ଆମେରିକା ପାଇଁ ଭାରତ ଗୁରୁତ୍ୱପୂର୍ଣ୍ଣ : ଗୋର୍‌

• ଭାରତ ଆସିବେ ଟ୍ରମ୍ପ

• ଆଜିଠୁ ପୁଣି ବାଣିଜ୍ୟ ଚୁକ୍ତି ଆଲୋଚନା

ନୂଆଦିଲ୍ଲୀ : ଶୁଳ୍କ ବିବାଦ ମଧ୍ୟରେ ଆସିଛି ବଡ ଖବର । ଆମେରିକା ପାଇଁ ଅନ୍ୟ ରାଷ୍ଟ୍ର ଅପେକ୍ଷା ଭାରତ ଅତ୍ୟନ୍ତ ଗୁରୁତ୍ୱପୂର୍ଣ୍ଣ ବୋଲି ଆମେରିକାର ନୂଆ ରାଷ୍ଟ୍ରଦୂତ ସର୍ଜିଓ ଗୋର୍‌ କହିଛନ୍ତି । ସେ ଘୋଷଣା କରିଛନ୍ତି ଯେ ୱାଶିଂଟନ୍‌ ଓ ନୂଆଦିଲ୍ଲୀ ମଙ୍ଗଳବାର ଠାରୁ ସେମାନଙ୍କର ପରବର୍ତ୍ତୀ ପର୍ଯ୍ୟାୟ ବାଣିଜ୍ୟ ଚୁକ୍ତି ଆଲୋଚନା ପୁଣି ଆରମ୍ଭ କରିବାକୁ ଯାଉଛନ୍ତି । ଆମେରିକା ଦୂତାବାସରେ ଦକ୍ଷିଣ ଓ ମଧ୍ୟ ଏସିଆ ପାଇଁ ସ୍ୱତନ୍ତ୍ର ଦୂତ ଥିବା ଗୋର୍‌ ମଧ୍ୟ କହିଛନ୍ତି ଯେ ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ଆସନ୍ତା ବର୍ଷ ସୁଦ୍ଧା ଭାରତ ଗସ୍ତ କରିପାରନ୍ତି । ଦିଲ୍ଲୀରେ ଆମେରିକୀୟ ଦୂତାବାସରେ ଭାଷଣ ଦେଇ ଗୋର୍‌ ଦୃଢ଼ତାର ସହିତ କହିଛନ୍ତି ଯେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ସହିତ ଟ୍ରମ୍ପଙ୍କ ବନ୍ଧୁତା "ପବିତ୍ର’ । ପ୍ରକୃତ ବନ୍ଧୁମାନେ ସେମାନଙ୍କର ମତଭେଦକୁ ସମାଧାନ କରିପାରିବେ । ଯୁକ୍ତରାଷ୍ଟ୍ର ଓ ଭାରତ କେବଳ ସମାନ ସ୍ୱାର୍ଥ ଦ୍ୱାରା ନୁହେଁ ବରଂ ସର୍ବୋଚ୍ଚ଼ ସ୍ତରରେ ସ୍ଥାପିତ ସମ୍ପର୍କ ଦ୍ୱାରା ବନ୍ଧା ହୋଇଛି । ପ୍ରକୃତ ବନ୍ଧୁମାନେ ମତଭେଦ କରିପାରିବେ କିନ୍ତୁ ଶେଷରେ ସର୍ବଦା ସେମାନଙ୍କର ମତଭେଦକୁ ସମାଧାନ କରିପାରିବେ ବୋଲି ସେ ତାଙ୍କ ଆଗମନ ଭାଷଣରେ କହିଥିଲେ । ଭାରତ ବିଶ୍ୱର ସର୍ବବୃହତ ରାଷ୍ଟ୍ର । ତେଣୁ ଏହାକୁ ଶେଷ ରେଖା ପାର କରିବା ଏକ ସହଜ କାମ ନୁହେଁ, କିନ୍ତୁ ଆମେ ସେଠାରେ ପହଞ୍ଚିବାକୁ ସ୍ଥିର ବୋଲି ଗୋର୍‌ ଆହୁରି କହିଛନ୍ତି । ସେ ଉଲ୍ଲେଖ କରିଛନ୍ତି ଯେ ନୂଆଦିଲ୍ଲୀ ଓ ୱାଶିଂଟନର ସମ୍ପର୍କ ପାଇଁ ବାଣିଜ୍ୟ ଅତ୍ୟନ୍ତ ଗୁରୁତ୍ୱପୂର୍ଣ୍ଣ ହୋଇଥିଲେ ମଧ୍ୟ ଉଭୟ ରାଷ୍ଟ୍ର ସୁରକ୍ଷା, ଆତଙ୍କବାଦ ବିରୋଧୀ, ଶକ୍ତି, ପ୍ରଯୁକ୍ତିବିଦ୍ୟା, ଶିକ୍ଷା ଏବଂ ସ୍ୱାସ୍ଥ୍ୟ ଭଳି ଅନ୍ୟାନ୍ୟ ଗୁରୁତ୍ୱପୂର୍ଣ୍ଣ କ୍ଷେତ୍ରରେ ମଧ୍ୟ ଏକତ୍ର କାମ କରିଚାଲିଛନ୍ତି ।

