତରଙ୍ଗ ମୁହୂର୍ତ୍ତର ଫଟୋ ଏବଂ ବ୍ୟକ୍ତିଗତ ତଥ୍ୟକୁ ଗୋପନୀୟ ରଖିବା ପାଇଁ ପରାମର୍ଶ ଦିଆଯାଉଛି । କିନ୍ତୁ ଏଭଳି ପରାମର୍ଶକୁ ପ୍ରାୟତଃ ଯୁବଗୋଷ୍ଠୀ ଅଣଦେଖା କରୁଥିବା ଦେଖାଗଲାଣି । 
ଗତ ୬ ମାସ ମଧ୍ୟରେ ସୋସିଆଲ୍ ମିଡ଼ିଆରେ ଅନ୍ତରଙ୍ଗ ମୁହୂର୍ତ୍ତର ଫଟୋକୁ ନେଇ ଘଟୁଥିବା ଅପରାଧର ସଂଖ୍ୟା ବଢ଼ି ଚାଲିଥିବା ଜଣାପଡୁଛି । ୬ ମାସରେ ୪୦ଟି ଏହିଭଳି ଅଭିଯୋଗ ଆସିଛି । ତେଣୁ ଯୁବଗୋଷ୍ଠୀ ମୋବାଇଲ୍ ଫୋନ୍ର ବ୍ୟବହାର ଏବଂ ଅପବ୍ୟବହାର ମଧ୍ୟରେ ପାର୍ଥକ୍ୟ ଜାଣିବା ଜରୁରୀ ।