୨୦୧୯ରେ ଫେଲ୍ ମାରିଥିଲା ଓଡ଼ିଶା ଏକଜିଟ ପୋଲ
ExitPoll Odisha
Rasmita Behera
ନୂଆଦିଲ୍ଲୀ : ୨୦୧୯ରେ ଓଡ଼ିଶାକୁ ନେଇ ଜାତୀୟ ଗଣମାଧ୍ୟମ କରିଥିବା ଏକଜିଟ ପୋଲ୍ ଫେଲ ମାରିଥିଲା । ୨୦୨୪ରେ ମଧ୍ୟ ଏହି ପୋଲ ଫେଲ ହେବବୋଲି ବିଜେଡ଼ି ସୋସିଆଲ ମିଡ଼ିଆ ମୁଖ୍ୟ ସ୍ୱୟଂପ୍ରକାଶ ମହାପାତ୍ର କହିଛନ୍ତି । ସେ ନିଜ ଏକ୍ସରେ ୨୦୧୯ ଆକଳନର ଏକ ଫଟୋ ପୋଷ୍ଟ କରିଛନ୍ତି । ସେତେବେଳର ଆକଳନ ଅନୁଯାୟୀ, ଇଣ୍ଡିଆ ଟୁଡେ଼ ବିଜେପିକୁ ୧୫ରୁ ୧୯ ଏବଂ ବିଜେଡ଼ିକୁ ୨ରୁ ୬ ଆସନ ଦେଇଥିଲା । ଯେତେବେଳେକି ଟାଇମ୍ସ ନାଓ ଭିଏମଆର ବିଜେପିକୁ ୧୨, କଂଗ୍ରେସକୁ ୧ ଓ ବିଜେଡ଼ିକୁ ୮ ଆସନ ଦେଇଥିଲା । ଅପରପକ୍ଷରେ ଟୁଡେ଼ସ ଚାଣକ୍ୟ ନ୍ୟୁଜ ୨୪ର ଆକଳନ ଅନୁସାରେ ବିଜେପି ୧୪ ଓ ବିଜେଡ଼ି ୭ ଆସନ ପାଇବ ବୋଲି କୁହାଯାଇଥିଲା । କିନ୍ତୁ ବାସ୍ତବ ଚିତ୍ର ଭିନ୍ନ ଥିଲା । ନିର୍ବାଚନରେ ବିଜେଡ଼ିକୁ ୧୨, ବିଜେପିକୁ ୮ ଓ କଂଗ୍ରେସକୁ ଗୋଟିଏ ଆସନ ମିଳିଥିଲା ।
ଅପରପକ୍ଷରେ ବିଧାନସଭା ନେଇ ମଧ୍ୟ ଆକଳନ ହୋଇଥିଲା । କନକ ନ୍ୟୁଜ/ସମ୍ବାଦର ଆକଳନ ଅନୁସାରେ ବିଜେଡ଼ିକୁ ୮୫ରୁ ୯୫, ବିଜେପିକୁ ୨୫ରୁ ୩୪ ଓ କଂଗ୍ରେସକୁ ୧୨ରୁ ୧୫ ଆସନ ମିଳିବ ବୋଲି କୁହାଯାଇଥିଲା । ସେହିପରି ଇଣ୍ଡିଆ ଟୁଡେ଼ ଆକ୍ସିସ ଆଧାରରେ ବିଜେଡ଼ି ୮୯ରୁ ୧୦୫, ବିଜେପି ୨୯ରୁ ୪୩ ଓ କଂଗ୍ରେସ ୮ରୁ ୧୨ ଆସନ ମିଳିବ ବୋଲି ଆକଳନ କରାଯାଇଥିଲା । କିନ୍ତୁ ବିଧାନସଭା ନିର୍ବାଚନରେ ବିଜେଡ଼ିକୁ ୧୧୨, ବିଜେପିକୁ ୨୩, ସିପିଆଇକୁ ୧, ସ୍ୱାଧୀନ ୧ ଓ କଂଗ୍ରେସକୁ ୯ ଆସନ ମିଳିଥିଲା ।
