Sahkar Taxi Service ଆରମ୍ଭ : ଅମିତ ଶାହା

 ବଡ଼ ଘୋଷଣା କରିଛନ୍ତି କେନ୍ଦ୍ର ସରକାର । ଖୁବ୍‌ଶୀଘ୍ର କୋଅପରେଟିଭ୍‌ ଟ୍ୟାକ୍ସି ସେବା ‘ସହକାର ଟ୍ୟାକ୍ସି’  ଆରମ୍ଭ ହେବ ବୋଲି ଅମିତ ଶାହା କହିଛନ୍ତି। ଏହାର ଉଦ୍ଦେଶ୍ୟ ହେଉଛି ବାଇକ, କ୍ୟାବ ଏବଂ ଅଟୋ ସେବା ପ୍ରଦାନ କରିବା। ଏହି ଟ୍ୟାକ୍ସି ସେବାର ଶୁଭାରମ୍ଭ Ola, Uberଏବଂ Rapido ଭଳି ଅନଲାଇନ ଟ୍ୟାକ୍ସି ବଜାରରେ ଉପସ୍ଥିତ କମ୍ପାନୀଗୁଡ଼ିକୁ ଚ୍ୟାଲେଞ୍ଜ କରିବ। ସ୍ବରାଷ୍ଟ୍ର ମନ୍ତ୍ରୀ ଅମିତ ଶାହ ଏହି ଯୋଜନା ଘୋଷଣା କରି କହିଛନ୍ତି,ଏହି ସେବାର ଲାଭ କୌଣସି ବଡ଼ ଶିଳ୍ପପତିଙ୍କୁ ଯିବ ନାହିଁ, ବରଂ ଡ୍ରାଇଭରମାନଙ୍କୁ ମିଳିବ। କେନ୍ଦ୍ର ସରକାରଙ୍କ ଏହି ପଦକ୍ଷେପର ଉଦ୍ଦେଶ୍ୟ ହେଉଛି ଏକ ବିକଳ୍ପ ପରିବହନ ସେବା ଯୋଗାଇବା, ଯେଉଁଠାରେ ଡ୍ରାଇଭରମାନେ ବଡ଼ କମ୍ପାନୀଗୁଡ଼ିକୁ କୌଣସି ଲାଭ ନ ଦେଇ ଟଙ୍କା ରୋଜଗାର କରିପାରିବେ। ସଂସଦରେ ଏହି ପଦକ୍ଷେପ ଘୋଷଣା କରି ଶାହା କହିଛନ୍ତି, ସହକାର ଟ୍ୟାକ୍ସି ସେବା ସାରା ଦେଶରେ ଦୁଇ ଚକିଆ ଟ୍ୟାକ୍ସି, ଅଟୋ-ରିକ୍ସା ଏବଂ ଚାରି ଚକିଆ ଟ୍ୟାକ୍ସି ପଞ୍ଜୀକୃତ କରିବ। ଶାହା ଆହୁରି ମଧ୍ୟ କହିଛନ୍ତି, ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ‘ସହଯୋଗ ମାଧ୍ୟମରେ ସମୃଦ୍ଧି’ କେବଳ ଏକ ସ୍ଲୋଗାନ ନୁହେଁ। ଏହାକୁ ବାସ୍ତବରେ ପରିଣତ କରିବା ପାଇଁ, ସମବାୟ ମନ୍ତ୍ରଣାଳୟ ଗତ ସାଢ଼େ ତିନି ବର୍ଷ ମଧ୍ୟରେ ଦିନରାତି ପରିଶ୍ରମ କରିଛି। ଆଗାମୀ ମାସ ମଧ୍ୟରେ ସହକାର ଟ୍ୟାକ୍ସି ସେବା ଆରମ୍ଭ ହେବ। ଘରୋଇ କମ୍ପାନୀଗୁଡ଼ିକ ପରି ନୁହେଁ, ଏହି ସରକାରୀ ସେବା ନିଶ୍ଚିତ କରିବ ଯେ ସମସ୍ତ ରୋଜଗାର ଡ୍ରାଇଭରମାନଙ୍କ ପାଖରେ ରହିବ, ଯାହା ସେମାନଙ୍କୁ ଅଧିକ ଆର୍ଥିକ ଲାଭ ଦେବ। ଏହା ବ୍ୟତୀତ ଏକ ସମବାୟ ବୀମା କମ୍ପାନୀ ମଧ୍ୟ ଗଠନ କରାଯିବ ଯାହା ଦେଶର ଲୋକମାନଙ୍କୁ ବୀମା ସେବା ଯୋଗାଇବ। ସେ ଆହୁରି କହିଛନ୍ତି, ଅଳ୍ପ ସମୟ ମଧ୍ୟରେ ଏହା ଘରୋଇ କ୍ଷେତ୍ରର ସବୁଠାରୁ ବଡ଼ ବୀମା କମ୍ପାନୀ ହୋଇଯିବ। ‘ଯାତ୍ରୀ ସାଥୀ’ ନାମକ ଏକ ସମାନ ସେବା ପଶ୍ଚିମବଙ୍ଗରେ ପୂର୍ବରୁ ଚାଲୁଛି, ଯାହା ପୂର୍ବରୁ କେବଳ କୋଲକାତାରେ ଉପଲବ୍ଧ ଥିଲା। ଏବେ ଏହା ସିଲିଗୁଡ଼ି, ଆସାନସୋଲ ଏବଂ ଦୁର୍ଗାପୁର ଭଳି ସହରକୁ ମଧ୍ୟ ବିସ୍ତାରିତ ହୋଇଛି। ଯାତ୍ରୀ ସାଥୀ ଶୀଘ୍ର ବୁକିଂ, ସ୍ଥାନୀୟ ଭାଷାରେ ସୂଚନା, ସୁଲଭ ଭଡ଼ା ଏବଂ 24×7 ଗ୍ରାହକ ସହାୟତା ପ୍ରଦାନ କରେ। ଏହା ଯାତ୍ରୀମାନଙ୍କ ମଧ୍ୟରେ ଏକ ଲୋକପ୍ରିୟ ହୋଇଛି। କେରଳ ଦେଶର ପ୍ରଥମ ରାଜ୍ୟ ଥିଲା, ଯିଏ ୨୦୨୨ରେ ସରକାରୀ ଅନଲାଇନ ଟ୍ୟାକ୍ସି ସେବା ‘କେରଳ ସୱାରୀ’ ଆରମ୍ଭ କରିଥିଲା। ଯଦିଓ ଏହା କମ ବ୍ୟବହାର ଯୋଗୁ ବନ୍ଦ ହୋଇଯାଇଛି, ରାଜ୍ୟ ସରକାର ଏବେ ଏହାକୁ ସଂଶୋଧିତ ଭଡ଼ା ଏବଂ ଉନ୍ନତ ସଫ୍ଟୱେର୍‌ ସହିତ ପୁନଃଆରମ୍ଭ କରିବାକୁ ଯୋଜନା କରୁଛନ୍ତି।