ଆତଙ୍କବାଦ ନିରୋଧୀ କମିଟିରେ ପାକିସ୍ତାନ ଉପାଧ୍ୟକ୍ଷ
Rasmita Behera
ନୂଆଦିଲ୍ଲୀ : ଜାତିସଂଘର ଆତଙ୍କବାଦ ନିରୋଧୀ କମିଟିରେ ପାକିସ୍ତାନ ଉପାଧ୍ୟକ୍ଷ ହୋଇଛି । ଆତଙ୍କୀସ୍ତାନ ଭାବେ ପରିଚିତ ପାକିସ୍ତାନକୁ ଏଭଳି ଦାୟିତ୍ୱ ଦିଆଯିବା ଘଟଣା ସାରା ବିଶ୍ୱରେ ଚର୍ଚ୍ଚା ସୃଷ୍ଟି କରିଛି । ଅପରପକ୍ଷରେ ଜାତିସଂଘ ସୁରକ୍ଷା ପରିଷଦର ୧୯୮୮ ତାଲିବାନ କମିଟିରେ ପାକିସ୍ତାନକୁ ଅଧ୍ୟକ୍ଷ କରାଯାଇଛି । ସେହି କମିଟିରେ ଋଷିଆ ଓ ଗୁଏନାକୁ ଉପାଧ୍ୟକ୍ଷ କରାଯାଇଛି । ଏତଦବ୍ୟତୀତ ୧୨୬୭ ଆଇଏସଆଇଏଲ ଓ ଅଲକାଏଦା ଅନୁଦାନ କମିଟିର ନେତୃତ୍ୱ ନେବ ଡେନମାର୍କ । ଯେଉଁଥିରେ ଋଷିଆ ଓ ସିଏରା ଲିଓନ ମଧ୍ୟ ରହିଛନ୍ତି । ସୁରକ୍ଷା ପରିଷଦର ୧୫ ସଭ୍ୟ ମଧ୍ୟ ବିଭିନ୍ନ କମିଟିରେ ଅଛନ୍ତି । ୨୦୨୫-୨୬ ପାଇଁ ପାକିସ୍ତାନକୁ ସୁରକ୍ଷା ପରିଷଦରେ ଅସ୍ଥାୟୀ ସଭ୍ୟ ଭାବେ ଗ୍ରହଣ କରାଯାଇଛି । ୨୦୨୨ରେ ଆତଙ୍କ ନିରୋଧୀ କମିଟିର ଅଧ୍ୟକ୍ଷତା କରୁଥିଲା ଭାରତ । ପାକକୁ ଏହି କମିଟିରେ ନିଆଯିବା ଘଟଣାକୁ ବାରବାର ଭାରତ ବିରୋଧ କରି ଆସୁଛି । ଜାତିସଂଘ ଦ୍ୱାରା ଅବୈଧ ଘୋଷିତ ଅନେକ ଆତଙ୍କବାଦୀ ପାକିସ୍ତାନରେ ରହୁଛନ୍ତି । ପାକରେ ଓସମା ବିନ୍ ଲାଡ଼େନ ରହିବା ଓ ଆମେରିକା ଦ୍ୱାରା ହତ୍ୟା ହେବା ଘଟଣା ମଧ୍ୟ ଏହାର ଅନ୍ୟତମ ପ୍ରମାଣ ।
