ଥରିଲା ପାକିସ୍ତାନ : ପଞ୍ଜାବ, ରାଜସ୍ଥାନ ଓ ଜାମ୍ମୁରେ ପାକିସ୍ତାନର ଆକ୍ରମଣ

ନୂଆଦିଲ୍ଲୀ:  ସକାଳୁ ଭାରତ ଉପରେ ଆକ୍ରମଣ ପଣ୍ଡ ହେବା ପରେ ସଂଧ୍ୟାରେ ପାକ୍ ଗୁଳିଗୋଳା ବର୍ଷଣ କରିବା ସହ ମିସାଇଲ ମାଡ଼ ପାଇଁ ଉଦ୍ୟମ କରିଥିଲା  । ତେବେ ଭାରତ ଆକାଶରେ ହିଁ ପାକର ଡ୍ରୋନ ଓ ମିସାଇଲ ସବୁ ଉଡ଼ାଇ ଧୂଅାଁ କରିଦେଲା  । ଏହାପରେ ପ୍ରତିଜବାବ ଦେଇଥିଲା ଭାରତ  । ଲାହୋର ଓ ଇସଲାମାବାଦ ଉପରେ ଜୋରଦାର ଆକ୍ରମଣ କରିଥିଲା  । ଅନେକ ସାମରିକ ଘାଟି ଉପରେ ଭାରତ ଆକ୍ରମଣ କରି ପାକିସ୍ତାନକୁ ଥରାଇଦେଇଛି  । ଜେଏଫ-୧୬ର ଜଣେ ପାଇଲଟ ମଧ୍ୟ ଜୀବନ୍ତ ଧରା ପଡ଼ିଛନ୍ତି  । ରାଜସ୍ଥାନର ଜୈସାଲମରରୁ ତାଙ୍କୁ ଧରାଯାଇଥିବା ସୂଚନା ମିଳିଛି  । ତେବେ ଆକ୍ରମଣ ନେଇ ଏଯାଏଁ ଉଭୟ ଦେଶ ପକ୍ଷରୁ ବିଧିବଦ୍ଧ ଭାବେ କୌଣସି ଘୋଷଣା କରାଯାଇନାହିଁ  । କୁଲୁ, ଚଣ୍ଡୀଗଡ଼ ଓ ଲୁଧିଆନ ବିମାନ ବନ୍ଦରକୁ ଭାରତ ବନ୍ଦ କରିଦେଇଛି  । ପାକ୍ ସୀମାନ୍ତରେ ଥିବା ସବୁ ଅଞ୍ଚଳକୁ ବ୍ଳାକଆଉଟ୍ କରାଯାଇଛି  । 
ଯାହା ଆଶଙ୍କା କରାଯାଉଥିଲା ସେଇଆ ହିଁ ହେଲା  । ଆତଙ୍କବାଦୀଙ୍କ ଉପରେ ଆକ୍ରମଣକୁ ସହି ପାରିଲାନି ପାକିସ୍ତାନ  । ସକାଳୁ ଭାରତ ଉପରେ ଆକ୍ରମଣ କରିବାର ଯୋଜନା କରିଥିଲେବି ଭାରତର ଅମୋଘ ଅସ୍ତ୍ର ସୁଦର୍ଶନ ପଣ୍ଡ କରିଦେଲା  । ଲାହୋରରେ ପାକର ମିସାଇଲକୁ ଉଡ଼ାଇଦେଲା  । ରାତିରେ ପୁଣି ଥରେ ପାକ୍ ଆକ୍ରମଣ କରିଥିବାବେଳେ ଏହାର କଡ଼ା ଜବାବ ଦେଇଛି ଭାରତ  । ପାକିସ୍ତାନର ଅନେକ ବିମାନ ଅଧା ଆକାଶରେ ଧୂଅାଁ ହୋଇଯାଇଛି  । ସେପଟେ ଯୁଦ୍ଧ ଏକରକମ ଆରମ୍ଭ ହୋଇଯାଇଥିବାରୁ ଜାମ୍ମୁକାଶ୍ମୀର, ଗୁଜୁରାଟ, ପଞ୍ଜାବ ଓ ରାଜସ୍ଥାନର ଅନେକ ଅଞ୍ଚଳକୁ ବ୍ଳାକଆଉଟ୍ କରି ଦିଆଯାଇଛି  ।
ଭାରତ-ପାକ ସୀମାନ୍ତର ଅନେକ ଅଞ୍ଚଳରେ ଯୁଦ୍ଧ ସାଇରନ୍ ବାଜିଛି  । ଲୋକମାନଙ୍କୁ ଘର ଭିତରେ ରହିବାକୁ ପରାମର୍ଶ ଦିଆଯାଇଛି  । ସମସ୍ତଙ୍କୁ ସେନା ପକ୍ଷରୁ ସତର୍କ କରିଦିଆଯାଇଛି  । ତେବେ ଯୁଦ୍ଧକୁ ନେଇ ଭୟଭୀତ ନହେବାକୁ ପରାମର୍ଶ ଦିଆଯାଇଛି  । ପାକିସ୍ତାନ୍ ଡ୍ରୋନକୁ ଉଡ଼ାଇବା ପାଇଁ ଭାରତ ଏଲ-୭୦ ପ୍ରୟୋଗ କରିଥିଲା  । ଯାହାକି ପାକର ଛୋଟ ଛୋଟ ଡ୍ରୋନକୁ ଉଡ଼ାଇଦେଇଛି  । ରାଜସ୍ଥାନର ପୋଖରାନରେ ମିସାଇଲ୍ ଆକ୍ରମଣ ପାଇଁ ପାକ୍ ଯୋଜନା କରିଥିଲେବି ତାହାକୁ ପଣ୍ଡ କରିଦିଆଯାଇଛି  । ପୁଞ୍ଚ ସେକ୍ଟରରେ ବି ପାକ୍ ପକ୍ଷରୁ ଆକ୍ରମଣ କରାଯାଇଛି  । ପାକର କାମିକାଜି ଡ୍ରୋନକୁ ମଧ୍ୟ ଆକାଶରେ ଉଡ଼ାଇ ଦିଆଯାଇଛି  । ସେହିପରି ଜମ୍ମୁ ଓ ସାମ୍ବା ଅଞ୍ଚଳରେ ପାକିସ୍ତାନର ମିସାଇଲ ମାଡ଼ ଉଦ୍ୟମକୁ ବି ନିଷ୍କ୍ରିୟ କରିଦିଆଯାଇଛି  । ଦ୍ଭ ୭ ପୃଷ୍ଠାରେ...