ସୁକମାରେ ଆଇଇଡି ବିସ୍ଫୋରଣ : ମହିଳା ଯବାନ ଆହତ
Henamanjaree Swain
ମାଲକାନଗିରି : ଛତିଶଗଡ଼ର ସୁକମା ଜିଲ୍ଲାରେ ଗୁରୁବାର ମାଓବାଦୀଙ୍କ ଦ୍ୱାରା ଲଗାଯାଇଥିବା ଏକ ପ୍ରେସର ଇମ୍ପ୍ରୋଭାଇଜଡ୍ ଏକ୍ସପ୍ଲୋସିଭ୍ ଡିଭାଇସ୍ (ଆଇଇଡି) ବିସ୍ଫୋରଣରେ ଜଣେ ମହିଳା କନଷ୍ଟେବଲ୍ ଆହତ ହୋଇଛନ୍ତି । ଘଟଣାଟି ଦିନ ପ୍ରାୟ ୧ ଟା ସମୟରେ ଜଙ୍ଗଲ ଭିତରେ ଥିବା ପାହାଡ଼ ଉପରେ ଘଟିଥିଲା । ରାଜ୍ୟ ପୁଲିସର ଉଭୟ ୟୁନିଟ୍ ଜିଲ୍ଲା ରିଜର୍ଭ ଗାର୍ଡ (ଡିଆରଜି) ଏବଂ ଜିଲ୍ଲା ବାହିନୀର ଏକ ଦଳ କେରାଲପାଲ ପୁଲିସ ଷ୍ଟେସନ ସୀମା ଅନ୍ତର୍ଗତ ନୂତନ ଭାବରେ ପ୍ରତିଷ୍ଠିତ ଗୋଗୁଣ୍ଡା ସୁରକ୍ଷା ଶିବିରରୁ ସର୍ଚ୍ଚ ଅପରେସନରେ ବାହାରି ଥିବା ବେଳେ ଏହି ବିସ୍ଫୋରଣ ଘଟିଛି । ଜିଲ୍ଲା ବାହିନୀର କନଷ୍ଟେବଲ୍ ମୁଚାକି ଦୁର୍ଗା ଅସାବଧାନତାବଶତଃ ପ୍ରେସର ଆଇଇଡି ସଂସ୍ପର୍ଶରେ ଆସି ବିସ୍ଫୋରଣ ଘଟାଇଥିଲେ । ଫଳରେ ତାଙ୍କ ବାମ ପାଦରେ ଆଘାତ ଲାଗିଛି । ପ୍ରାଥମିକ ଚିକିତ୍ସା ପରେ ଅଧିକ ଚିକିତ୍ସା ପାଇଁ ରାୟପୁରକୁ ବିମାନରେ ନିଆଯାଇଥିଲା । ତାଙ୍କ ଅବସ୍ଥା ବିପଦମୁକ୍ତ ବୋଲି କୁହାଯାଇଛି। ମାଓବାଦୀମାନେ ପ୍ରାୟତଃ ସୁକମା ସମେତ ସାତଟି ଜିଲ୍ଲାକୁ ନେଇ ଗଠିତ ବସ୍ତର ଅଞ୍ଚଳର ଆଭ୍ୟନ୍ତରୀଣ ପକେଟରେ ପାଟ୍ରୋଲିଂ ସମୟରେ ସୁରକ୍ଷା କର୍ମୀଙ୍କୁ ଟାର୍ଗେଟ କରିବା ପାଇଁ ଜଙ୍ଗଲରେ ରାସ୍ତା ଏବଂ ମାଟି ରାସ୍ତାରେ ଆଇଇଡି ଲଗାଇ ଥାନ୍ତି । ଅତୀତରେ ଏହି ଅଞ୍ଚଳର ସାଧାରଣ ଲୋକମାନେ ମଧ୍ୟ ଏପରି ଫାଶର ଶିକାର ହୋଇଛନ୍ତି ।
