‘ରାଜ୍ୟରେ ଡରୁଛନ୍ତି ମହିଳା’

ଭୁବନେଶ୍ୱର: ଘରେ କି ବାହାରେ ମହିଳା ସୁରକ୍ଷିତ ନାହାନ୍ତି  । ଘରୁ ବାହାରିବାକୁ ମହିଳାମାନେ ଡରୁଛନ୍ତି  । ଥାନାକୁ ବିଜେପି କର୍ମୀମାନେ ଲିଜ୍ରେ ନେଇ ଯାଇଛନ୍ତି  । ସେମାନଙ୍କ ଦାଉରୁ ଥାନାକୁ ରକ୍ଷା କରାଯାଉ  । ଏଭଳି ଢଙ୍ଗରେ ବିରୋଧୀ ସରକାରଙ୍କୁ ଟାର୍ଗେଟ୍ କରିଛନ୍ତି  ।
ଅପରପକ୍ଷରେ ଏହାର ଜବାବରେ ଆଇନ୍ ମନ୍ତ୍ରୀ ପୃଥ୍ୱୀରାଜ ହରିଚନ୍ଦନ କହିଲେଯେ, ପୂର୍ବ ସରକାର କହୁଥିଲେ ଆଇନ୍ ତା’ବାଟରେ ଯିବ  । କାହିଁକିନା ସେମାନେ ଅସହାୟ ଥିଲେ  । କିନ୍ତୁ ମୋହନ ସରକାରଙ୍କ ନୀତି ହେଉଛି, ଆଇନଠୁ କେହି ଉଦ୍ଧ୍ୱର୍ରେ ନୁହଁନ୍ତି  । ଅପରାଧି ଯେଉଁ ଦଳର ହୁଅନ୍ତୁ ବା ଯେଉଁ ବର୍ଗର ହୁଅନ୍ତୁ, ସେ ଯେତେ ପ୍ରଭାବଶାଳୀ ହେଲେବି ଆଇନରୁ ଉପରେ ନୁହଁନ୍ତି  । ଅପରାଧ ଓ ଅପରାଧିଙ୍କୁ ଧୂଳିସାତ୍ କରିବା ପାଇଁ ଆମେ ପ୍ରତିଶ୍ରୁତିବଦ୍ଧ  । ୨୪ରୁ ୪୮ ଘଣ୍ଟା ମଧ୍ୟରେ ଏବେ ଅପରାଧିଙ୍କୁ ଧରି ଆମେ ଜେଲ୍ରେ ଭର୍ତ୍ତି କରୁଛୁ  । ବିରୋଧୀ ଯାହା କହୁଛନ୍ତି ତାହା ତଥ୍ୟ ଉପରେ ଆଧାରିତ ନୁହେଁ  । ସରକାର ନୀରବ ନାହାନ୍ତି, ଘଟଣା ଘଟିବା ମାତ୍ରେ ଏବେ କାର୍ଯ୍ୟାନୁଷ୍ଠାନ ନିଆଯାଉଛି । ଅପରାଧ ଓ ଦଣ୍ଡବିଧାନର ହାରକୁ ଅନୁଶୀଳନ କରିବା ଦରକାର  । ଦଣ୍ଡର ଭୟ ଆସିଲେ ହିଁ ଅପରାଧ କମିପାରିବ  । ୨୪ ବର୍ଷ ଧରି ବିଜେଡ଼ି ସରକାର ଅପରାଧିଙ୍କୁ ଘଣ୍ଟ ଘୋଡ଼ାଇ ଆସୁଥିଲେ । ତୃତୀୟ ମହଲାରୁ ଅନୁମତି ନମିଳିଲେ ଗିରଫ କରାଯାଉନଥିଲା  । ଏନସିଆରବି ରିପୋର୍ଟରେ ପୂର୍ବ ସରକାର ଅମଳରେ ଓଡ଼ିଶା କେଉଁଠି ଥିଲା ତାହା ସମସ୍ତେ ଜାଣନ୍ତି  । ଆଗାମୀ ଦିନରେ ରିପୋର୍ଟ ଆସିଲେ ସେମାନେ ବୁଝିପାରିବେ ଆମ ସରକାର କି କି ପଦକ୍ଷେପ ଗ୍ରହଣ କରିଛନ୍ତି  ।