   "ମୁଁ ରାଷ୍ଟ୍ରପତି ଟ୍ରମ୍ପଙ୍କ ସହିତ ସାରା ବିଶ୍ୱ ଭ୍ରମଣ କରିଛି ଏବଂ ମୁଁ ପ୍ରମାଣିତ କରିପାରିବି ଯେ ପ୍ରଧାନମନ୍ତ୍ରୀ ମୋଦିଙ୍କ ସହ ତାଙ୍କର ବନ୍ଧୁତା ପ୍ରକୃତ ବୋଲି ଗୋର୍‌ ଜୋର ଦେଇଛନ୍ତି । ତାଙ୍କ ନିଯୁକ୍ତିର ଉଦ୍ଦେଶ୍ୟ ହେଉଛି ଆମ ଦୁଇ ରାଷ୍ଟ୍ର ମଧ୍ୟରେ ସହଭାଗିତାକୁ ପରବର୍ତ୍ତୀ ସ୍ତରକୁ ନେବା । ସେ ଏହା ମଧ୍ୟ କହିଛନ୍ତି ଯେ ଟ୍ରମ୍ପ ଆସନ୍ତା ବର୍ଷ ସୁଦ୍ଧା ଭାରତ ଗସ୍ତ କରିପାରନ୍ତି । ଏହା ବିଶ୍ୱର ସର୍ବପୁରାତନ ଗଣତନ୍ତ୍ର ଓ ବିଶ୍ୱର ସର୍ବବୃହତ ଗଣତନ୍ତ୍ର ମଧ୍ୟରେ ସଂଯୋଗ ସ୍ଥାପନ କରୁଛି । ରାଷ୍ଟ୍ରପତି ଟ୍ରମ୍ପଙ୍କର ରାତି ୨ଟାରେ ଫୋନ୍‌ କରିବାର ଅଭ୍ୟାସ ଅଛି ଏବଂ ଏହା ନୂଆଦିଲ୍ଲୀ ସମୟ ଅନୁସାରେ ତାଙ୍କ ପାଇଁ ଏକ ଭଲ ସମୟ ବୋଲି  ମଜାଳିଆ ଢଙ୍ଗରେ କହିଛନ୍ତି ଗୋର । ଗୋର ମଧ୍ୟ ଘୋଷଣା କରିଛନ୍ତି ଯେ ଭାରତ ପ୍ୟାକ୍ସ ସିଲିକା ଆଲାଏନ୍ସର ସଦସ୍ୟ ହେବ । ମୁଁ ଘୋଷଣା କରି ଖୁସି ଯେ ଭାରତକୁ ଆସନ୍ତା ମାସରେ ଏହି ରାଷ୍ଟ୍ର ଗୋଷ୍ଠୀରେ ପୂର୍ଣ୍ଣ ସଦସ୍ୟ ଭାବରେ ଯୋଗଦେବାକୁ ନିମନ୍ତ୍ରଣ କରାଯିବ ବୋଲି ସେ କହିଛନ୍ତି । ପ୍ୟାକ୍ସ ସିଲିକା ଆଲାଏନ୍ସ ହେଉଛି ଏକ ସୁରକ୍ଷିତ, ସ୍ଥିର ଓ ନବସୃଜନଶୀଳ ସିଲିକନ୍‌ ଯୋଗାଣ ଶୃଙ୍ଖଳ ନିର୍ମାଣ ପାଇଁ ଆମେରିକା ନେତୃତ୍ୱରେ ଏକ ରଣନୈତିକ ପଦକ୍ଷେପ ।