ବନ୍ଧା ହେଲେ ଏମଭିଆଇ
MVI Vigilance
Ramachandi Prasad
ଭୁବନେଶ୍ୱର : ଜଣଙ୍କ ପରେ ଜଣେ ବଡ଼ ଅଫିସର ଭିଜିଲାନ୍ସ ଜାଲରେ ପଡୁଛନ୍ତି । ଗତକାଲି କେନ୍ଦୁଝର ଜେଲ ଅଧିକ୍ଷକ ଧରା ହୋଇଥିବାବେଳେ ଆଜି ନୂଆପଡ଼ା ଏମଭିଆଇଙ୍କୁ ଧରିଛି ଭିଜିଲାନ୍ସ । ତାଙ୍କ ପାଖରୁ ନଗଦ ୧ ଲକ୍ଷ ୩୨ ହଜାର ଜବତ କରାଯାଇଛି । ପିସି ଆକାରରେ ସେ ଏସବୁ ଟଙ୍କା ନେଉଥିବା ଭିଜିଲାନ୍ସ ସନ୍ଦେହ କରୁଛି ।
ମିଳିଥିବା ସୂଚନା ଅନୁଯାୟୀ, ନୂଆପଡ଼ାର ଏମଭିଆଇ ବିଜୟ କୁମାର ବେହୁରିଆ ଗତ କିଛିଦିନ ଧରି ଭିଜିଲାନ୍ସ ସ୍କାନରରେ ରହିଥିଲେ । ଆଜି ବିଶ୍ୱସ୍ତ ସୂତ୍ରରୁ ଖବର ପାଇଁ ଭିଜିଲାନ୍ସ ତାଙ୍କ ଗାଡ଼ିକୁ ପିଛା କରିଥିଲା । ଖୋର୍ଦ୍ଧା ହସପିଟାଲ ଛକରେ ସେ ଯାଉଥିବାବେଳେ ଗାଡ଼ି ( ଓଡ଼ି ୩୩ ଏସି ୨୦୩୦)କୁ ଅଟକାଇ ଭିଜିଲାନ୍ସ ଟିମ୍ ଛାନଭିନ କରିଥିଲେ । ତାଙ୍କ ପାଖରେ ୧ ଲକ୍ଷ ୩୨ ହଜାର ଟଙ୍କା ଥିବା ଦେଖିବାକୁ ମିଳିଥିଲା । ତେବେ ଏହି ଟଙ୍କା କେଉଁଠୁ ଆଣିଲେ ସେନେଇ ସେ କୌଣସି ସନ୍ତୋଷଜନକ ଉତ୍ତର ଦେଇପାରିନଥିଲେ । ବିଭିନ୍ନ ସୂତ୍ରରୁ ପିସି ଆକାରରେ ସେ ଏହା ନେଇଥିବା ଭିଜିଲାନ୍ସ ସନ୍ଦେହ କରୁଛି । ଟଙ୍କା ଜବତ କରିବା ସହ ଭିଜିଲାନ୍ସ ତାଙ୍କୁ ଅଟକ ରଖିଛି । ବେହୁରିଆଙ୍କର ସମ୍ପତ୍ତି ଥିବା ୫ଟି ସ୍ଥାନରେ ଭିଜିଲାନ୍ସ ଚଢ଼ାଉ କରୁଛି ।