ମୁଲତବୀ ଆଲୋଚନା ଆରମ୍ଭ କରି କଂଗ୍ରେସ ବିଧାୟକ ଅଶୋକ ଦାସ କହିଲେଯେ, ମୁଖ୍ୟମନ୍ତ୍ରୀ କହୁଛନ୍ତି ଅପରାଧ ବଢ଼ିଛି, ହେଲେ ମନ୍ତ୍ରୀ କହୁଛନ୍ତି ଅପରାଧ କମିଛି  । ତଥ୍ୟଗତ ଅମେଳ ରହଛି  । ଆବାସିକ ବିଦ୍ୟାଳୟରେ ଦଶମ ଶ୍ରେଣୀ ଛାତ୍ରୀ ପରୀକ୍ଷା ବେଳେ ପ୍ରସବ କରୁଛନ୍ତି  । କେନ୍ଦୁଝରର ଜଣେ ୬ଷ୍ଠ ଶ୍ରେଣୀ ଛାତ୍ରୀ ଗଭର୍ବତୀ ହେଲେ  । ଗୋଟିଏ ପଟେ ‘ବେଟି ବଚାଅ ଓ ବେଟି ପଢ଼ାଅ’ର ନାରା ଦିଆଯାଉଛି  । କିନ୍ତୁ ବାସ୍ତବରେ ଝିଅଙ୍କୁ ଦୁଷ୍କର୍ମ କରିବାକୁ ଛାଡ଼ି ଦିଆଯାଉଛି  । ସରକାର ଗୃହ କମିଟି ଗଠନ କରି ଏସବୁର ତଦନ୍ତ କରିବାକୁ ଶ୍ରୀ ଦାସ ଦାବି କରିଥିଲେ  । ଆଲୋଚନାରେ କଂଗ୍ରେସ ବିଧାୟିକା ସୋଫିଆ ଫିଦେ୍ର୍ଦାଶ ଅଂଶଗ୍ରହଣ କରି ସରକାରଙ୍କୁ ସମାଲୋଚନା କରିଥିଲେ  । 
ସେହିପରି ବିରୋଧୀ ଦଳ ମୁଖ୍ୟ ସଚେତିକା ପ୍ରମିଳା ମଲ୍ଲିକ କହିଥିଲେଯେ, ମହିଳାମାନେ ଘରୁ ବାହାରିବାକୁ ଡରିଲେଣି  । ଏ ସରକାର ମହିଳା, ଛାତ୍ରଛାତ୍ରୀ ଓ ଦଳିତ ବିରୋଧୀ । ପିହୁକୁ ନେଇ ରାଜନୀତି କରୁଥିଲେ କିନ୍ତୁ ଏବେ କ’ଣ ପଦକ୍ଷେପ ନେଇଛନ୍ତି । ମହିଳା ଓ ଶିଶୁ ନିର୍ଯ୍ୟାତନା ନେଇ ସରକାର ଶ୍ୱେତପତ୍ର ଜାରି କରିବାକୁ କହିଥିଲେବି କରିନାହାନ୍ତି  । ବିଜେପି କର୍ମୀମାନେ ଥାନାକୁ ଲିଜ୍ରେ ନେଇଛନ୍ତି  । କର୍ମୀମାନେ ଅଫିସରଙ୍କୁ ଧମକାଉଛନ୍ତି  । ସେମାନଙ୍କ ଦାଉରୁ ଥାନାକୁ ରକ୍ଷା କରନ୍ତୁ  । ପୁଲିସକୁ ନିରପେକ୍ଷ କାମ କରିବାର ସୁଯୋଗ ଦେବାକୁ ସେ ଦାବି କରିଥିଲେ  । ସେହିପରି ବିଧାୟକ ଗୌତମ ବୁଦ୍ଧ ଦାସ ବି ସରକାରଙ୍କୁ ଟାର୍ଗେଟ୍ କରିଥିଲେ  ।
ଶାସକ ଦଳ ପକ୍ଷରୁ ଟଙ୍କଧର ତ୍ରିପାଠୀ କହିଲେଯେ, ମହିଳା ସୁରକ୍ଷା ପ୍ରସଙ୍ଗରେ ଆଲୋଚନା କରିବାକୁ ବିରୋଧୀଙ୍କ ନୈତିକ ଅଧିକାର ନାହିଁ । ଆଇନଶୃଙ୍ଖଳାକୁ ସେମାନେ ବିଧ୍ୱସ୍ତ କରିଦେଇଥିଲେ  । ପୁଲିସକୁ ମୋଟର ସାଇକେଲ ନଦେଇ ହେଲିକପ୍ଟରରେ ବୁଲୁଥିଲେ  । ସେହିପରି ବିରୋଧୀ ଦଳ କ୍ଷମତାରେ ଥିବାବେଳେ ଓଡ଼ିଶାକୁ ଦୁଷ୍କର୍ମ ହବରେ ପରିଣତ କରିଦେଇଥିଲେ ବୋଲି ବିଧାୟକ ସନାତନ ବିଜୁଳି କହିଥିଲେ  । ଆଲୋଚନାରେ ବିଧାୟକ ଅମର ନାୟକ ଓ ସରୋଜ ପାଢ଼ୀ ପ୍ରମୁଖ ଅଂଶଗ୍ରହଣ କରିଥିଲେ  ।