ଯାଜପୁରରେ ବବି ଓ ଡାନି ଶୀତଳଯୁଦ୍ଧ
Pritiranjan Ghadei
Ramachandi Prasad
ଭୁବନେଶ୍ୱର : ପୁରୁଣା ରାଗ ଏବେ ଶୁଝେଇବାରେ ଲାଗିଛନ୍ତି ବିଜେଡ଼ି ନେତା । ଚବିଶ ନିର୍ବାଚନରେ ଦଳ ମାଟି କାମୁଡ଼ିବା ପରେ ଯାଜପୁରରେ ଏବେ ଆରମ୍ଭ ହୋଇଯାଇଛି ଶୀତଳ ଯୁଦ୍ଧ । ଏକଦା ଯାଜପୁରରେ ଅଶୋକ ଦାସ ଓ ପ୍ରଫୁଲ୍ଲ ଘଡେ଼ଇଙ୍କ ମଧ୍ୟରେ ଜୋରଦାର ଲଢେ଼ଇ ହେଉଥିଲା । ଗୋଟିଏ ଦଳରେ ଥିଲେବି ସେମାନଙ୍କ ଭିତରେ ଚାଲିଥିଲା ପତିଆରା ଲଢେ଼ଇ । ଏବେ କିନ୍ତୁ ଅଶୋକଙ୍କ ପୁଅ ବବି ଦାସ ଓ ପ୍ରଫୁଲ୍ଳଙ୍କ ପୁଅ ପ୍ରୀତିଙ୍କ ମଧ୍ୟରେ ଲଢେ଼ଇ ଚାଲିଛି । ପ୍ୟାରୀ ବିଜୁ ଜନତା ଦଳର ସର୍ବେସର୍ବା ଥିବାବେଳେ ପ୍ରଫୁଲ୍ଲ ଘଡେ଼ଇଙ୍କର ବେଶ୍ ପତିଆରା ରହିଥିଲା । ସେତେବେଳେ ବାପ ପୁଅ ଟିକେଟ ପାଇଥିଲେ । ପ୍ୟାରୀ ବିଜେଡ଼ି ରାଜନୀତିରୁ ଅପସରି ଯିବା ପରେ ବବିଙ୍କ ପାୱାର ବଢ଼ିବଢ଼ି ଚାଲିଥିଲା । ଏମିତିକି ବିଜେଡ଼ିରେ ସେ ହୋଇଯାଇଥିଲେ ନମ୍ବର ଟୁ । ଯାଜପୁର ରାଜନୀତିକୁ ନିଜ ହାତମୁଠାରେ ରଖିବା ପାଇଁ ବବି ଗୋଟିଚାଳନା କରି ସଫଳ ହୋଇଥିଲେ । ସେତେବେଳେ ଡାନି ଘଡେ଼ଇ ଚୁପ୍ ରହିବାକୁ ବାଧ୍ୟ ହୋଇଥିଲେ । କିନ୍ତୁ ଚବିଶ ନିର୍ବାଚନ ପରେ ସବୁ ଅଙ୍କ ବଦଳିଯାଇଛି । ସୁକିନ୍ଦାରେ ଡାନି ହାରି ଯାଇଥିବାବେଳେ କୋରେଇରେ ବବିଙ୍କ ବୋଉ ପରାସ୍ତ ହୋଇଛନ୍ତି । ଉଭୟ ବବି ଓ ଡାନି ପରସ୍ପରକୁ ହରାଇବା ପାଇଁ ଲାଗି ପଡିଥିଲେ ବୋଲି ଚର୍ଚ୍ଚା ହେଉଥିଲା । ଯେଉଁଥିପାଇଁ ବବି ଓ ଡାନି ବିବାଦ ବଢ଼ିଯାଇଛି । ନିକଟରେ ବବି ଦାସଙ୍କ ନେତୃତ୍ୱରେ ବିଜେଡ଼ିର ଏକ ରୁଦ୍ଧଦ୍ୱାର ବୈଠକ ହୋଇଥିଲା । ବୈଠକରେ ବିଞ୍ଝାରପୁର ବିଧାୟକ ପ୍ରମିଳା ମଲ୍ଲିକ, ପ୍ରଣବ ବଳବନ୍ତରାୟ, ଯାଜପୁର ବିଧାୟିକା ସୁଜାତା ସାହୁ, ବରି ବିଧାୟକ ବିଶ୍ୱରଞ୍ଜନ ମଲ୍ଲିକ ପ୍ରମୁଖ ଉପସ୍ଥିତ ଥିଲେ । କିନ୍ତୁ ଏହି ବୈଠକରେ ଭେଟେରାନ୍ ନେତା ଅମର ପ୍ରସାଦ ଶତପଥି, ପ୍ରୀତି ଘଡେ଼ଇ, ଅଶୋକ ବଳ ଓ ସୁନନ୍ଦା ଦାସଙ୍କର ଦେଖା ମିଳିନଥିଲା । ଅମର, ଅଶୋକ ଓ ସୁନନ୍ଦାଙ୍କ ଟିକେଟ କାଟିବାରେ ବବିଙ୍କର ହିଁ ବଡ଼ ଭୂମିକା ରହିଥିଲା । ତେଣୁ ବବିଙ୍କ ବିରୋଧରେ ବି କିଛି ନେତା ମେଳି ବାନ୍ଧିଛନ୍ତି । ଯାଜପୁରରେ ବିଜେପି କାୟା ବିସ୍ତାର କରୁଥିବାବେଳେ ବିଜେଡ଼ିର ଏହି ଗୋଷ୍ଠୀକନ୍ଦଳ ଦଳୀୟ କର୍ମୀମାନଙ୍କୁ ନିରାଶ କରିଦେଇଛି ।
