ଦରଦାମ ବୃଦ୍ଧିକୁ ନେଇ ତାଣ୍ଡବ, ସଂଘର୍ଷରେ ଜଣେ ପୁଲିସ କର୍ମୀ ମୃତ
Rasmita Behera
ଦିନକୁ ଦିନ ଅଶାନ୍ତ ହୋଇପଡୁଛି ପାକିସ୍ତାନ ଅଧିକୃତ କଶ୍ମୀରର ସ୍ଥିତି। ଦରଦାମ ବୃଦ୍ଧିକୁ ନେଇ ଏଠାକାର ଲୋକେ ରାସ୍ତାକୁ ଓହ୍ଲାଇଛନ୍ତି। ପାକିସ୍ତାନ ସରକାରଙ୍କ ବିରୋଧରେ ଜାରି ରହିଛି ବିକ୍ଷୋଭ ପ୍ରଦର୍ଶନ। ଏହି ବିରୋଧକୁ ଦମନ କରିବାକୁ ଅଧିକାରୀମାନେ ବ୍ୟାପକ ପଦକ୍ଷେପ ନେଉଛନ୍ତି। ଶନିବାର ଦିନ ହୋଇଥିବା ସଂଘର୍ଷରେ ଜଣେ ପୁଲିସ କର୍ମଚାରୀଙ୍କ ମୃତ୍ୟୁ ହୋଇଥିବା ବେଳେ ୯୦ ଜଣ ଆହତ ହୋଇଛନ୍ତି। ମୁଦ୍ରାସ୍ଫୀତି, ବର୍ଦ୍ଧିତ ଟ୍ୟାକ୍ସ ଏବଂ ବିଦ୍ୟୁତ୍ ଅଭାବ ଓ ସବ୍ସିଡି କାଟ୍ ବିରୋଧରେ ଆରମ୍ଭ ହୋଇଥିବା ଏହି ବିରୋଧ PoK ରେ ଅଧିକାର ଏବଂ ସ୍ୱାଧୀନତା ପାଇଁ ଏକ ଆନ୍ଦୋଳନରେ ପରିଣତ ହୋଇଛି।
ବିକ୍ଷୋଭକାରୀମାନେ ଲଗାତର 'ସ୍ୱାଧୀନତା'ର ସ୍ଲୋଗାନ ଦେଉଛନ୍ତି। ମୁଜାଫରବାଦ ଏବଂ ଅନ୍ୟ ଜିଲ୍ଲାର ପୁଲିସ ଏବଂ ସୁରକ୍ଷା ଏଜେନ୍ସି ସହିତ ବିକ୍ଷୋଭକାରୀଙ୍କ ସଂଘର୍ଷ ହୋଇଛି। ପୁଲିସ ବିକ୍ଷୋଭକାରୀଙ୍କ ଉପରକୁ ଆଖିବୁଜା ଗୁଳିମାଡ କରିବା ସହ ଲୁହା ବୁହା ଗ୍ୟାସ୍ ଓ ଲାଠି ଚାର୍ଜ ମଧ୍ୟ କରିଛି। ଏଥିରେ ତିନିରୁ ଚାରି ଜଣ ଲୋକଙ୍କ ମୃତ୍ୟୁ ହୋଇଥିବା ବେଳେ ଶତାଧିକ ଆହତ ହୋଇଛନ୍ତି। ଏହି ମାମଲାରେ ବର୍ତ୍ତମାନ ସୁଦ୍ଧା ୧୨ରୁ ଅଧିକ ନେତା ଓ ସଦସ୍ୟଙ୍କୁ ଗିରଫ କରାଯାଇଛି।
