୪୫ ଲକ୍ଷ ଇନାମି ମହିଳା ମାଓବାଦୀ ନିହତ
Rasmita Behera
ମାଲକାନଗିରି: ମାଲକାନଗିରି ଜିଲ୍ଲା ସୀମାନ୍ତ ଛତିଶଗଡରେ ଗତ ୩ ଦିନ ମଧ୍ୟରେ ମାଓବାଦୀ ଓ ଯବାନଙ୍କ ମଧ୍ୟରେ ବିଭିନ୍ନ ସ୍ଥାନରେ ଗୁଳି ବିନିମୟ ହେଉଥିବା ସହ ବହୁ ମାଓବାଦୀ ନିହତ ହୋଇଥିବା ବେଳେ ଆଜି ପୁଣି ଜଣେ ୪୫ ଲକ୍ଷ ଇନାମି କୁଖ୍ୟାତ ମହିଳା ମାଓବାଦୀ ଯବାନଙ୍କ ଗୁଳିରେ ନିହତ ହୋଇଛି । ସୂଚନା ଅନୁଯାୟୀ ଛତିଶଗଡର ଦନ୍ତେୱାଡା ଓ ବିଜାପୁର ସୀମାନ୍ତବର୍ତ୍ତୀ ଗ୍ରାମ ନେଲଗୋଡା, ଇକେଲି, ବେଲନାର ମଧ୍ୟ ଜଙ୍ଗଲରେ ମାଓ ଦମନ ନିମନ୍ତେ ଜିଲ୍ଲା ପୁଲିସ, ଡିଆରଜି, ବସ୍ତର ଫାଇଟର୍ସର ମିଳିତ ଦଳ ତଲାସି କରୁଥିବା ବେଳେ ଯବାନ ଓ ମାଓବାଦୀଙ୍କ ମଧ୍ୟରେ ମୁହାଁ ମୁହିଁ ହେବା ସହ ଗୁଳିବିନିମୟ ଘଟିଥିଲା । ଏହି ଗୁଳିବିନିମୟରେ ଜଣେ ମହିଳା ମାଓବାଦୀର ମୃତୁ୍ୟ ହୋଇଥିବା ବେଳେ ଅନ୍ୟ ମାଓବାଦୀମାନେ ସେଠାରୁ ଫେରାର ହୋଇଯାଇଛନ୍ତି । ତେବେ ଘଟଣାସ୍ଥଳରୁ ଗୋଟିଏ ଇନସାସ ରାଇଫଲ ସହ ବହୁ ମାତ୍ରାରେ ମାଓ ସାମଗ୍ରୀ ଜବତ କରାଯାଇଛି । ମୃତ ମାଓବାଦୀ ଜଣଙ୍କ ହେଲେ ରେଣୁକା ଓରଫ ଚେତ । ସେ ମାଓ ସଂଗଠନର କେନ୍ଦ୍ରୀୟ ଆଞ୍ଚଳିକ ବୁ୍ୟର ଚିଫ୍ ଏବଂ ପ୍ରେସ୍ଟିମ୍ର ଇନଚାର୍ଜ ଥିବା ବେଳେ ଜଣେ ବିଏଏଲଏଲବି ଡିଗ୍ରୀ ଧାରୀ ଥିବା ଜଣାପଡିଛି । ତେବେ ମୃତ ମାଓବାଦୀ ନାମରେ ତେଲେଙ୍ଗାନାରେ ସରକାରଙ୍କ ପକ୍ଷରୁ ୨୦ ଲକ୍ଷର ପୁରସ୍କାର ଘୋଷଣା ହୋଇଥିବା ବେଳେ ଛତିଶଗଡରେ ୨୫ ଲକ୍ଷ ଟଙ୍କାର ପୁରସ୍କାର ଘୋଷଣା ହୋଇଥିଲା ।
