ପିଲାଙ୍କ ସାମ୍ନାରେ ଏହିସବୁ କଥା ହେବା ପୂର୍ବରୁ ଥରେ ଜାଣିରଖନ୍ତୁ
Rasmita Behera
ପିଲାମାନେ ଯେତେ ଯେତେ ବଡ଼ ହୁଅନ୍ତି, ସବୁ ଜିନିଷ ବିଷୟରେ ଜାଣିବାକୁ ତାଙ୍କର ସେତିକି ଅଧିକ ଇଚ୍ଛା ଜାଗ୍ରତ ହୁଏ। ବେଳେବେଳେ ପିଲାମାନେ କିଛି କିଛି ଜିନିଷକୁ ଠିକ୍ ଭାବେ ବୁଝି ନ ପାରି ଅଲଗା ଅର୍ଥ ବାହା କରି ଦିଅନ୍ତି। ଏଭଳି ସ୍ଥିତିରେ ବାପା-ମା’ଙ୍କର ଦାୟିତ୍ୱ ହେଉଛି ସେମାନେ ପିଲାକୁ ଠିକ୍ କ’ଣ ଭୁଲ କ’ଣ ତାହା ଜଣାଇବେ। ଯଦି ଆପଣ ବି ଚାହୁଁଛନ୍ତି ଯେ ପିଲା ଠିକ୍ ବାଟରେ ଯାଉ ତେବେ ପିଲାକୁ କିଛିଟା କଥା ଭୁଲରେ ବି କୁହନ୍ତୁ ନାହିଁ। ତେବେ ଆସନ୍ତୁ ଜାଣିବା ସେ କଥା କ’ଣ, ଯାହା ପିଲାଙ୍କୁ କହିବା ଉଚିତ୍ ନୁହେଁ…
ପିଲାଙ୍କ ସାମ୍ନାରେ କାହା ବିରୋଧରେ କିଛି କୁହନ୍ତୁ ନାହିଁ: ବେଳେ ଲୋକମାନେ ରାଗରେ ଆସି ପିଲାଙ୍କ ସାମ୍ନାରେ ଅନ୍ୟ ବିରୁଦ୍ଧରେ ଗପିଥାନ୍ତି। କିନ୍ତୁ ଶିଶୁ ମନୋବିଜ୍ଞାନୀଙ୍କ କହିବାନୁସାରେ, ପିଲାଙ୍କ ସାମ୍ନାରେ ଅନ୍ୟ ବିଷୟରେ କିଛି ଖରାପ କହିବା ଉଚିତ୍ ନୁହେଁ। କାରଣ ସେମାନେ ପିଲା ଥିବାରୁ ଠିକ୍ ଭୁଲ ଭିତରେ ଫରକ୍ ବୁଝି ପାରିନଥାନ୍ତି। ଯଦି କମ୍ ବୟସରୁ ହିଁ ଆପଣ ଜଣଙ୍କ ବିଷୟରେ ତାଙ୍କୁ କିଛି ଖରାପ କଥା କହିବେ ତେବେ ସେ ସାରା ଜୀବନ ତାଙ୍କୁ ଖରାପ ଭାବି ପାରନ୍ତି। ଏଥିସହ ଅନ୍ୟ ଲୋକଙ୍କୁ ନେଇ ମଧ୍ୟ ତାଙ୍କ ଚିନ୍ତା ଧାରା ବଦଳିଯାଇପାରେ।
ଦାୟିତ୍ୱକୁ ନେଇ ଭୟ: ପିଲାଙ୍କ ସହ କଥା ହେବା ବେଳେ କେବେ ବି ଟଙ୍କା କଥା କୁହନ୍ତୁ ନାହିଁ। ଏହା ତାଙ୍କ ମାନସିକତା ଉପରେ ପ୍ରଭାବ ପକାଇପାରେ। ବାପା- ମା’ ଟଙ୍କା ପଇସାରେ ଟେନ୍ସନ୍ ଥିବା ନେଇ ପିଲା ସାମ୍ନାରେ କହିଲେ ପିଲାଙ୍କ ମନରେ ବି ଏ ନେଇ ଭୟ ଓ ଚିନ୍ତା ସୃଷ୍ଟି ହୋଇଥାଏ। ବେଳେ ବେଳେ ଏହା ପିଲାଙ୍କ ଉପରେ ବୋଝ ସଦୃଶ ହୋଇଯାଏ, ଯାହାକୁ ପିଲାମାନେ ଠିକ୍ ଭାବେ ବୁଝି ପାରିନଥାନ୍ତି। ଏହା ପରେ ତାଙ୍କ ପାଇଁ ସମସ୍ୟା ସୃଷ୍ଟି କରେ।
ଆଉ କାହା ସହ ତୁଳନା କରିବା: କେବେ ବି ନିଜ ଛୁଆକୁ ଅନ୍ୟ ପିଲା ସହ ତୁଳନା କରନ୍ତୁ ନାହିଁ। ତା’ ଆଗରେ କେବେ ବି କୁହନ୍ତୁନି ଯେ ସେ ପିଲା ଏମିତି। ସେ ଭଲ, ତୁ ଭଲ ନୁହେଁ। ଏସବୁ କଥା ପିଲାର ମାନସିକତାକୁ ପ୍ରଭାବିତ କରେ। ଫଳରେ ପିଲା ଡିପ୍ରେସନ୍ ଭିତରକୁ ଚାଲିଯାଏ।
