କାହିଁକି ଏକାଠି ହେଲେ ବିଜେଡ଼ିର ସପ୍ତରଥି

ଭୁବନେଶ୍ୱର : ଆଗରୁ ବିଜେଡ଼ି ନେତାମାନେ ପୂରା ଟାଇଟ୍‌ ଥିଲେ  । ଫୋନ୍‌ କଲ କରିବାକୁ ବି ଡର ଲାଗୁଥିଲା  । କେତେକ ଛେରୁଆ ନେତା ହ୍ୱାଟସଆପ୍‌ କଲ କରିବାକୁ ବି ଡରୁଥିଲେ  । ଦଳରେ ବି ଲାଗିଥିଲା ୧୪୪ ଧାରା  । ଯେଉଁଥିପାଇଁ ଏକାଧିକ ନେତା ଏକାଠି ହେବାକୁ ବି ପଛଘୁଞ୍ଚା ଦେଉଥିଲେ  । କିନ୍ତୁ ଚବିଶ ନିର୍ବାଚନ ପରେ ବିଜେଡ଼ିରେ ଏହି କର୍ଫ୍ୟୁ ଉଠିଯାଇଛି  । ରାଜନୀତିକ ଭବିଷ୍ୟତ ସଜାଡ଼ିବାକୁ ନେତାମାନେ ଏକାଠି ହେବା ଆରମ୍ଭ କଲେଣି  । ବରିଷ୍ଠ ନେତାମାନେ ସିଧାସଳଖ ପାଣ୍ଡିଆନ୍‌ଙ୍କୁ ଟାର୍ଗେଟ୍‌ କରୁଥିବାବେଳେ କନିଷ୍ଠ ନେତାମାନେ ଆଗାମୀ ଦିନ ପାଇଁ ରଣନୀତି କରୁଥିବା ଦେଖିବାକୁ ମିଳୁଛି  ।

ନିକଟରେ ବିଜେଡ଼ିର ସାତ ଯୁବ ନେତା ଏକ ରେଷ୍ଟୁରାଣ୍ଟରେ ଏକାଠି ହୋଇଥିଲେ  । ସାମାଜିକ ଗଣମାଧ୍ୟମରେ ଏହି ଫଟୋ ଭାଇରାଲ୍‌ ହେଉଥିବାବେଳେ ତାହାକୁ ନେଇ ରୋଚକ ଚର୍ଚ୍ଚା ବି ହେଉଛି  । ସମସ୍ତଙ୍କ ମଧ୍ୟରେ ସାମଞ୍ଜସ୍ୟ ଓ ସମାନତା ବି ରହିଛି  । ୨୦୨୪ ନିର୍ବାଚନରେ ସାତ ନେତାଙ୍କ ନିଶ୍ଚିତ ବିଜୟ ଆଶା ଧୂଳିସାତ୍‌ ହୋଇଯାଇଥିବାବେଳେ ସେମାନଙ୍କ ବାପା ମଧ୍ୟ ଏକୁଆରକେ ବଳି ନେତା ଥିଲେ  । ଅର୍ଥାତ୍‌ ବାପାଙ୍କ ଲିଗାସୀକୁ ସେମାନେ ଆଗକୁ ନେଉଥିବାବେଳେ ଚବିଶରେ କିନ୍ତୁ ଝୁଣ୍ଟିପଡ଼ିଛନ୍ତି  । ଏହି ୭ ନେତା ମଧ୍ୟରେ ଅଛନ୍ତି କାଳନ୍ଦୀ ବେହେରାଙ୍କ ପୁଅ ଚନ୍ଦ୍ରସାରଥି ବେହେରା  । ସାଲେପୁର ଓ କଟକ ସଦରରୁ ବହୁବାର  ବିଧାୟକ ହୋଇଥିବାବେଳେ ନବୀନ ସରକାରରେ ମନ୍ତ୍ରୀ ବି ଥିଲେ  । ଏଥର କିନ୍ତୁ ସେ ଚିଟପତାଙ୍ଗ ଦେଇଛନ୍ତି  ।

