ଆତତାୟୀଙ୍କ ଗୁଳିମାଡ଼ରେ ୨ ଯବାନ ସହିଦ୍
Henamanjaree Swain
ଇମ୍ଫାଲ : ଆତତାୟୀଙ୍କ ଗୁଳିମାଡ଼ରେ ସହିଦ ହୋଇଛନ୍ତି ୨ଜଣ ଯବାନ । ଏଥିରେ ୪ଜଣ ଯବାନ ଆହତ ହୋଇଛନ୍ତି । ଶୁକ୍ରବାର ସନ୍ଧ୍ୟାରେ ବିଷ୍ଣୁପୁର ଜିଲ୍ଲାରେ ଅଜ୍ଞାତ ବନ୍ଧୁକଧାରୀମାନେ ସୁରକ୍ଷା କନଭୟ ଉପରେ ଆକ୍ରମଣ କରିବାରୁ ୨ ଜଣ ଆସାମ ରାଇଫଲ୍ସ ଯବାନଙ୍କ ମୃତ୍ୟୁ ଘଟିଛି । ୪ ଜଣ ଯବାନ ଆହତ ହୋଇଥିବା ମଣିପୁରର ବରିଷ୍ଠ ପୁଲିସ ଅଧିକାରୀ କହିଛନ୍ତି ।
ସନ୍ଧ୍ୟା ପ୍ରାୟ ୬ଟା ସମୟରେ ୩୩ ଜଣ ଆସାମ ରାଇଫଲ୍ସ କର୍ମଚାରୀଙ୍କୁ ନେଇ ଗାଡିଟି ଇମ୍ଫାଲରୁ ବିଷ୍ଣୁପୁର ଅଭିମୁଖେ ଯାଉଥିବା ବେଳେ ଏହି ଆକ୍ରମଣ ଘଟିଥିଲା । ଆହତମାନଙ୍କୁ ନିକଟସ୍ଥ ହସ୍ପିଟାଲରେ ଭର୍ତ୍ତି କରାଯାଇଛି । ମଣିପୁର ରାଜ୍ୟପାଳ ଅଜୟ କୁମାର ଭଲ୍ଲା ଏହି ଆକ୍ରମଣକୁ "ହିଂସାତ୍ମକ ଘୃଣ୍ୟ କାର୍ଯ୍ୟ’ ବୋଲି କହିଛନ୍ତି । ରାଜଭବନ ଦ୍ୱାରା ଏକ୍ସରେ ସେୟାର କରାଯାଇଥିବା ଏକ ବିବୃତ୍ତିରେ ରାଜ୍ୟପାଳ ଦୁଇ ଜଣ ଆସାମ ରାଇଫଲ୍ସ ଯବାନଙ୍କ ମୃତ୍ୟୁ ଉପରେ ଗଭୀର ଶୋକ ପ୍ରକାଶ କରିଛନ୍ତି, ସେମାନଙ୍କ ପରିବାର ପ୍ରତି ସମବେଦନା ଜଣାଇଛନ୍ତି । ଆହତଙ୍କ ଶୀଘ୍ର ଆରୋଗ୍ୟ ପାଇଁ ପ୍ରାର୍ଥନା କରିଛନ୍ତି । ରାଜ୍ୟପାଳ ପୁନଃନିର୍ଦ୍ଦେଶ ଦେଇଛନ୍ତି ଯେ ଏପରି ଘୃଣ୍ୟ ହିଂସାକୁ କୌଣସି ପରିସ୍ଥିତିରେ ବରଦାସ୍ତ କରାଯିବ ନାହିଁ ଏବଂ ଚେତାବନୀ ଦେଇଛନ୍ତି ଯେ ଏହି ଅଞ୍ଚଳରେ ଶାନ୍ତି ଓ ସ୍ଥିରତା ରକ୍ଷା କରିବା ପାଇଁ ସେମାନଙ୍କୁ ଦୃଢ଼ ସଂକଳ୍ପ ନିଆଯିବ ବୋଲି ପୋଷ୍ଟରେ ଲେଖାଯାଇଛି । ମଣିପୁରର ପୂର୍ବତନ ମୁଖ୍ୟମନ୍ତ୍ରୀ ଏନ ବୀରେନ ସିଂହ ମଧ୍ୟ ଏହି ଆକ୍ରମଣକୁ କଡ଼ା ଶବ୍ଦରେ ନିନ୍ଦା କରିଛନ୍ତି, ଏହାକୁ ରାଜ୍ୟ ପାଇଁ ଏକ "ନିଷ୍ଠୁର ଆଘାତ’ ବୋଲି କହିଛନ୍ତି । ନାମ୍ବୋଲ ସବାଲ ଲାଇକାଇରେ ଆମର ସାହସୀ ୩୩ ଆସାମ ରାଇଫଲ୍ସ ଦ୍ଭ କର୍ମଚାରୀଙ୍କ ଉପରେ ହୋଇଥିବା ଆକ୍ରମଣ ବିଷୟରେ ଶୁଣି ମୁଁ ଗଭୀର ଭାବରେ ମର୍ମାହତ । ଦୁଇ ଜଣ ଯବାନଙ୍କ ମୃତ୍ୟୁ ଏବଂ ଅନେକ ଆହତ ହେବା ଆମ ସମସ୍ତଙ୍କ ପାଇଁ ଏକ ନିଷ୍ଠୁର ଆଘାତ ବୋଲି ସେ ଏକ୍ସରେ ଏକ ପୋଷ୍ଟରେ କହିଛନ୍ତି । ଆସାମ ରାଇଫଲ୍ସ ଓ ରାଜ୍ୟ ପୁଲିସ ଦ୍ୱାରା ଏକ ମିଳିତ ସର୍ଚ୍ଚ ଅପରେସନ ବର୍ତ୍ତମାନ ଅଞ୍ଚଳରେ ଚାଲୁ ରହିଛି ।
