ମାନ୍ଦାବସ୍ଥା ଆଡ଼କୁ ବିଶ୍ୱ ଅର୍ଥନୀତି
Henamanjaree Swain
ୱାଶିଂଟନ୍ : ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କ ଶୁଳ୍କ ବୃଦ୍ଧି ବିଶ୍ୱ ଅର୍ଥନୀତିକୁ ମାନ୍ଦାବସ୍ଥା ଆଡ଼କୁ ଭିଡ଼ିନେବ । ଆନ୍ତର୍ଜାତିକ ଅର୍ଥନୀତିଜ୍ଞମାନେ ଏଭଳି ଆକଳନ କରିଛନ୍ତି । ଏହାର ପ୍ରଭାବ ଆମେରିକା ଷ୍ଟକ ବଜାରରେ ପଡ଼ିଛି । ଆଜି ଡାଓ ଜୋନସର ଶିଳ୍ପ ସୂଚକାଙ୍କ ୧୧ ଶହ ପଏଣ୍ଟ ହ୍ରାସ ପାଇଥିବାବେଳେ ନାସଡାକ୍ ୮୦୦ ପଏଣ୍ଟ ତଳକୁ ଖସିଯାଇଛି । ଆମେରିକାର ଷ୍ଟକ ବଜାର ଖୋଲୁଖୋଲୁ ଆଜି ଏଭଳି ସ୍ଥିତି ଦେଖିବାକୁ ମିଳିଥିଲା । ଟିକସ ବୃଦ୍ଧି ଦ୍ୱାରା ଆମେରିକା ଅର୍ଥନୀତି ଲାଭବାନ ହେବବୋଲି ଟ୍ରମ୍ପ ଦାବି କରିଥିବାବେଳେ ଆମେରିକାରେ କିନ୍ତୁ ତାହାର ନକରାତ୍ମକ ପ୍ରଭାବ ପରିଲକ୍ଷିତ ହୋଇଛି । ଆପଲ୍, ନାଇକ ଭଳି ବ୍ରାଣ୍ଡ ବି ଘୋର ପ୍ରଭାବିତ ହୋଇଛନ୍ତି । ଏହାଛଡ଼ା ଆମାଜନ, ୱାଲମାର୍ଟ, ଟାରଗେଟ, ମାଇକ୍ରୋସଫ୍ଟ, ଆଲଫାବେଟ, ଡେଲ ଓ ଏଚପିର ସେୟାର ମୂଲ୍ୟ ମଧ୍ୟ କମିଯାଇଛି । ଟ୍ରମ୍ପଙ୍କ ଏଭଳି ନିଷ୍ପତ୍ତି ବିଶ୍ୱ ଯୋଗାଣ ଶୃଙ୍ଖଳକୁ ବ୍ୟାହତ କରିଛି । ଏହାର ପ୍ରଭାବ ଅନ୍ୟ ପ୍ରମୁଖ ଦେଶର ଷ୍ଟକ ବଜାରରେ ପଡ଼ିବାର ବି ଆଶଙ୍କା ରହିଛି । ଏସୀୟ ଦେଶଗୁଡ଼ିକ ଟ୍ରମ୍ପଙ୍କ ରେସିପ୍ରୋକାଲ ଟାରିଫ୍ ବା ପାରସ୍ପରିକ ଶୁଳ୍କ ଯୋଗୁଁ ବେଶୀ ପ୍ରଭାବିତ ହୋଇଛନ୍ତି । ଚାଇନା ପାଇଁ ଟିକସ ୫୪%, ଭିଏତନାମ ପାଇଁ ୪୬%, କାମ୍ବୋଡ଼ିଆ ପାଇଁ ୪୯% ଓ ଇଣ୍ଡୋନେସିଆ ନିମନ୍ତେ ୩୨% ବୃଦ୍ଧିପାଇଛି ।
