୩ ଦିନ ମଧ୍ୟରେ ଅର୍ଥ ଜମା ନହେଲେ ହେବ ମାମଲା
Rasmita Behera
କେନ୍ଦୁଝର: ଚମ୍ପୁଆ ରେଞ୍ଜ ଅନ୍ତର୍ଗତ କାଳିକାପ୍ରସାଦ ସଂରକ୍ଷିତ ଜଙ୍ଗଲରେ ୨୫୦୫ ୟୁକାଲିପଟାସ ଗଛ କଟାଯିବା ପାଇଁ କୃଷ୍ଣପୁର ବନ ସୁରକ୍ଷା ସମିତିକୁ ବନ ବିଭାଗ ୦୪/୦୫/୨୦୨୪ରେ ଅନୁମତି ଦେଇଥିଲା । ତେବେ ଅନୁମତି ଠାରୁ ଅଧିକ ଗଛ କଟାଯାଇଥିବା ଘଟଣାରେ ବନ ବିଭାଗ ପକ୍ଷରୁ ବନ ସୁରକ୍ଷା ସମିତିର ସଭାପତି ରଞ୍ଜନ କୁମାର ମହାନ୍ତଙ୍କ ସମେତ ୧୩ ଜଣଙ୍କ ନାମରେ ମାମଲା ରୁଜୁ ହୋଇଥିଲା । ତଦନ୍ତ ବେଳେ ଗଛ କଟା ବାବଦକୁ ଆଦାୟ ୩୦ ଲକ୍ଷ ୬୫ ହଜାର ଟଙ୍କା କୃଷ୍ଣପୁର ବନ ସୁରକ୍ଷା ସମିତିର ବ୍ୟାଙ୍କ ଅକାଉଣ୍ଟରେ ଜମା ନହୋଇ ସେମାନଙ୍କର ବ୍ୟକ୍ତିଗତ ବ୍ୟାଙ୍କ ଖାତାରେ ଜମା ହୋଇଥିଲା । ଏଣୁ ଉକ୍ତ ଟଙ୍କା ୩ ଦିନ ମଧ୍ୟରେ କୃଷ୍ଣପୁର ବନ ସୁରକ୍ଷା ସମିତି ଆକାଉଣ୍ଟରେ ଜମା କରିବାକୁ ଚମ୍ପୁଆ ରେଞ୍ଜ ଅଫିସର ଦାୟିତ୍ୱରେ ଥିବା ଏସିଏଫ୍ ଅକ୍ଷୟ ଛତ୍ରିଆ ଚିଠି ନମ୍ବର ୩୩୮୮ରେ ଭିଏସ୍ଏସ୍ ସଭାପତିଙ୍କୁ ଚିଠି କରିଛନ୍ତି । ଉକ୍ତ ଅର୍ଥ ୩ ଦିନ ମଧ୍ୟରେ ଜମା ନକଲେ ଅର୍ଥ ହଡପ ମାମଲା ରୁଜୁ କରାଯିବ । ଗଛ କଟାପରେ ନିମୟ ଅନୁସାରେ ବିକ୍ରୀ ବାବଦ ଅର୍ଥ ବନ ସୁରକ୍ଷା ସମିତିର ବ୍ୟାଙ୍କ ଆକାଉଣ୍ଟରେ ଜମା ହେବ । ଉକ୍ତ ଗଛ କଟାଯାଇ ବିକି୍ର କରାଯିବା ପରେ ଏହି ବିକ୍ରୟ ମୂଲ୍ୟର ୪୦ ପ୍ରତିଶତ ଗାଁର ଉନ୍ନତିକରଣ,୪୦ ପ୍ରତିଶତ ଭିଏସ୍ଏସ୍ ସଦସ୍ୟ ଥିବା ଗ୍ରାମବାସୀମାନଙ୍କ ମଧ୍ୟରେ ବଣ୍ଟାଯିବ ଏବଂ ଅବଶିଷ୍ଟ ୨୦ ପ୍ରତିଶତ ଅର୍ଥ ଗଛ କଟାଯାଇଥିବା ଜଙ୍ଗଲରେ ପୁନର୍ବାର ବୃକ୍ଷରୋପଣ ପାଇଁ ଜମା ରଖିବାର ବ୍ୟବସ୍ଥା ରହିଛି । ସୂଚନାଯୋଗ୍ୟ ଯେ, ଗଛ କଟା କାମରେ କୃଷ୍ଣପୁର ଗ୍ରାମବାସୀଙ୍କୁ କାଟିବା ପାଇଁ ଅନୁମତି ଥିବାବେଳେ ସେମାନେ ବେସରକାରୀ ଲୋକଙ୍କୁ ଲଗାଇ ୨ହଜାର ରୁ ଅଧିକ ଗଛ କାଟି ନେଇଥିଲେ ।
