୭ ବିଭାଗର ୧୦ ପ୍ରସ୍ତାବକୁ କ୍ୟାବିନେଟ୍ ମଞ୍ଜୁରୀ
Rasmita Behera
ରାଜ୍ୟ କ୍ୟାବିନେଟ୍ ବୈଠକରେ ୭ଟି ବିଭାଗର ୧୦ଟି ପ୍ରସ୍ତାବକୁ ଅନୁମୋଦନ ମିଳିଛି । ଆୟୁଷ୍ମାନ ଓ ଗୋପବନ୍ଧୁ ଜନ ଆରୋଗ୍ୟ ଯୋଜନାକୁ କ୍ୟାବିନେଟ ମଞ୍ଜୁରୀ ମିଳିଛି । ଓଡ଼ିଶାର ଜନସାଧାରଣଙ୍କ ପାଇଁ ଆୟୁଷ୍ମାନ ଭାରତ ପ୍ରଧାନମନ୍ତ୍ରୀ ଜନ ଆରୋଗ୍ୟ ଯୋଜନା ଏବଂ ଗୋପବନ୍ଧୁ ଜନ ଆରୋଗ୍ୟ ଯୋଜନାକୁ ମିଳିତ ଭାବେ ଲାଗୁ ହେବ । ଏହି ଯୋଜନାରେ ଉପକୃତ ହେବେ ରାଜ୍ୟର ୩ କୋଟି ୪୬ ଲକ୍ଷ ହିତାଧିକାରୀ । ସେହିପରି ରାଜ୍ୟ ସଡ଼କ ନୀତି ୨୦୨୫ର ପ୍ରସ୍ତାବକୁ ଅନୁମୋଦନ କରିଛି ରାଜ୍ୟ କ୍ୟାବିନେଟ୍ । ଅନ୍ୟପଟେ ଡିଏମଏଫ ନିୟମରେ ସଂଶୋଧନ ଆଣିଛନ୍ତି ସରକାର । ପ୍ରତ୍ୟକ୍ଷ ଭାବେ ପ୍ରଭାବିତ ଅଂଚଳର ପରିସୀମା ୧୦ କି.ମିରୁ ୧୫ କିମିକୁ ବୃଦ୍ଧି କରାଯାଇଛି । ଖଣି-ଖାଦାନ ଅଂଚଳରୁ ୫ କି.ମି ଭିତରେ ସମସ୍ତ ଉନ୍ନତିମୂଳକ କାମ ସାଚ୍ୟୁରେସନ ମୋଡ୍ରେ ହେବ । ଓଡ଼ିଶା ବେସାମରିକ ଥଇଥାନ ନିୟମରେ ପରିବର୍ତ୍ତନ ପ୍ରସ୍ତାବକୁ ଅନୁମୋଦନ କରିଛି ରାଜ୍ୟ କ୍ୟାବିନେଟ୍ । ଏହାସହ ଚାକିରି ଥଇଥାନରେ ଉଠିଲା ମାର୍କିଙ୍ଗ ସିଷ୍ଟମ୍ । ସେହିପରି ଓଡ଼ିଶା ପ୍ରିଭେନସନ ଅଫ୍ ଲ୍ୟାଣ୍ଡ ଏନକ୍ରୋଚମେଂଟ ସଂଶୋଧନ ପ୍ରସ୍ତାବକୁ ମଞ୍ଜୁରୀ ମିଳିଛି । ୧ ଏକରର ୨୫ ଭାଗରୁ ଏକ ଭାଗରୁ କମ ପରିମାଣର ଘରବାରି ଜମିଥିଲେ ଘରବାରିହୀନ ବ୍ୟକ୍ତି ଭାବେ ପରିଗଣିତ ହେବେ । ସେହି ବ୍ୟକ୍ତିଙ୍କୁ ଠିକ୍ ସେହି ପରିମାଣର ଜମି ଯୋଗାଇବେ ସରକାର । ସେପଟେ, ଆୟୁଷ୍ମାନ ଓ ଜନ ଆରୋଗ୍ୟ ଯୋଜନାକୁ ମଞ୍ଜୁରୀ ଦେଇଛି କ୍ୟାବିନେଟ୍ । ଯେଉଁଥିରେ ଉପକୃତ ହେବେ ୩ କୋଟି ୪୬ ଲକ୍ଷ ହିତାଧିକାରୀ । କ୍ୟାସଲେସ୍ ଟ୍ରିଟମେଣ୍ଟ ପାଇବେ ହିତାଧିକାରୀ । ଆୟୁଷ୍ମାନ ଓ ଗୋପବନ୍ଧୁ ଜନ ଆରୋଗ୍ୟ ମିଳିତ ଭାବେ କାର୍ଯ୍ୟକାରୀ ହେବ । ଦେଶର ୨୯ ହଜାର ମେଡିକାଲରେ ମିଳିବ ସୁବିଧା । ପୂର୍ବରୁ କେବଳ ୯୦୦ ହସ୍ପିଟାଲରେ ମିଳୁଥିଲା ସୁବିଧା । ଆୟୁଷ୍ମାନ ବୟୋ-ବନ୍ଦନା ଯୋଜନାରେ ବୟସ୍କଙ୍କୁ ଚିକିତ୍ସା ସୁବିଧା ମିଳିବ । ୭୦ ବର୍ଷ ବା ତା’ଠୁ ଅଧିକ ବୟସର ବ୍ୟକ୍ତିଙ୍କୁ ଚିକିତ୍ସା ମିଳିବ ।