ପିପିଲିର ଟାଣୁଆ ନେତା ଦିବଂଗତ ପ୍ରଦୀପ ମହାରଥିଙ୍କ ପୁଅ ହେଉଛନ୍ତି ରୁଦ୍ର ପ୍ରତାପ ମହାରଥି  । ଉପନିର୍ବାଚନରେ ସିନା ଜିତିଥିଲେ  । ହେଲେ ଏଥର ପିପିଲିବାସୀ ଆଶ୍ରିତଙ୍କ ଉପରେ ଆଶୀର୍ବାଦ ଅଜାଡ଼ି ଦେଇଛନ୍ତି  । ସେହିପରି ବିଷ୍ଣୁବ୍ରତ ରାଉତରାୟ ହେଉଛନ୍ତି ନୀଳମଣି ରାଉତରାୟଙ୍କ ନାତି ଓ ବିଜୟଶ୍ରୀ ରାଉତରାୟଙ୍କ ପୁଅ  । ଚାରି ଦଶନ୍ଧିରୁ ଉଦ୍ଧ୍ୱର୍ ଦିନ ଧରି ତାଙ୍କ ପରିବାର ହାତରେ ବାସୁଦେବପୁର ନିର୍ବାଚନମଣ୍ଡଳୀ ରହିଥିଲା  । କିନ୍ତୁ ଏଥର ସେଠାରେ କଂଗ୍ରେସ ବାଜିମାତ୍‌ କରିଛି  । ଦାମୋଦର ରାଉତଙ୍କ ପୁଅ ହେଉଛନ୍ତି ସମ୍ବିତ ରାଉତରାୟ  । ୨୦୧୯ରେ ବାପା ବିଜେପିରୁ ଲଢ଼ିଥିଲେବି ସେ ବିଜେଡ଼ି ଟିକେଟରେ ପ୍ରଥମ ଥର ବିଧାୟକ ହୋଇଥିଲେ  । ପାରାଦୀପ ଥିଲା ଦାମଙ୍କ ଗଡ଼  । କିନ୍ତୁ ଦାମଙ୍କ ପରଲୋକ ପରେ ସମ୍ବିତଙ୍କ ହାତରୁ ପାରାଦୀପ ଖସିଯାଇଛି  । 

କେନ୍ଦ୍ରାପଡ଼ାର ଅନ୍ୟତମ ଟାଣୁଆ ନେତା ନଳିନୀ ମହାନ୍ତିଙ୍କ ପୁଅ ହେଉଛନ୍ତି ଅଂଶୁମାନ ମହାନ୍ତି  । କଂଗ୍ରେସରୁ ଥରେ ବିଧାୟକ ମଧ୍ୟ ହୋଇଛନ୍ତି  । ଚବିଶରେ ସେ ବିଜେଡ଼ି ଟିକେଟରେ ବୈଜୟନ୍ତ ପଣ୍ଡାଙ୍କୁ ଟକ୍କର ଦେଇଥିଲେ  । ତେବେ ତାଙ୍କର ସବୁ ଅଙ୍କ ଭୁଲ୍‌ ହୋଇଯାଇଥିଲା  । ଏକଦା ଧର୍ମଶାଳା ଥିଲା କଳ୍ପତରୁ ଦାସଙ୍କ ଗଡ଼  । କଳ୍ପତରୁଙ୍କ ପୁଅ ପ୍ରଣବ ବଳବନ୍ତରାୟ ବାପାଙ୍କ ଲିଗାସୀକୁ ଆଗକୁ ନେଇଥିଲେ  । ପ୍ରଣବ ପ୍ରକାଶ ଦାସଙ୍କ ସହ ରହି ବିଜେଡ଼ିରେ ଢେର ପତିଆରା ବି ଜାହିର କରିଥିଲେ  । କିନ୍ତୁ ଏଥର ତାଙ୍କୁ ସ୍ୱାଧୀନ ପ୍ରାର୍ଥୀ ମାଟି ଚଟାଇ ଦେଇଛନ୍ତି  । ପଶ୍ଚିମ ଓଡ଼ିଶାର ଟାଣୁଆ ନେତା ଥିଲେ ଆନନ୍ଦ ଆଚାର୍ଯ୍ୟ  । ଏବେବି ପ୍ରସନ୍ନ ଆଚାର୍ଯ୍ୟ ନିଜର ଦବଦବା ଜାହିର କରିଛନ୍ତି  । ଆନନ୍ଦଙ୍କ ପୁଅ ଦେବେଶଙ୍କ ଏଥର କିନ୍ତୁ ପରାଜୟର ସାମ୍ନା କରିବାକୁ ପଡ଼ିଛି  ।

ବାପାଙ୍କ ପରେ ପୁଅମାନେ ରାଜନୀତିରେ ଆଗକୁ ବଢ଼ିବାକୁ ଯୋଜନା କରିଥିଲେବି ଚବିଶ ସବୁ ଫସର ଫଟାଇଦେଇଛି  । ବିଜେଡ଼ିରେ କନ୍ଦଳ ବଢ଼ି ଚାଲିଥିବାରୁ ଆଗକୁ ରାଜନୀତିକ ଭବିଷ୍ୟତ କ’ଣ ହେବ ସେହି ଚିନ୍ତା ଘାରିଛି  । ତେବେ ଏହି ନେତାମାନଙ୍କ ସାକ୍ଷାତ ସୌଜନ୍ୟମୂଳକ ଥିଲେବି ରାଜନୀତିକ ଦୃଷ୍ଟିରୁ ଗୁରୁତ୍ୱବହନ କରେ ବୋଲି ରାଜନୀତିକ ସମୀକ୍ଷକମାନେ ମତପୋଷଣ କରନ୍ତି  ।