୨୦୨୭ ମାର୍ଚ୍ଚ ୧ରୁ ଜନଗଣନା
Rasmita Behera
ନୂଆଦିଲ୍ଲୀ : ୨୦୨୭ ମାର୍ଚ୍ଚ ୧ରୁ ସାରା ଦେଶରେ ଜନଗଣନା ଆରମ୍ଭ ହେବ । ତେବେ ଜାମ୍ମୁକାଶ୍ମୀର, ଲଦାଖ ଓ ଉତ୍ତରାଖଣ୍ଡରେ ଅକ୍ଟୋବର ୨୦୨୬ରୁ ଜନଗଣନା ଆରମ୍ଭ ହେବାର ସମ୍ଭାବନା ରହିଛି । କେନ୍ଦ୍ର ସରକାର ଏମିତି ହିଁ ଯୋଜନା କରିଛନ୍ତି । ଆଗାମୀ ଜନଗଣନାରେ ଜାତିଗତ ଜନଗଣନା ବି କରିବାକୁ ପୂର୍ବରୁ ସରକାର ନିଷ୍ପତ୍ତି ନେଇସାରିଛନ୍ତି ।
ଗତ ସପ୍ତାହରେ ରାଜନୈତିକ ବ୍ୟାପାର କମିଟି ବୈଠକ ପରେ କେନ୍ଦ୍ରମନ୍ତ୍ରୀ ଅଶ୍ୱିନୀ ବୈଷ୍ଣବ ଜାତିଗତ ଜନଗଣନା ନେଇ ସରକାରଙ୍କ ନିଷ୍ପତ୍ତି ସଂକ୍ରାନ୍ତରେ ସୂଚନା ଦେଇଥିଲେ । ସାଧାରଣତଃ ପ୍ରତି ଦଶ ବର୍ଷରେ ଥରେ ଜନଗଣନା ହୋଇଥାଏ । ତେଣୁ ୨୦୨୧ରେ ଜନଗଣନା ହେବା କଥା । ତେବେ କରୋନା ପାଇଁ ଜନଗଣନା ହୋଇପାରିନଥିଲା । ନୂତନ ଜନଗଣନା ତଥ୍ୟ ଆସିବା ପରେ ଲୋକସଭା ଓ ବିଧାନସଭାର ସୀମା ପୁନଃ ନିର୍ଦ୍ଧାରଣର ସମ୍ଭାବନା ରହିଛି । ୨୦୨୯ ସାଧାରଣ ନିର୍ବାଚନରେ ମହିଳାମାନଙ୍କୁ ୩୩% ସଂରକ୍ଷଣ ଦେବା ପାଇଁ ଯୋଜନା କରାଯାଉଛି । ଏନେଇ ବିଲ୍ ମଧ୍ୟ ପାଶ୍ ହୋଇସାରିଛି । ୨୦୨୬ରେ ଲୋକସଭା ଓ ବିଧାନସଭାର ଆସନ ସଂଖ୍ୟା ଓ ସଂରକ୍ଷଣର ଅବଧି ଶେଷ ହେଉଛି । ଅପରପକ୍ଷରେ ଜନସଂଖ୍ୟା ଆଧାରରେ ଆସନ ସଂଖ୍ୟା କମ୍ ବେଶୀ କରିବା ଚର୍ଚ୍ଚାକୁ ଦକ୍ଷିଣ ଭାରତୀୟ ରାଜ୍ୟଗୁଡ଼ିକ ବିରୋଧ କରୁଛନ୍ତି । କାହିଁକିନା ଦକ୍ଷିଣ ଭାରତର ଜନସଂଖ୍ୟା ଅଭିବୃଦ୍ଧି କମ୍ ଥିବାବେଳେ ଉତ୍ତର ଭାରତରେ ତାହା ଅଧିକ ରହିଛି । ରାଜନୀତିକ ପତିଆରା ହ୍ରାସ ଡରରେ ଦକ୍ଷିଣ ଭାରତୀୟ ରାଜ୍ୟଗୁଡ଼ିକ ଏକାଠି ହୋଇ ପ୍ରତିବାଦ ଜଣାଇ ସାରିଛନ୍ତି । ସେହିପରି ନୂଆ ସଂସଦ ଭବନ ୮୮୮ ସାଂସଦଙ୍କୁ ଆଖିଆଗରେ ରଖି କରାଯାଇଥିବାବେଳେ ମୋଦି ସରକାର ନିଶ୍ଚିତ ଭାବେ ଏହା କରି ଦେଖାଇବେ ବୋଲି ଚର୍ଚ୍ଚା ହେବା ସ୍ୱାଭାବିକ ।
