ଶ୍ରୀଲଙ୍କାରେ ‘ଡିଟୱା’ ତାଣ୍ଡବ : ୫୬ ମୃତ
Henamanjaree Swain
- ୩୦ରେ ତାମିଲନାଡୁ ଛୁଇଁବ
- ମୋଦିଙ୍କ ଶୋକ, ଦେଲେ ସହାୟତା
ନୂଆଦିଲ୍ଲୀ : ବାତ୍ୟା ଡିଟୱା ଆଜି ସକାଳେ ଶ୍ରୀଲଙ୍କାରେ ସ୍ଥଳଭାଗ ଛୁଇଁବା ସହ ତାଣ୍ଡବ ରଚିଛି । ଫଳରେ ସେଠାରେ ବ୍ୟାପକ କ୍ଷୟକ୍ଷତି ଘଟିଛି । ଭାରତ ପାଣିପାଗ ବିଭାଗ (ଆଇଏମଡି) କହିଛି ଯେ ବାତ୍ୟା ଡିଟୱା ଶ୍ରୀଲଙ୍କାରେ ସ୍ଥଳଭାଗ ଛୁଇଁବା ପରେ ତାମିଲନାଡୁ, ପୁଡୁଚେରୀ ଓ ଦକ୍ଷିଣ ଆନ୍ଧ୍ରପ୍ରଦେଶ ଉପକୂଳ ଆଡକୁ ଗତି କରୁଛି ଓ ଆସନ୍ତା ୩୦ ରେ ସ୍ଥଳଭାଗ ଛୁଇଁବ ବୋଲି ଆଶା କରାଯାଉଛି । ଏହି ବାତ୍ୟା ଶ୍ରୀଲଙ୍କାର ପୋଟୁଭିଲ୍ ନିକଟରେ ଦକ୍ଷିଣ-ପଶ୍ଚିମ ବଙ୍ଗୋପସାଗର ଉପରେ ଉତ୍ପତ୍ତି ହୋଇଥିଲା ଓ ଉତ୍ତର-ଉତ୍ତରପଶ୍ଚିମ ଦିଗରେ ଗତି କରୁଛି । ଡିଟୱା ଶୁକ୍ରବାର ସକାଳେ ଶ୍ରୀଲଙ୍କାର ପୂର୍ବ ଉପକୂଳରେ ସ୍ଥଳଭାଗ ଛୁଇଁଥିଲା ଓ ଉତ୍ତର-ପଶ୍ଚିମ ଦିଗରେ ଗତି କରିଥିଲା । ଯାହା ଫଳରେ ବ୍ୟାପକ କ୍ଷତି ହୋଇଥିଲା ଏବଂ ଏଥିରେ ୫୬ ଜଣଙ୍କର ମୃତ୍ୟୁ ହୋଇଛି । ଅନେକ ସ୍ଥାନରେ ଗଛ ଭାଙ୍ଗି ପଡିବା ସହ ବିଦ୍ୟୁତ ଖୁଣ୍ଟ ଉପୁଡି ପଡିଛି । ଘର ଭାଙ୍ଗି ଯାଇଛି । ବହୁ ଅଞ୍ଚଳରେ ବନ୍ୟା ଦେଖାଯାଇଛି । ରାସ୍ତାଘାଟ ନଷ୍ଟ ହୋଇଯାଇଛି । ସରକାର ସ୍କୁଲ କଲେଜ ଛୁଟି କରି ଦେଇଛନ୍ତି । ଏହାକୁ ବର୍ତ୍ତମାନ ଏକ ଘୂର୍ଣ୍ଣିବାତ୍ୟା ଭାବରେ ବର୍ଗୀକୃତ କରାଯାଇଛି, ଯାହା ଏକ ଭୟଙ୍କର ଘୂର୍ଣ୍ଣିବାତ୍ୟାରେ ପରିଣତ ହେବାର କୌଣସି ପୂର୍ବାନୁମାନ ନାହିଁ । ତାମିଲନାଡୁ ଚାରୋଟି ଜିଲ୍ଲା ପାଇଁ ରେଡ୍ ଆଲର୍ଟ ଏବଂ ପାଞ୍ଚଟି ଜିଲ୍ଲା ପାଇଁ ଅରେଞ୍ଜ ଆଲର୍ଟ ଜାରି କରିଛି ।
ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ବାତ୍ୟା ଡିଟୱାରେ ପ୍ରାଣହାନି ପରେ ଶ୍ରୀଲଙ୍କାର ଜନସାଧାରଣଙ୍କ ପ୍ରତି ଗଭୀର ସମବେଦନା ପ୍ରକାଶ କରି ଟ୍ୱିଟ୍ କରି କହିଛନ୍ତି ଯେ ସେ ସମସ୍ତ ପ୍ରଭାବିତ ପରିବାରର ସୁରକ୍ଷା ଏବଂ ଶୀଘ୍ର ଆରୋଗ୍ୟ ପାଇଁ ପ୍ରାର୍ଥନା କରୁଛନ୍ତି । ଭାରତର ନିକଟତମ ସାମୁଦ୍ରିକ ପଡୋଶୀଙ୍କ ସହ ଏକତାକୁ ପୁନଃସ୍ଥାପନ କରି ସେ ଘୋଷଣା କରିଛନ୍ତି ଯେ ନୂଆଦିଲ୍ଲୀ ଅପରେସନ ସାଗର ବନ୍ଧୁ ଅଧୀନରେ ତୁରନ୍ତ ରିଲିଫ୍ ସାମଗ୍ରୀ ଏବଂ ପ୍ରମୁଖ ଏଚଏଡିଆର ସହାୟତା ପଠାଇଛି, ଆବଶ୍ୟକ ହେଲେ ଭାରତ ଆହୁରି ସହାୟତା ଯୋଗାଇବାକୁ ପ୍ରସ୍ତୁତ ଅଛି ।
