ସ୍ତ୍ରୀ ଆତ୍ମହତ୍ୟା ଧମକ ଏବଂ ଝଗଡ଼ା କରିବା ସ୍ୱାମୀ ପ୍ରତି ମାନସିକ ଅତ୍ୟାଚାର : ଓଡ଼ିଶା ହାଇକୋର୍ଟ
Henamanjaree Swain
ଭୁବନେଶ୍ୱର : ଜଣେ ସ୍ତ୍ରୀ ବାରମ୍ବାର ଆତ୍ମହତ୍ୟା ଏବଂ ଝଗଡା କରିବାର ଧମକ ଦେବା ସ୍ୱାମୀଙ୍କ ପ୍ରତି ମାନସିକ ଅତ୍ୟାଚାର ବୋଲି ଓଡ଼ିଶା ହାଇକୋର୍ଟ ମତ ଦେଇଛନ୍ତି । ଛାଡପତ୍ର ମାମଲାରେ ପରିବାର କୋର୍ଟଙ୍କ ବିବାହ ଭାଙ୍ଗିବା ଆଦେଶକୁ ବଜାୟ ରଖି ସର୍ବୋଚ୍ଚ ଅଦାଲତ ଏହି ଟିପ୍ପଣୀ କରିଛନ୍ତି ।
ସୂଚନା ଅନୁଯାୟୀ, ୨୦୦୩ ମସିହାରେ ବିବାହ କରିଥିବା ଜଣେ ବ୍ୟକ୍ତି ୨୦୦୯ ମସିହାରେ ନିଷ୍ଠୁରତାର ଆଧାରରେ ଛାଡପତ୍ର ମାଗିଥିଲେ । ତାଙ୍କ ସ୍ତ୍ରୀଙ୍କ ଆଚରଣ ପାଇଁ ତାଙ୍କ ପକ୍ଷେ ବିବାହ ଜାରି ରଖିବା ଅସମ୍ଭବ ହୋଇପଡିଛି ବୋଲି ସେ କୋର୍ଟକୁ କହିଥିଲେ । ନିରନ୍ତର ଝଗଡା, ଆର୍ଥିକ ନିୟନ୍ତ୍ରଣ, ବାରମ୍ବାର ଆତ୍ମହତ୍ୟାର ଧମକ ଏବଂ ତାଙ୍କ ବୃଦ୍ଧ ପିତାମାତାଙ୍କୁ ତାଙ୍କ ବଳପୂର୍ବକ ବାହାର କରିଦେବା ଆଦି ତାଙ୍କ ଅଭିଯୋଗର ଅନ୍ତର୍ଭୁକ୍ତ ଥିଲା । ମାମଲାର ଶୁଣାଣିକରି, କଟକର ପରିବାର ଅଦାଲତ ସ୍ୱାମୀଙ୍କ ଦ୍ୱାରା ସ୍ଥାୟୀ ଭରଣପୋଷଣ ଭାବରେ ୬୩ ଲକ୍ଷ ଟଙ୍କା ପ୍ରଦାନ କରିବା ସହ ବିବାହ ଭାଙ୍ଗିବା ପାଇଁ ମଞ୍ଜୁରୀ ଦେଇଥିଲେ । ତଥାପି, ମହିଳା ଜଣକ ପରେ ତାଙ୍କ ଦାମ୍ପତ୍ୟ ଜୀବନକୁ ଫେରାଇ ଆଣିବା ପାଇଁ ଓଡ଼ିଶା ହାଇକୋର୍ଟରେ ପରିବାର କୋର୍ଟଙ୍କ ଆଦେଶକୁ ଚ୍ୟାଲେଞ୍ଜ କରିଥିଲେ ।
ଅଦାଲତଙ୍କ ପର୍ଯ୍ୟବେକ୍ଷଣ:
ବିଚାରପତି ବିପି ରାଉତରାୟ ଏବଂ ଚିତ୍ତରଞ୍ଜନ ଦାଶଙ୍କ ଦୁଇଜଣିଆ ଖଣ୍ଡପୀଠ କହିଛନ୍ତି ଯେ :- “ଜୀବନସାଥୀ ଏବଂ ତାଙ୍କ ପରିବାର ସଦସ୍ୟଙ୍କୁ କ୍ଷତି ପହଞ୍ଚାଇବା ଏବଂ ବାରମ୍ବାର ଆତ୍ମହତ୍ୟା କିମ୍ବା ତାଠାରୁ ଖରାପ ଧମକ, ଭାବପ୍ରବଣତାକୁ ଅତିକ୍ରମ କରିଯାଏ, ଏହା ଭାବପ୍ରବଣ ଦୁର୍ବଳତାର ଘୋର ଅପବ୍ୟବହାର ଏବଂ ମାନସିକ ଯୁଦ୍ଧର ଏକ ସ୍ପଷ୍ଟ ରୂପକୁ ଦର୍ଶାଇଥାଏ,”
“ଏପରି ଆଚରଣର ପ୍ରଭାବ କେବଳ ବୈବାହିକ ଘରର ଚାରି କାନ୍ଥ ମଧ୍ୟରେ ସୀମିତ ରହେନି ବରଂ ପୀଡିତ ପତି/ପତ୍ନୀଙ୍କ ମାନସିକ ସ୍ୱାସ୍ଥ୍ୟ ଏବଂ ଭାବପ୍ରବଣ ସ୍ଥିରତା ଉପରେ ଏକ ସ୍ଥାୟୀ ଦାଗ ଛାଡିଥାଏ,” ବୋଲି ଖଣ୍ଡପୀଠ କହିଛନ୍ତି ।
