୮ରୁ ୭ ବଦଳିଲେ; ଦଳଡିଆଁଙ୍କ ଉପରେ ବିଜେପିର ଭରସା

ବିଜେପି ପ୍ରାର୍ଥୀ ତାଲିକା
୮ରୁ ୭ ବଦଳିଲେ
ଦଳଡିଆଁଙ୍କ ଉପରେ ବିଜେପିର ଭରସା
ଚମ୍ପୁଆରୁ ପୁଣି ଲଢ଼ିବେ ମୁରଲୀ
ଆଉ ୭ ଆସନରେ ଝୁଲିଲା

ଭୁବନେଶ୍ୱର : ଭାରତୀୟ ଜନତା ପାର୍ଟି ପକ୍ଷରୁ ଆଜି ୮ ବିଧାନସଭା ଆସନ ପାଇଁ ପ୍ରାର୍ଥୀ ତାଲିକା ପ୍ରକାଶ ପାଇଛି  । ଚମ୍ପୁଆକୁ ଛାଡ଼ିଦେଲେ ବାକି ସବୁ ସ୍ଥାନରେ ଦଳ ପ୍ରାର୍ଥୀ ବଦଳାଇଛି  । ବିଶେଷକରି ଦଳଡିଆଁଙ୍କ ଉପରେ ଦଳ ବେଶୀ ଭରସା କରିଛି  । ଅଧିକାଂଶ ଆସନରେ ବିଜେଡ଼ିରୁ ଆସିଥିବା ନେତାଙ୍କୁ ଦଳ ଟିକେଟ ଦେଇଛି  । ସାଲେପୁର, କେନ୍ଦ୍ରାପଡ଼ା, ତେଲକୋଇ, ବାସୁଦେବପୁର, ହିନ୍ଦୋଳ, ଖୋର୍ଦ୍ଧା ଓ ବସ୍ତାରେ ଦଳ ପ୍ରାର୍ଥୀ ବଦଳାଇ ବିଜୟର ଅଙ୍କ କଷିଛି  । 

ଚମ୍ପୁଆରୁ ପୁଣିଥରେ ମୁରଲୀ ମନୋହର ଶର୍ମା ନିର୍ବାଚନ ଲଢ଼ିବେ  । ଅପରପକ୍ଷରେ ସାଲେପୁରରେ ଗତଥର ପ୍ରକାଶ ବେହେରା ବିଜେପି ପ୍ରାର୍ଥୀ ହୋଇଥିଲେ  । ହେଲେ ଏବେ ସେ ବିଜୁ ଜନତା ଦଳ ଟିକେଟରେ କଟକ-ବାରବାଟୀରୁ ନିର୍ବାଚନ ଲଢ଼ିବେ  । ସେହିସ୍ଥାନରେ ଅରିନ୍ଦମ ରାୟଙ୍କୁ ଦଳ ପ୍ରାର୍ଥୀ ଘୋଷଣା କରିଛି  । କେନ୍ଦ୍ରାପଡ଼ାରେ ଦଳ ଗୀତାଞ୍ଜଳୀ ସେଠୀଙ୍କ ଉପରେ ଭରସା କରିଛି  । ଗଣେଶ୍ୱର ବେହେରାଙ୍କୁ ବିଜେଡ଼ି ଟିକେଟ ଦେବାରୁ ସେ ଇସ୍ତଫା ଦେଇଥିଲେ  । ଗୀତାଞ୍ଜଳୀ କେନ୍ଦ୍ରାପଡ଼ା ଜିଲ୍ଲା ପରିଷଦ ଅଧ୍ୟକ୍ଷା ଅଛନ୍ତି  । ଯେତେବେଳେକି ବିଜେଡ଼ିରୁ ଯାଇ ସିପ୍ରା ମଲ୍ଳିକ କଂଗ୍ରେସ ଟିକେଟ ହାତେଇ ନେଇଛନ୍ତି  ।

ହିନ୍ଦୋଳରୁ ଟିକେଟ ନପାଇବାରୁୁ ବିଧାୟିକା ସୀମାରାଣୀ ନାୟକ ନିକଟରେ ବିଜେଡ଼ି ଛାଡ଼ିଥିଲେ  । ବିଜେଡ଼ି ଛାଡ଼ି ସେ ବିଜେପିରେ ଯୋଗଦେବା ସହ ଟିକେଟ ପାଇବାରେ ସଫଳ ହୋଇଛନ୍ତି  । ଖୋର୍ଦ୍ଧା ଟିକେଟକୁ ନେଇ ବିଜେପି କାର୍ଯ୍ୟାଳୟରେ ହଙ୍ଗାମା ହୋଇଥିଲା  । ୨୦୧୯ର ପ୍ରାର୍ଥୀ କାଳୁ ଖଣ୍ଡାୟତରାୟଙ୍କ ଗୋଷ୍ଠୀ ଝଡ଼ ସୃଷ୍ଟି କରିଥିଲେ  । ଯେଉଁଥିପାଇଁ ଏହି ଆସନକୁ ନେଇ ଦଳ ପ୍ରାର୍ଥୀ ଚୟନ କରିପାରିନଥିଲା  । କିନ୍ତୁ ପରିଶେଷରେ ପ୍ରଶାନ୍ତ ଜଗଦ୍ଦେବଙ୍କ ଉପରେ ଦଳ ଆସ୍ଥା ପ୍ରକଟ କରିଛି  । 

ତେଲକୋଇରୁ ଫକୀର ମୋହନ ନାଏକଙ୍କୁ ଦଳ ଟିକେଟ ଦେଇଥିବାବେଳେ ବାସୁଦେବପୁରରୁ ଲଢ଼ିବେ ବାଣୀକଲ୍ୟାଣ ମହାନ୍ତି  । ବାଣୀ ମଧ୍ୟ ବିଜେଡ଼ିରୁ ଯାଇ ବିଜେପିରେ ମିଶିଥିଲେ  । ଅପରପକ୍ଷରେ ବସ୍ତାରୁ ଗତଥର ରଘୁନାଥ ମହାନ୍ତି ନିର୍ବାଚନ ଲଢ଼ିଥିଲେ  । ତେବେ ସେ ବିଜେପି ଛାଡ଼ି ଏବେ ନୀରବରେ ବସିଛନ୍ତି  । ସେହି ସ୍ଥାନରେ ରବୀନ୍ଦ୍ର ଅଣ୍ଡିଆଙ୍କ ଉପରେ ଦଳ ଭରସା କରିଛି  ।