ନବଜାତକଙ୍କୁ ଉପଯୁକ୍ତ ପୁଷ୍ଟି ଓ ଯତ୍ନ ଉପରେ ରାଜ୍ୟପାଳଙ୍କ ଗୁରୁତ୍ୱ

ଭୁବନେଶ୍ୱର : ପୃଷ୍ଠଭୂମି କିମ୍ବା ପରିସ୍ଥିତି ନିର୍ବିଶେଷରେ ପ୍ରତ୍ୟେକ ନବଜାତଙ୍କୁ ଉପଯୁକ୍ତ ପୁଷ୍ଟି, ଯତ୍ନ ଏବଂ ସୁରକ୍ଷା ପ୍ରଦାନ ଉପରେ ରାଜ୍ୟପାଳ ଡ଼.ହରି ବାବୁ କମ୍ଭମପାଟି ଗୁରୁତ୍ୱାରୋପ କରିଛନ୍ତି । ଆଜି ଇନଫାଣ୍ଟ ଆଣ୍ଡ ୟଙ୍ଗ ଚାଇଲଡ ଫିଡିଙ୍ଗ ଚାପ୍ଟରର ୧୫ତମ ଜାତୀୟ ସମ୍ମିଳନୀ ଏବଂ ଭାରତୀୟ ମାନବ କ୍ଷୀର ବ୍ୟାଙ୍କ ସଂଘର ୧୧ତମ ଜାତୀୟ ସମ୍ମିଳନୀର ଉଦଘାଟନୀ ସମାରୋହରେ ମୁଖ୍ୟ ଅତିଥି ଭାବେ ଯୋଗ ଦେଇ ରାଜ୍ୟପାଳ ଏହି ଗୁରୁତ୍ୱାରୋପ କରିଛନ୍ତି ।

     ଏହି ସମାରୋହରେ ଉଦବୋଧନ ଦେଇ ଚଳିତ ବର୍ଷ ସମ୍ମିଳନୀର ବିଷୟବସ୍ତୁ, "ଆସନ୍ତା କାଲିର ଐତିହ୍ୟକୁ ପାଳନ କରିବା: ସ୍ଥାୟୀ ନବଜାତ ଏବଂ ଶିଶୁ ଖାଦ୍ୟ ଏବଂ ସ୍ତନ୍ୟପାନ ଅଭ୍ୟାସକୁ ଗ୍ରହଣ କରିବା,’ ଉପରେ ଆଲୋକପାତ କରି ଏହା ଏକ ମହାନ ଗୁରୁତ୍ୱପୂର୍ଣ୍ଣ ବାର୍ତ୍ତା ପ୍ରଦାନ କରେ ବୋଲି ରାଜ୍ୟପାଳ କହିଥିଲେ । ଏହା ଆମକୁ ମନେ ପକାଇ ଦିଏ ଯେ ଏକ ଜାତିର ସ୍ୱାସ୍ଥ୍ୟ, ବୁଦ୍ଧି ଏବଂ ଜୀବନଶକ୍ତି ଏହାର ଭବିଷ୍ୟତ ନାଗରିକମାନଙ୍କୁ ଦିଆଯାଉଥିବା ପୁଷ୍ଟି ଏବଂ ଯତ୍ନରେ ଗଭୀର ଭାବରେ ନିହିତ । ଗର୍ଭଧାରଣରୁ ଆରମ୍ଭ କରି ଶିଶୁର ଦ୍ୱିତୀୟ ଜନ୍ମଦିନ ପର୍ଯ୍ୟନ୍ତ ଜୀବନର ପ୍ରଥମ ଏକ ହଜାର ଦିନ ଶାରୀରିକ ବିକାଶ, ମସ୍ତିଷ୍କ ବିକାଶ ଏବଂ ଜୀବନବ୍ୟାପୀ ସୁସ୍ଥତା ପାଇଁ ସବୁଠାରୁ ଗୁରୁତ୍ୱପୂର୍ଣ୍ଣ ସମୟକୁ ପ୍ରତିନିଧିତ୍ୱ କରେ ।

     ମା' କ୍ଷୀରର ପ୍ରତ୍ୟେକ ବୁନ୍ଦା କେବଳ ପୁଷ୍ଟି ନୁହେଁ ବରଂ ପ୍ରେମ, ରୋଗ ପ୍ରତିରୋଧକତା ଏବଂ ଭାବପ୍ରବଣତା ବହନ କରେ ଯାହାକୁ କୌଣସି ବିଜ୍ଞାନ ପୁନରାବୃତ୍ତି କରିପାରିବ ନାହିଁ ବୋଲି ରାଜ୍ୟପାଳ କହିଥିଲେ । ଶିଶୁ ସ୍ୱାସ୍ଥ୍ୟକୁ ଆଗକୁ ବଢାଇବା ପାଇଁ ରାଜ୍ୟପାଳ ଆୟୋଜକମାନଙ୍କୁ ସେମାନଙ୍କର ପ୍ରତିବଦ୍ଧତା ପାଇଁ ପ୍ରଶଂସା କରିବା ସହିତ ଅଭିନନ୍ଦନ ଜଣାଇଥିଲେ । ଏହି ସମାରୋହରେ ଏଚଏମବିର ସେକ୍ରେଟାରୀ ଡା.କନ୍ୟା ମୁଖୋପାଧ୍ୟାୟ, ଆଇୱାଇସିଏଫର ସେକ୍ରେଟାରୀ ଡା.ଜୟ ସିଂ ବକ୍ତବ୍ୟ ପ୍ରଦାନ କରିଥିଲେ । ପ୍ରାରମ୍ଭରେ ସାଇଣ୍ଟିଫିକ କମିଟିର ଅଧ୍ୟକ୍ଷ ଡା.ବ୍ରଜକିଶୋର ବେହେରା ସ୍ୱାଗତ ଭାଷଣ ପ୍ରାଦନ କରିଥିବା ବେଳେ ଶେଷରେ କୋ-ଅର୍ଗାନାଇଜେସନ ସେକ୍ରେଟାରୀ ଡା.ପ୍ରତୀକ ଦେ ଧନ୍ୟବାଦ ଅର୍ପଣ କରିଥିଲେ । ଏହି ଅବସରରେ ଆଇୱାଇସିଏଫ ଏବଂ ଏଚଏମବିର ଜାତୀୟ କର୍ମକର୍ତ୍ତାଙ୍କୁ ସମ୍ବର୍ଦ୍ଧିତ କରାଯାଇଥିଲା ।