ବଡ଼ କିଏ ଛୋଟ କିଏ

ଆଜ୍ଞା ନମସ୍କାର,
ଛୋଟ କଥାର ବଡ଼ ବିଚାର "ଅମୃତ ବିନ୍ଦୁ ।' "ଅମୃତ ବିନ୍ଦୁ'ର ଆଜିର ଅଧ୍ୟାୟରେ ଆମେ ଅନୁଶୀଳନ କରିବା ଏ ସଂସାରରେ ବଡ଼ କିଏ ଆଉ ଛୋଟ କିଏ, ତାକୁ ନେଇ କିଛି ହୃଦୟସ୍ପର୍ଶୀ କଥା । ଆଜିର କଥାକୁ ଆପଣ ଗ୍ରହଣ କରିବେ, ବିଚାରିବେ ବୋଲି ଆଶା । ଏ ସୃଷ୍ଟି ହେଉଛି ପଞ୍ଚଭୂତର ସମାହାର । ଏଠାରେ ଏକକ ଭାବରେ କେହି ତିଷ୍ଠି ରହିପାରିବେ ନାହିଁ । ଜଳ ପାଇଁ ଆଧାର ଆବଶ୍ୟକ । ଅଗ୍ନି ପାଇଁ ବାହ୍ୟ ବସ୍ତୁ ଆବଶ୍ୟକ । ଭୂମି ପାଇଁ ଏ ପୃଥିବୀ ଆବଶ୍ୟକ । ପ୍ରକୃତିର ପ୍ରତ୍ୟେକ ଉପାଦାନ ପାଇଁ କିଛି ନା କିଛି ଆଧାରର ଆବଶ୍ୟକତା ରହିଛି । ଏ ପ୍ରକୃତିରେ ସମସ୍ତେ ପରସ୍ପରର ଆଧାର । ପ୍ରକୃତିରେ ଥିବା ସମସ୍ତ ଉପାଦାନ, ପରସ୍ପରର ଅବସ୍ଥିତିକୁ ନେଇ ସହଯୋଗ କରନ୍ତିି । ତେଣୁ ପ୍ରକୃତିର ବିଶ୍ଲେଷଣରେ କେହି ବଡ଼ ନୁହନ୍ତି । 
ନିଆଁ ବଡ଼ ନୁହେଁ, କାଠ ବଡ଼ ନୁହେଁ, ପାଣି ବଡ଼ ନୁହେଁ, ମାଟି ବଡ଼ ନୁହେଁ, ପଥର ବଡ଼ ନୁହେଁ । ଏମିତି କି ଆକାଶ ବି ବଡ଼ ନୁହେଁ । ଏଠି କେହି ବି ବଡ଼ ନୁହନ୍ତି । ଅଥଚ ସମସ୍ତଙ୍କ ଅବସ୍ଥିତି ନଥିଲେ, ଏ ସୃଷ୍ଟି ଚାଲନ୍ତା କିପରି?
