ରୁଷରେ ପୁଣି ଭୂକମ୍ପ : କ୍ରାସେନିନିକୋଭ ଆଗ୍ନେୟଗିରିରୁ ଉଦଗୀରଣ
Rasmita Behera
ନୂଆଦିଲ୍ଲୀ : ରୁଷରେ ପୁଣି ଭୂକମ୍ପ ଝଟକା । ରୁଷିଆର ଦୂର ପୂର୍ବରେ କାମଚାଟକା ଉପଦ୍ୱୀପ ନିକଟରେ ଥିବା କୁରିଲ ଦ୍ୱୀପପୁଞ୍ଜରେ ୬.୮ ତୀବ୍ରତାର ଏକ ଭୂମିକମ୍ପ ଅନୁଭୂତ ହୋଇଛି । ଭୂମିକମ୍ପର କେନ୍ଦ୍ରସ୍ଥଳ ରୁଷିଆର ସେଭେରୋ-କୁରିଲ’ସ୍କରୁ ପ୍ରାୟ ୧୧୮ କିଲୋମିଟର ପୂର୍ବରେ କୁରିଲ ଦ୍ୱୀପପୁଞ୍ଜ ଅଞ୍ଚଳରେ ଅବସ୍ଥିତ । ଏହି ଭୂକମ୍ପ ଫଳରେ ରାତି ତମାମ କାମଚାଟକାରେ ଥିବା କ୍ରାସେନିନିକୋଭ ଆଗ୍ନେୟଗିିରି ୬୦୦ ବର୍ଷ ପରେ ପ୍ରଥମ ଥର ପାଇଁ ଉଦଗୀରଣ ହୋଇଥିଲା । ରୁଷିଆର ଆରଆଇଏ ରାଜ୍ୟ ସମାଚାର ଏଜେନ୍ସି ଓ ବୈଜ୍ଞାନିକମାନେ ରବିବାର ଏନେଇ ରିପୋର୍ଟ କରିଛନ୍ତି । ସପ୍ତାହର ପ୍ରାରମ୍ଭରେ ଉପଦ୍ୱୀପପୁଞ୍ଜକୁ ଥରାଇ ଦେଇଥିବା ୮.୮ ତୀବ୍ରତାର ଏକ ବିଶାଳ ଭୂମିକମ୍ପ ଯୋଗୁଁ ଏହି ଉଦଗୀରଣକୁ ଯୋଡାଯାଉଛି ।
ଏହି ଭୂମିକମ୍ପ କୁରିଲ-କାମଚାଟକା ସବଡକ୍ସନ ଜୋନ୍ ସହିତ ତୀବ୍ର ଭୂକମ୍ପୀୟ କାର୍ଯ୍ୟକଳାପର ଏକ ଅଂଶ । ଯେଉଁଠାରେ ପ୍ରଶାନ୍ତ ମହାସାଗରୀୟ ପ୍ଲେଟ୍ ପ୍ରତିବର୍ଷ ପ୍ରାୟ ୭୭-୮୬ ମିମିରେ ଓଖୋଟସ୍କ ମାଇକ୍ରୋପ୍ଲେଟ୍ (ଉତ୍ତର ଆମେରିକୀୟ ପ୍ଲେଟ୍ କମ୍ପ୍ଲେକ୍ସର ଅଂଶ) ତଳେ ବୁଡ଼ିଯାଏ । ଏହି କ୍ଷେତ୍ର ବିଶ୍ୱର ସବୁଠାରୁ ଭୂକମ୍ପୀୟ ଭାବରେ ସକ୍ରିୟ ସବଡକ୍ସନ ଟ୍ରେଞ୍ଚ ମଧ୍ୟରୁ ଗୋଟିଏ, ଯାହା ପ୍ରଶାନ୍ତ ମହାସାଗରୀୟ "ଅଗ୍ନି ବଳୟ’ ମଧ୍ୟରେ ଅବସ୍ଥିତ ।
