ନିର୍ଦ୍ଦେଶନାମା ମାନି କିଛି ପୋଲିସ କର୍ମଚାରୀ ଫିଟ୍
Rasmita Behera
ଭୁବନେଶ୍ୱର : ଅପରାଧୀଙ୍କୁ ଧରିବା ପାଇଁ ଏକ ସୁସ୍ଥ ପୋଲିସ ବ୍ୟବସ୍ଥା ଲୋଡ଼ା। ସେଥିପାଇଁ ପୋଲିସ ବିଭାଗରେ କାର୍ଯ୍ୟରତ ଅଧିକାରୀ ଏବଂ କର୍ମଚାରୀମାନେ ଶାରୀରିକ ସ୍ତରରେ ସବୁବେଳେ ଫିଟ୍ ରହିବା ଜରୁରୀ। ହେଲେ ପୋଲିସ ବିଭାଗରେ ଥିବା କିଛି ପୋଲିସ କର୍ମଚାରୀ ସେମାନଙ୍କ ସ୍ବାସ୍ଥ୍ୟର ଠିକ୍ ଭାବେ ଯତ୍ନ ନେଉନାହାନ୍ତି। ଫଳରେ ସମୟାନୁକ୍ରମେ ସେମାନେ ରକ୍ତଚାପ, ମଧୁମେହ ଓ ଅତ୍ୟଧିକ ମୋଟାପଣ ଭଳି ସମସ୍ୟାରେ ପଡୁଛନ୍ତି। ଫିଟ୍ ନ ଥିବା ପୋଲିସ କର୍ମଚାରୀମାନେ କର୍ତ୍ତବ୍ୟ ସମ୍ପାଦନା କରିବା ବେଳେ ବିଫଳ ହେଉଥିବା ଅଭିଯୋଗ ହେଉଛ। ଦ୍ୱୈତନଗରୀ କଟକ ଓ ଭୁବନେଶ୍ୱର କମିଶନରେଟ୍ ପୋଲିସରେ ଅନେକ ଅନ୍ଫିଟ୍ ପୋଲିସ କର୍ମଚାରୀ ଅଛନ୍ତି।
ସେମାନେ ମୋଟାପଣ ସମସ୍ୟାରେ ଛନ୍ଦି ହୋଇ କାର୍ଯ୍ୟ ସମ୍ପାଦନା କରୁଛନ୍ତି। ଆଉ ଏହି କାରଣ ପାଇଁ ଅନେକ ସମୟରେ ଆଇନଶୃଙ୍ଖଳା ପରିସ୍ଥିତି ନିୟନ୍ତ୍ରଣ ଓ ଅପରାଧୀଙ୍କୁ ଧରିବା ଦିଗରେ ସେମାନେ ବିଫଳ ହେଉଛନ୍ତି ବୋଲି ନିଜ ନାମ ଗୋପନ ରଖିବା ସର୍ତ୍ତରେ ଜଣେ ପୋଲିସ ଅଧିକାରୀ କହିଛନ୍ତି।
ପୂର୍ବରୁ କମିଶନରେଟ୍ ପୋଲିସ ପକ୍ଷରୁ ଏକାଧିକ ଥର ସ୍ବାସ୍ଥ୍ୟ ପ୍ରତି ଗୁରୁତ୍ୱ ଦେଇ ଫିଟ୍ ରହିବାକୁ ନିର୍ଦ୍ଦେଶନାମା ଜାରି ହୋଇଛି। ୨୦୨୦ଜୁଲାଇରେ କରୋନା ମହାମାରୀବେଳେ ତତ୍କାଳୀନ ପୋଲିସ କନିଶନର ସୁଧାଂଶୁ ଷଡ଼ଙ୍ଗୀ ଏନେଇ ନିର୍ଦ୍ଦେଶାନାମା ଜାରି କରିବା ସହ ଚାକିରି ଯିବା ଭଳି କଡ଼ା ଚେତାବନୀ ଦେଇଥିଲେ। ସମସ୍ତ ପୋଲିସ କର୍ମଚାରୀଙ୍କ ଓଜନ ଓ ଉଚ୍ଚତା ମାପ କରାଯାଇ ବୟସ ଓ ଉଚ୍ଚତା ଅନୁଯାୟୀ ସେମାନଙ୍କ ଓଜନ କେତେ ରହିବ, ତାହା ଜଣାଇ ଦିଆଯିବ ବୋଲି କୁହାଯାଇଥିଲା। ଏପରି କି ୩ମାସ ପରେ ଯେଉଁମାନଙ୍କ ଆବଶ୍ୟକତାଠାରୁ ଅଧିକ ଓଜନ ରହିବ ସେମାନଙ୍କୁ ସକାଳୁ ବାଧ୍ୟତାମୂଳକ ବ୍ୟାୟାମ କରିବେ ନଚେତ୍ ୬ ସପ୍ତାହ ରିଫ୍ରେସର କ୍ଲାସ୍ରେ ଯୋଗଦେବେ। ଯେଉଁମାନେ ଏହାକୁ ଗୁରୁତ୍ୱ ଦେବେନାହିଁ, ସେମାନଙ୍କ ବିରୋଧରେ ଆବଶ୍ୟକୀୟ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ।
ଏଥିସହ ପଦୋନ୍ନତି ବନ୍ଦ କରାଯିବା ସହ ଆବଶ୍ୟକ ପଡିଲେ ସ୍ବାସ୍ଥ୍ୟଗତ କାରଣରୁ ବାଧ୍ୟତାମୂଳକ ଅବସର ଦିଆଯାଇପାରେ ବୋଲି କମିଶନର କହିଥିଲେ। ହେଲେ କିଛି ମାସ ପରେ ଏହି ଫିଟ୍ନେସ୍ ଫର୍ମୁଲା ଉଭେଇ ଯାଇଥିଲା। ସେହିପରି ୨୦୨୩ ଫେବୃଆରୀରେ ଡିସିପି ପ୍ରତୀକ ସିଂ ଭୁବନେଶ୍ୱର ସହରାଞ୍ଚଳ ପୋଲିସ ଜିଲାରେ କାର୍ଯ୍ୟରତ ପୋଲିସ କର୍ମଚାରୀଙ୍କୁ ଫିଟ୍ ରହିବାକୁ ତାଗିଦ କରିବା ସହ ଏନେଇ ନିର୍ଦ୍ଦେଶନାମା ଜାରି କରିଥିଲେ। ଦୈନନ୍ଦିନ ଜୀବନରେ ଫିଟ୍ ରହିବାକୁ ୭ଟି ଦିଗରେ ଧ୍ୟାନ ଦେବାକୁ ସେ କହିଥିଲେ। ନିୟମିତ ସକାଳ ୬ଟା ଓ ଅପରାହ୍ନ ୪ଟାରେ ପୋଲିସ କର୍ମଚାରୀମାନେ ସେମାନଙ୍କ କ୍ୟାମ୍ପସ୍ର ଫିଜିକାଲ ଟ୍ରେନିଂରେ ଯୋଗଦେବେ।
ପୋଲିସ କର୍ମଚାରୀଙ୍କ ଓଜନକୁ ନେଇ ଟାର୍ଗେଟ୍ ଦିଆଯିବା ପରେ ପ୍ରତି ୧୫ ଦିନରେ ସେମାନଙ୍କ ଓଜନ ମପାଯିବ ଆଦି ନିର୍ଦ୍ଦେଶନାମାରେ କୁହାଯାଇଥିଲା। ହେଲେ ଏଭଳି କଡା ଚେତାବନୀ ସତ୍ତ୍ୱେ ଅନେକ ଏହାକୁ ମାନୁ ନ ଥିବା ଦେଖିବାକୁ ମିଳୁଛି। କାର୍ଯ୍ୟର ଅତ୍ୟଧିକ ଚାପ ଏବଂ ସମୟ ଠିକ୍ ନ ଥିବା କାରଣରୁ ନିୟମିତ ବ୍ୟାୟାମ କରୁପାରୁ ନ ଥିବା କିଛି କର୍ମଚାରୀ କହୁଛନ୍ତି। ଅନେକ ମେଦବହୁଳତାର ଶିକାର ହୋଇ ଅନ୍ଫିଟ୍ କର୍ମଚାରୀମାନେ କାମ କରୁଛନ୍ତି। ଏନେଇ ଡିସିପି ପ୍ରତୀକ ସିଂ କହିଛନ୍ତି, ଏହି ନିର୍ଦ୍ଦେଶନାମା ମାନି କିଛି ପୋଲିସ କର୍ମଚାରୀ ଫିଟ୍ ହୋଇଛନ୍ତି। ଆଉ କେତେଜଣଙ୍କ ସ୍ବାସ୍ଥ୍ୟରେ ଉନ୍ନତି ଆସିଥିବା ସେ କହିଛନ୍ତି।
