ରଥଖଳା
Rasmita Behera
ବୀଣାପାଣି ସାହୁ
ଜଗା ଦରଶନ କରିବି ବୋଲିରେ
ଆସିଅଛି ଶିରି କ୍ଷେତ୍ର
ରଥଖଳା ତାର ଦେଖିବା ମାତ୍ରକେ
ବେନି ନୟନ ପବିତ୍ର ।
ସେ ରଥକାଠର ପ୍ରତି କୋଣେ କୋଣେ
ଦେଖୁଛି ତା ପ୍ରତିଛବି
ମହାରଣା କୂଳ କଳାକାର ଗଣ
ଗଢନ୍ତି ଆନନ୍ଦ ଲଭି ।
ରଥ ଅନୁକୂଳ ଅକ୍ଷୟ ତୃତୀୟା
ମନ ଉଲ୍ଲାସରେ ଭରେ
ମୋ ଜଗା କାଳିଆ ଦରଶନ ଦେବ
ଚଢି ତା ନନ୍ଦିଘୋଷରେ ।
ଧଉରା କାଠରେ ଗଢା ହୁଏ ରଥ
ହୋଇଣ ଧୋତ ସୋଧନ
ପ୍ରଭୁଙ୍କୁ ସ୍ମରିଣ ଶିଳ୍ପୀକାରଗଣ
ହାତେ ଧରି ତାଙ୍କ ନିହଣ ।
ବସନ୍ତ ପଞ୍ଚମୀ ଆସିଥାଏ କାଠ
ରାମ ନବମୀରେ ଚିରା
ଭାବଭକତିରେ ଅତି ଶରଧାରେ
ବିଧହୁଏ ଯେ ଗର୍ଗରା ।
ରଥଖଳା ପର୍ବ ଲାଗିଇ ଅପୂର୍ବ
ସେବକ ଦ୍ୱାରା ପ୍ରସ୍ତୁତ
ରଥର ଗୋଜରେ ଖୋଦେଇ କରନ୍ତି
ରୂପକାର ସେବାୟତ ।
ମହାରଣା କୂଳ କାରିଗର ଗଣ
ଅଣ୍ଟାରେ ଗାମୁଛା ଭିଡ଼ି
ଭଉଁରୀ ତିଥିର ମହତ୍ତ୍ୱ ପ୍ରତିତ
ଚକା ଅଖ ଦେଲେ ଯୋଡ଼ି ।
ଦେଖି ଚାରୁଚିତ୍ର ଲାଗଇ ବିଚିତ୍ର
ଉକôର୍ଷ କଳା କୀରତି
ହୋମ ଯାଗଯଜ୍ଞ ମନ୍ତ ଆହୁତିରେ
ଚତୁର୍ଦ୍ଦିଗ କମ୍ପୁଥାନ୍ତି ।
ମହାରଣା ଜାତି ରଥ ଗଢିଥାନ୍ତି
ଚିତ୍ରକାର ଚିତ୍ର ଝୋଟି
ରୂପକାର ଗଣ ମୂରତି ଗଢନ୍ତି
ଲୋହକାର କଣ୍ଟା ପିଟି ।
ଚତୁର୍ଦ୍ଧା ମୂରତି ପଠାଇ ଦିଅନ୍ତି
ନିଜ ନିଜ ଆଜ୍ଞାମାଳ
ପୂଜା ପଣ୍ଡାଗଣ ସ୍ୱହସ୍ତେ ଧରିଣ
କରିଥାନ୍ତି ଅନୁକୂଳ ।
ଝାଞ୍ଜଘଣ୍ଟା ଖୋଳ ମୃଦଙ୍ଗର ତାଳ
ହରିବୋଲ ଶବଦରେ
ଆକାଶରୁ ସତେ ଓହ୍ଲାଇ ଆସନ୍ତି
ଦେବାଦେବୀ ସହିତରେ ।
ଷୋହଳ ଚକରେ ଗଢା ନନ୍ଦିଘୋଷ
ଚଉଦରେ ତାଳଧ୍ୱଜ
ବାରଚକ ଲାଗି ଦେବଦଳନ ଯେ
ହେଲେଣି ତ ସଜବାଜ ।
ଆଷାଢ଼ ଶୁକ୍ଳ ଦ୍ୱିତୀୟା ତିଥିରେ
ରଥଯାତ୍ରା ଅନୁଷ୍ଠିତ
ରଥ ପରେ ବସି ମାଉସୀ ଘରକୁ
ଗଡିଯିବ ତିନି ରଥ ।
ଜୟ ଜଗନ୍ନାଥ ।
ଶିକ୍ଷୟିତ୍ରୀ
ସହ ସଂପାଦିକା ବର୍ଣ୍ଣାଳୀ ସାହିତ୍ୟ ସଂସଦ, ତାଳଚେର
ମୋ: ୭୬୦୯୦୬୫୧୩୩
