ଦୁର୍ଘଟଣାରେ ଚାଲିଗଲା ପାଞ୍ଚ ଛାତ୍ରଙ୍କ ସହ ୭ ଜୀବନ
Henamanjaree Swain
ଜୁନାଗଡ଼ : ପରୀକ୍ଷା ଦେବାକୁ ଯାଉଥିବା ବେଳେ ଜୀବନ ପରୀକ୍ଷାରେ ହାରିଗଲେ ୫ଜଣ କଲେଜ ଛାତ୍ର । ଚାଲିଗଲା ଏକା ସଙ୍ଗେ ୫ ଛାତ୍ରଙ୍କ ସମେତ ୭ ଜଣଙ୍କ ଜୀବନ । ଗୁଜରାଟରେ ଘଟିଛି ଏଭଳି ମର୍ମନ୍ତୁଦ ସଡକ ଦୁର୍ଘଟଣା । ଆଜି ସକାଳ ପ୍ରାୟ ୮ଟା ସମୟରେ ଜୁନାଗଡ଼-ସୋମନାଥ ରାଜପଥର ଭଣ୍ଡୁରୀ ଗାଁ ନିକଟରେ ଦ୍ରୁତ ଗତିରେ ଆସୁଥିବା ଦୁଇ କାର୍ ମଧ୍ୟରେ ମୁହାଁମୁହିଁ ଧକ୍କା ହୋଇଛି । ଗୋଟିଏ କାରରେ ୫ ଜଣ କଲେଜ ଛାତ୍ର ପରୀକ୍ଷା ଦେବାକୁ ଯାଉଥିବା ବେଳେ ନିୟନ୍ତ୍ରଣ ହରାଇ ପ୍ରଥମେ ଏହା ଡିଭାଇଡରରେ ପିଟି ହୋଇଥିଲା । ଏହାପରେ ଅପରପାର୍ଶ୍ୱରେ ଆସୁଥିବା ଆଉ ଏକ କାର୍ ସହ ଯାଇ ମୁହାଁମୁହିଁ ଧକ୍କା ହୋଇଥିଲା । ଏହି ଧକ୍କା ଏତେ ଭୟଙ୍କର ଥିଲା ଯେ, ଉଭୟ କାର୍ ସମ୍ପୂର୍ଣ୍ଣ ନଷ୍ଟ ହୋଇଯାଇଛି । ଦୁର୍ଘଟଣାରେ ଘଟଣାସ୍ଥଳରେ ହିଁ ପରୀକ୍ଷା ଦେବାକୁ ଯାଉଥିବା ୫ କଲେଜ ଛାତ୍ରଙ୍କ ମୃତୁ୍ୟ ହୋଇଛି । ସେହିପରି ଅନ୍ୟ ଏକ କାରରେ ଥିବା ଦୁଇ ଜଣ ବ୍ୟକ୍ତିଙ୍କ ଜୀବନ ଯାଇଛି । ଦୁଇ କାର୍ ମଧ୍ୟରେ ଧକ୍କା ହେବା ଫଳରେ ଗ୍ୟାସ୍ ବୋତଲ ଫାଟି ଯାଇଥିଲା । ଫଳରେ ପାଖରେ ଥିବା ଏକ କୁଡିଆରେ ନିଆଁ ଲାଗିଥିଲା । ସ୍ଥାନୀୟ ଲୋକଙ୍କଠୁ ଖବର ପାଇ ପୁଲିସ ଘଟଣାସ୍ଥଳରେ ପହଞ୍ଚି ମୃତଦେହକୁ ଉଦ୍ଧାର କରି ମାଲିୟା ସରକାରୀ ହସ୍ପିଟାଲକୁ ବ୍ୟବଚ୍ଛେଦ ପାଇଁ ପଠାଇଛି । ଅଗ୍ନିଶମ ବାହିନୀ ପହଞ୍ଚି ନିଆଁକୁ ଆୟତ୍ତ କରିଛି । ପୂରା ଘଟଣାର ତଦନ୍ତ ଜାରି ରହିଛି ବୋଲି କହିଛନ୍ତି ଡିଏସପି ଦିନେଶ କୋଡିୟାତାର ।