ଏ ସମ୍ପର୍କରେ ଅନେକ ପ୍ରକାର କାହାଣୀ, ଆଖ୍ୟାୟିକା ସବୁ ରହିଛି । ବିଭିନ୍ନ ଧର୍ମଗ୍ରନ୍ଥରେ "କିଏ ବଡ଼'-ଏ ପ୍ରଶ୍ନର ଉତ୍ତର ଦେବା ପାଇଁ ଚିନ୍ତନ କରାଯାଇଛି । କିନ୍ତୁ ବାସ୍ତବରେ ପ୍ରକୃତିରେ ବା ଏ ସୃଷ୍ଟିରେ ସାନବଡ଼ର ପ୍ରଶ୍ନ ନଥାଏ । ପ୍ରଶ୍ନ ଥାଏ ପରସ୍ପରର ସହାବସ୍ଥାନରେ । ପାତ୍ର ନଥିଲେ ଜଳ ନାହିଁ । ଜଳ ନଥାଇ ପାତ୍ରର ଆବଶ୍ୟକତା ନାହିଁ । ଠିକ୍ ସେହିପରି ଦହନୀୟ ପଦାର୍ଥ ନଥିଲେ ଅଗ୍ନି ନାହିଁ । ଅଗ୍ନି ନଥିଲେ ଦହନୀୟ ପଦାର୍ଥର ମୂଲ୍ୟ ହିଁ ନାହିଁ । ପ୍ରକୃତି ସମସ୍ତଙ୍କୁ ନେଇ ସହାବସ୍ଥାନର ନିୟମରେ ଚାଲେ । ସାନବଡ଼ର ନିୟମରେ ନୁହେଁ । 
ଥରେ ଜଣେ ବିଶିଷ୍ଟ ବୈଜ୍ଞାନିକ କହିଥିଲେ ପୃଥିବୀରୁ ଏ ଜୀବଜଗତର କେବଳ ଗୋଟିଏ ମାତ୍ର ଜୀବ-ମହୁମାଛିମାନଙ୍କୁ ସମୂଳେ ବିଲୋପ କରି ଦେଲେ, ଏକ ଲକ୍ଷ ବର୍ଷ ଭିତରେ ସମୁଦାୟ ଜୀବଜଗତ ଧ୍ୱସଂ ପାଇଯିବ । ତେଣୁ କ୍ଷୁଦ୍ରକାୟ ମହୁମାଛିଟିଏ ଆଖିକୁ ନଗଣ୍ୟ ଜଣାପଡ଼ୁଥିଲେ ମଧ୍ୟ ତାର ଉପସ୍ଥିତିକୁ ଏ ପ୍ରକୃତି ପାଇଁ ଜରୁରୀ । ଠିକ୍ ସେହିପରି ଆମ ଚାରିପଟେ ଥିବା ସବୁତକ ଉପାଦାନ ରହିବା ଜରୁରୀ । ସେଥିମଧ୍ୟରୁ କୌଣସି ଗୋଟିଏ କୁ ବି ଯଦି ଆମେ ବାଦ୍ ଦେବାକୁ ଚାହିଁବା, ଦୀର୍ଘକାଳୀନ ଭିତ୍ତିରେ ତାହା ପ୍ରକୃତିର ଭାରସାମ୍ୟ ନଷ୍ଟ କରିଦେବ ଏବଂ ପ୍ରକୃତିର ସନ୍ତୁଳନ ବିଗାଡ଼ି ଦେବ । 
ଏ ସୃଷ୍ଟିରେ କେହି ବଡ଼ ନୁହେଁ କି କେହି ଛୋଟ ନୁହେଁ । ଏକ ପ୍ରାକୃତିକ ନିୟମ ଭିତରେ ପ୍ରତ୍ୟେକ ପ୍ରାଣୀ ଏବଂ ପ୍ରତ୍ୟେକ ଉପାଦାନ ପରସ୍ପର ଭିତରେ ଭାରସାମ୍ୟ ରକ୍ଷା କରି ତିଷ୍ଠି ରହିଥାନ୍ତି । ଏ ଭାରସାମ୍ୟକୁ ପ୍ରକୃତି ମଧ୍ୟ ତା ନିଜ ପକ୍ଷକୁ ଭାରସାମ୍ୟ ରକ୍ଷା କରିଥାଏ ।  ଅତଏବ, କେହି ବଡ଼ ନୁହନ୍ତି କି କେହି ଛୋଟ ନୁହନ୍ତି । ତେଣୁ ନିଜକୁ ବଡ଼ ବୋଲି ଭାବିବା କେବଳ ଅଜ୍ଞତା ମାତ୍ର, ଆଉ କିଛି ନୁହଁ ।
ପଢ଼ିଥିବା ହେତୁ ଆପଣଙ୍କ ନିକଟରେ କୃତଜ୍ଞ । ଆସନ୍ତୁ ପ୍ରତ୍ୟେକ ଦିନ ଆମେ "ଅମୃତ ବିନ୍ଦୁ' ମାଧ୍ୟମରେ ଜୀବନର କେତେ କଥା ବାବଦରେ ଜାଣିବା । ନମସ୍କାର ।