ବିଜେଡ଼ିକୁ ବିକିଦେଲେ...

ଭୁବନେଶ୍ୱର : ବିକ୍ରି ହୋଇଗଲା କି ବିଜେଡ଼ି ? ନଇଁଗଲେକି ନବୀନ ? ରାଜ୍ୟ ରାଜନୀତିରେ ଏବେ ଏମିତି ଚର୍ଚ୍ଚା ଜୋରଧରିଛି  । ବିଜେଡ଼ି ଓ ନବୀନ ବିକ୍ରି ହୋଇଗଲେ ବୋଲି କଂଗ୍ରେସ ସଭାପତି ଭକ୍ତ ଦାସ ଅଭିଯୋଗ କରିଛନ୍ତି  । ସେ କହିଛନ୍ତିଯେ, ମାନସପୁତ୍ରଙ୍କୁ ନେଇ ନବୀନ ବାବୁ ଦିଲ୍ଲୀ ଯାଇଥିଲେ  । ତାଙ୍କୁ ବଞ୍ଚାଇବା ପାଇଁ ବିଜେପି ଓ ବିଜେଡ଼ି ମଧ୍ୟରେ ଡିଲ୍‌ ହୋଇଛି  । ବିଜେପି ନିକଟରେ ସେ ନବୀନଙ୍କୁ ବିକ୍ରି କରିଦେଇଛନ୍ତି  । ପାଣ୍ଡିଆନଙ୍କ ନାଁ ନନେଇ ଏମିତି କଟାକ୍ଷ କରିଛନ୍ତି ଭକ୍ତ  । ଯାହାକି ବିଜେଡ଼ି ଅଳିନ୍ଦରେ ଆଲୋଡ଼ନ ସୃଷ୍ଟି କରିଛି  ।
ସେପଟେ ବିଜେଡ଼ି ସୁପ୍ରିମୋ ବି ଦଳୀୟ ନେତାଙ୍କୁ ବଡ଼ ବାର୍ତ୍ତା ଦେଇଛନ୍ତି  । ପାଣ୍ଡିଆନ୍‌ ବିରୋଧୀ ଗୋଷ୍ଠୀଙ୍କୁ ଜୋରଦାର ଝଟକା ଲାଗିଛି  । ହଜାର ହଜାର ବିଜେଡ଼ି ନେତା କି ଲକ୍ଷ ଲକ୍ଷ କର୍ମୀ ନୁହଁନ୍ତି  । ବିଜେଡ଼ି ସୁପ୍ରିମୋଙ୍କ ପାଇଁ ‘ପାଣ୍ଡିଆନ୍‌’ ହିଁ ବଡ  । ଭିକେ ପାଣ୍ଡିଆନ୍‌ ଯାହା କହିବେ, ନବୀନ ସେଇଆ ହିଁ କରିବେ  । ପାଣ୍ଡିଆନଙ୍କ ନୂଆ ଚାକିରୀ ଓ ସୁଜାତାଙ୍କ ଭିଆରଏସ ଚର୍ଚ୍ଚା ଭିତରେ ନବୀନଙ୍କ ‘ୱାକଫ’ ସଂକେତ ବିଜେଡ଼ିରେ କମ୍ପନ ସୃଷ୍ଟି କରିଛି  । ଯାହାକୁ ନେଇ ଶଙ୍ଖ ଭବନ ଆଗରେ ବି ନେତାମାନେ ପ୍ରତ୍ୟକ୍ଷ ଓ ପରୋକ୍ଷ ଭାବେ ରୋଷ ଝାଡ଼ିଛନ୍ତି  । ଏକଥାକୁ ହାଲ୍‌କା ଭାବେ ନିଆଯାଇପାରିବ ନାହିଁ  । ଆଗକୁ ବିଜେଡ଼ିର ଏହି ଫାଟ ଆହୁରି ଚଉଡ଼ା ହେବାର ସମ୍ଭାବନା ବି ରହିଛି  । 
‘ୱାକଫ’ ବିଲ୍‌କୁ ପ୍ରଥମେ ନବୀନ ବାବୁ ଓ ବିଜେଡ଼ି ବିରୋଧ କରୁଥିଲେ  । ରାଜ୍ୟସଭା ସାଂସଦ ସସ୍ମିତ ପାତ୍ର ତାଙ୍କ ଦଳ ବିଲ୍‌ ବିରୋଧରେ ଯିବ ବୋଲି କହିଥିଲେ  । କିନ୍ତୁ ରାଜ୍ୟସଭାରେ ଆଲୋଚନା ଓ ଭୋଟ୍‌ ବେଳକୁ ବିଜେଡ଼ିର ଆଭିମୁଖ୍ୟ ବଦଳିଗଲା  । ବିଜେଡ଼ି ବିବେକାନୁମୋଦିତ ଭୋଟ୍‌ ଦେବବୋଲି ସସ୍ମିତ କହିଥିଲେ  । ଏଭଳି ନିଷ୍ପତ୍ତି କାହିଁକି ନିଆଗଲା କେହି ଜାଣିପାରିଲେନି  । କି ନିଷ୍ପତ୍ତି ନେଲେ ଭଲ ହେବ ସେନେଇ ବରିଷ୍ଠ ନେତାଙ୍କ ସହ ଆଲୋଚନା କରିବାକୁ ବି ନବୀନ ଉଚିତ୍‌ ମନେ କଲେନାହିଁ  । ଉପଦେଷ୍ଟା କମିଟି ବୈଠକରେ ବରିଷ୍ଠ ନେତା ପ୍ରସନ୍ନ ଆଚାର୍ଯ୍ୟ, ବଦ୍ରି ନାରାୟଣ ପାତ୍ର ଓ ଶଶୀଭୂଷଣ ବେହେରା ଦଳର ନିଷ୍ପତ୍ତିକୁ ନାପସନ୍ଦ କରିଛନ୍ତି  ।  କିନ୍ତୁ ନବୀନ ନିବାସରେ ବରିଷ୍ଠ ନେତାଙ୍କ ପାଟି ଖନି ମାରିଥିଲା  । ନବୀନଙ୍କ ଆଗରେ ଏକଥା କହିବାକୁ କାହାର ସାହାସ କୁଳେଇ ନଥିଲା  । ଏମିତିକି ନବୀନ ନିବାସ ବାହାରକୁ ଆସିବା ପରେ ବରିଷ୍ଠ ନେତାମାନେ କଥାକୁ ବାଅାଁରେଇ ଦେଇଥିଲେ  ।
ଚବିଶ ନିର୍ବାଚନ ହାରିବା ପରେ ବିଜେଡ଼ିର ସବୁକିଛି ଠିକ୍‌ ଚାଲିନାହିଁ  । ବିଜେଡ଼ି ଏବେ ପାଣ୍ଡିଆନ୍‌ ସପକ୍ଷବାଦୀ ଓ ବିପକ୍ଷବାଦୀ ଗୋଷ୍ଠୀରେ ବିଭକ୍ତ ହୋଇଯାଇଛି  । ଯାହାକି ଆଗାମୀ ଦିନରେ ବିଭାଜନକୁ ହୁଇସିଲ୍‌ ମାରି ଡାକୁଛି ବୋଲି ଚର୍ଚ୍ଚା ହେଉଛି  ।