ମନମୋହନଙ୍କ ବେକରେ ‘ଚକ୍ର’
Rasmita Behera
ଭୁବନେଶ୍ୱର : ଆଉ କିଛିଦିନ ପରେ ବିଜେପି ରାଜ୍ୟ ସଭାପତି ଚୟନ ହେବ । ଏହି ରେସ୍ରେ ଆଗରେ ଅଛନ୍ତି ରାଜ୍ୟ ସଭାପତି ମନମୋହନ ସାମଲ୍ । ତାଙ୍କୁ ପୁଣିଥରେ ଦଳ ରିପିଟ୍ କରିବ ବୋଲି ଚର୍ଚ୍ଚା ହେଉଛି । କିନ୍ତୁ ଏଭଳି ସମୟରେ ମନମୋହନଙ୍କ ପାଇଁ ଅକଳିଆ ପରିସ୍ଥିତି ସୃଷ୍ଟି ହୋଇଛି । ତାଙ୍କ ବେକରେ ଘୂରିଛି ରାଜା ‘ଚକ୍ର’ । ଖାଲି ମନମୋହନ ନୁହଁନ୍ତି ବିଜେପି ସରକାର ବି ଅକଳରେ ପଡ଼ି ଯାଇଛନ୍ତି । ନିକଟରେ ରାଜାର ଓକିଲ ସୀତାଂଶୁ ଦ୍ୱିବେଦୀ ବିସ୍ଫୋରକ ମନ୍ତବ୍ୟ ଦେଇଛନ୍ତି । ସେ ସିଧାସଳଖ ମନମୋହନଙ୍କୁ ନିଶାନା ସାଧିଛନ୍ତି । ରାଜା ଚକ୍ର ଠାରୁ ମନମୋହନ କୁଆଡେ଼ ୧ କୋଟି ଟଙ୍କା ନେଇଛନ୍ତି । ତାହା ପୁଣି ଆକାଉଣ୍ଟରେ । ନୂଆ ସରକାର ଶପଥ ଉତ୍ସବ ପାଇଁ ବି ବିଜେପି ନେତା ୧୪ ଲକ୍ଷ ଟଙ୍କା ନେଇଛନ୍ତି । ଯାହାକି ବିଜେପିରେ କମ୍ପନ ସୃଷ୍ଟିକରିଛି । ମନମୋହନ ଏଭଳି ଅଭିଯୋଗକୁ ଦୃଢ଼ ଖଣ୍ଡନ କରିଥିଲେବି ତାଙ୍କ ଆସନ ଟଳମଳ ହୋଇଯିବ ବୋଲି କୁହାଯାଉଛି । ତାଙ୍କ ବିରୋଧୀମାନେ ପେପର କଟିଂ ନେଇ ଦିଲ୍ଲୀ ଗଲେଣି । ଅମିତ୍ ଶାହା, ଜେପି ନଡ୍ଡା ଓ ନରେନ୍ଦ୍ର ମୋଦିଙ୍କୁ ଏହି ଖବର ଜଣାଇ ଦିଆଯିବ । ରାଜା ଚକ୍ରକୁ ନେଇ ବିଜେଡ଼ିରେ କମ୍ପନ ସୃଷ୍ଟି ହୋଇଥିବାବେଳେ ହଠାତ୍ ବିଜେପିରେ ବି ତାହା ଆଲୋଡ଼ନ ସୃଷ୍ଟିକରିଛି । ଏଭଳି ସ୍ଥିତିରୁ ମୁକଳିବା ପାଇଁ ମନମୋହନ ଏବେ ବାଟ ଖୋଜୁଛନ୍ତି । ଗୋଟିଏ ପଟେ ମନମୋହନ ନିଜକୁ ସଫା କହିବା ସହ ଆକାଉଣ୍ଟ ଯାଞ୍ଚ ପାଇଁ ଆହ୍ୱାନ ଦେଇଛନ୍ତି । ସେପଟେ ସୀତାଂଶୁଙ୍କ ଭଳି ଜଣେ ବଡ଼ ଓକିଲ ଏଭଳି ଖାମଖିଆଲି ମନ୍ତବ୍ୟ ଦେବେନାହିଁ କିଛି ଲୋକ କହୁଛନ୍ତି । ତାଙ୍କ ପାଖରେ ନିଶ୍ଚିତ କିଛି ତଥ୍ୟ ପ୍ରମାଣ ରହିଛି । କାହିଁକିନା ସେ ରିଜୋଲୁସନ ଓ ଟଙ୍କା ଦେବାର ତାରିଖ କଥାବି ଜଣାଉଛନ୍ତି । ଯେଉଁଥିପାଇଁ ମନମୋହନ ହରଡ଼ ଘଣାରେ ପଡ଼ି ଯାଇଛନ୍ତି । ବିନା ନିଅାଁରେ ଧୂଆଁ ବାହାରିବନି ବୋଲି ରାଜନୀତିକ ମହଲରେ ଚର୍ଚ୍ଚା ହେଉଛି । ବିଜେପିର ଗୋଟିଏ ଗୋଷ୍ଠୀ ବେଶ୍ ଖୁସି ହୋଇ ଯାଇଛନ୍ତି । ଏହାଦ୍ୱାରା ମନମୋହନଙ୍କ ସଭାପତି ପଦ ସହ ପତିଆରା ବି ଚାଲିଯିବ । ସେପଟେ ସରକାର ବି ଚିନ୍ତାରେ ପଡ଼ି ଯାଇଛନ୍ତି । ଯଦି ନିଜ ଦଳର ଲୋକେ ରାଜା ଚକ୍ରଠାରୁ ଟଙ୍କା ନେଇଥିବେ ତେବେ ସରକାର ବି ବଦନାମ ହୋଇଯିବେ । କେନ୍ଦୁଝରର ବିଜେପି ନେତାମାନେ ରାଜାଙ୍କ ଠାରୁ ଟଙ୍କା ଆଣିଥିବାର ଅଭିଯୋଗ ହେଉଥିବାରୁ ମୁଖ୍ୟମନ୍ତ୍ରୀ ବି ଅକଳରେ ପଡ଼ିଯିବା ସ୍ୱାଭାବିକ । ଆଗାମୀ ଦିନରେ ଏହି ମାମଲା କେଉଁ ମୋଡ଼ ନେବ ତାହା ଦେଖିବାକୁ ବାକି ରହିଲା ।
