ଘସିପୁରାରୁ ଲଢ଼ିବେ ସୌମ୍ୟରଞ୍ଜନ
ଘସିପୁରାରୁ ଲଢ଼ିବେ ସୌମ୍ୟରଞ୍ଜନ Soumyranjan Pattanaik
Ramachandi Prasad
ଭୁବନେଶ୍ୱର : ଏଥର ଲଢ଼ିବେ କି ସୌମ୍ୟରଞ୍ଜନ ? ଏହି ପ୍ରଶ୍ନ ଗତ କିଛିଦିନ ଧରି ରାଜ୍ୟ ରାଜନୀତିରେ ଆଲୋଡ଼ନ ସୃଷ୍ଟିକରିଛି । ତେବେ ଆଜି ସୌମ୍ୟ ପ୍ରଥମ ଥର ପାଇଁ ଏନେଇ ମୁହଁ ଖୋଲିଛନ୍ତି । ସେ କହିଛନ୍ତିଯେ, ଘସିପୁରାରୁ ବିଜେପି ଟିକେଟରେ ଲଢ଼ିବାକୁ ପ୍ରସ୍ତାବ ଆସିଛି । ସ୍ଥାନୀୟ ଲୋକମାନେ ମଧ୍ୟ ଏନେଇ ତାଙ୍କ ଉପରେ ଚାପ ପକାଉଛନ୍ତି । ତେଣୁ ସେ ମା’ ତାରିଣୀଙ୍କ ଦର୍ଶନ କରିଛନ୍ତି । ମା’ ତାଙ୍କୁ ସଦବୁଦ୍ଧି ଦିଅନ୍ତୁ ବୋଲି ସେ କହିଛନ୍ତି । ସେହିପରି ଖଣ୍ଡପଡ଼ାରୁ ବିଜେଡ଼ି ଟିକେଟ ଘୋଷଣା ନହୋଇଥିବାରୁ ମଧ୍ୟ ସୌମ୍ୟ ଟିପ୍ପଣୀ ଦେଇଛନ୍ତି ।
ଖଣ୍ଡପଡ଼ା ପାଇଁ ବିଜେଡ଼ି ଟିକେଟ ଘୋଷଣା ନକରିବା ପଛରେ କ’ଣ ରହସ୍ୟ ରହିଛି ବୋଲି ସେ ପ୍ରଶ୍ନ କରିଛନ୍ତି । ସୂଚନାଯୋଗ୍ୟଯେ, ଘସିପୁରା ହେଉଛି ପଟ୍ଟନାୟକ ପରିବାରର ଗଡ଼ । ସେଠାରେ ତାଙ୍କ ପରିବାରର ଭଲ ସଂଗଠନ ରହିଛି । ଗତ ନିର୍ବାଚନରେ ସେଠାରୁ ନିରଞ୍ଜନ ପଟ୍ଟନାୟକ ହାରିଥିଲେବି ଭଲ ଭୋଟ ପାଇଥିଲେ । ତେଣୁ ସୌମ୍ୟ କେଉଁ ଦଳରୁ ଲଢ଼ିବେ ବୋଲି ଗତ କିଛିଦିନ ଧରି ଚର୍ଚ୍ଚା ହୋଇ ଆସୁଥିଲା । କେହି କେହି ସେ ବିଜେଡ଼ିରୁ ଖଣ୍ଡପଡ଼ାରୁ ଲଢ଼ିବେ ବୋଲି କହୁଥିଲେତ ଆଉ କିଏ ସେ ଘସିପୁରାରୁ ବିଜେପି ପ୍ରାର୍ଥୀ ହୋଇପାରନ୍ତି ବୋଲି ଚର୍ଚ୍ଚା ହେଉଥିଲା ।
