ରାଗିଗଲେ ନବୀନ, ଏବେ ଆକ୍ସନ

ଭୁବନେଶ୍ୱର : ବିଜେଡ଼ିରେ ଏବେ ଗୋଷ୍ଠୀକନ୍ଦଳ ଜୋର୍‌ ଧରିଛି  । ଯାହା ବିଜେଡ଼ି ସୁପ୍ରିମୋ ନବୀନ ପଟ୍ଟନାୟକଙ୍କୁ ଚିନ୍ତାରେ ପକାଇ ଦେଇଛି  । ବିଶେଷକରି ରାଜଧାନୀ ଛାତିରେ ବିଜେଡ଼ି କନ୍ଦଳକୁ ନବୀନ ସହଜରେ ଗ୍ରହଣ କରିପାରିନାହାନ୍ତି  । ଏବେ ନବୀନ ଆକ୍ସନ ମୁଡ଼କୁ ଆସି ଯାଇଛନ୍ତି  । ଦଳରେ ଗୋଷ୍ଠୀ କନ୍ଦଳ ଓ ଗଣମାଧ୍ୟମରେ କଥା କଟାକଟି ଅଧିକ ଦେଖିବାକୁ ମିଳୁଛି  । ଫଳରେ ବାହାରକୁ ଏକ ଖରାପ ବାର୍ତ୍ତା ଯାଉଛି  । ବେଳ ଥାଉଥାଉ ବନ୍ଧ ବାନ୍ଧିବା ନ୍ୟାୟରେ ନବୀନ ଏବେ ପୁରୁଣା ଫର୍ମକୁ ଫେରିଛନ୍ତି  । ନବୀନ ଆକ୍ସନ ମୁଡ଼କୁ ଆସିବାର ନଜିର ଦେଖିବାକୁ ମିଳିଛି  ।

୨୦୨୪ ନିର୍ବାଚନ ବେଳଠାରୁ ଭୁବନେଶ୍ୱର ବିଜେଡ଼ିରେ ସବୁ କିଛି ଠିକ୍‌ ଚାଲୁନାହିଁ  । ଗୋଟିଏ ପଟେ ଅମରେଶ ଜେନା ବନାମ ଅନନ୍ତ ଜେନାଙ୍କ ମଧ୍ୟରେ ବିବାଦ ଚାଲିଛି  । ସେପଟେ ଅଶୋକ ପଣ୍ଡା ବନାମ ବିରଞ୍ଚି ମହାସୁପକାରଙ୍କ ମଧ୍ୟରେ ବି କଳି ଜୋରଧରିଛି  । ବିଜେଡିର ବୈଠକରେ ହେଉ ଅବା ବାହାରେ ଉଭୟ ମୁହାଁମୁହିଁ ହେଉଛନ୍ତି  । ନିକଟରେ ଶଙ୍ଖ ଭବନରେ ଉଭୟ ଗୋଷ୍ଠୀ ମୁହାଁମୁହିଁ ହୋଇଥିଲେ  । ରାଜେଶ ପାତ୍ରଙ୍କୁ ନେଇ ଶଙ୍ଖ ଭବନରେ ତୁମୁଳ କାଣ୍ଡ ହୋଇଥିଲା  । ବିଧାୟକ ଅନନ୍ତ ଜେନା ଓ ଅଶୋକ ପଣ୍ଡାଙ୍କ ସହ ଥିବା କର୍ପୋରେଟରମାନେ ସିଧାସଳଖ ଅମରେଶ ଓ ବିରଞ୍ଚିକୁ ବିରୋଧ କରିଥିଲେ  । ଏହାକୁ ନେଇ ଗଣମାଧ୍ୟମରେ ବି ଉଭୟ ପକ୍ଷ ମତାମତ ରଖିଥିଲେ  । ସେହିପରି ଅନନ୍ତ ଓ ଅଶୋକ ମଧ୍ୟ ଘଟଣାକୁ ଗୁରୁତର ସହ ନେଇଥିଲେ  । ଉଭୟ ଅମରେଶ ଓ ବିରଞ୍ଚିଙ୍କୁ ଦଳରୁ ନିଲମ୍ବିତ କରିବା ପାଇଁ ସେମାନେ ଦାବି କରିଥିଲେ  । 

ନବୀନ ଏହାକୁ ଗୁରୁତର ସହ ଗ୍ରହଣ କରିବା ପରେ ୪ ନେତାଙ୍କୁ ନୋଟିସ୍‌ ଦିଆଯାଇଛି  । ଜିଲ୍ଲା ସଭାପତି ସୁଶାନ୍ତ ରାଉତ ୪ ନେତାଙ୍କୁ ନୋଟିସ୍‌ ଦେଇଛନ୍ତି  । ୪୫ ନମ୍ବର ୱାଡର଼୍ର କର୍ପୋରେଟର ଅମରେଶ ଜେନା, ୫୯ ନମ୍ବର ୱାଡର଼୍ର କର୍ପୋରେଟର ବିରଞ୍ଚି ମହାସୁପକାର, ଯୁବ ବିଜେଡ଼ି ନେତା ରାଜେଶ ପାତ୍ର ଓ ଛାତ୍ର ବିଜେଡ଼ି ନେତା ବିବେକ ସ୍ୱାଇଁଙ୍କୁ ନୋଟିସ୍‌ ଦିଆଯାଇଛି  । ୧୫ ଦିନ ଭିତରେ ସେମାନେ କାରଣ ଦର୍ଶାଅ ନୋଟିସର ଉତ୍ତର ରଖିବାକୁ କୁହାଯାଇଛି  । ଯଦି ସେମାନଙ୍କ ଉତ୍ତର ସନ୍ତୋଷଜନକ ନହୁଏ ତେବେ ଏହି ୪ ନେତାଙ୍କୁ ଦଳରୁ ନିଲମ୍ବିତ କରାଯିବାର ସମ୍ଭାବନା ରହିଛି  । ସେପଟେ ଅଶୋକ ଓ ବୁନୁଙ୍କ ଗୋଷ୍ଠୀ ନବୀନଙ୍କ ଆକ୍ସନକୁ ନେଇ ଉତ୍ସାହିତ ହୋଇପଡ଼ିଥିବା ଜାଣିବାକୁ ମିଳିଛି  । ନବୀନଙ୍କ ଏହି ଆକ୍ସନ ଦଳକୁ ମଜବୁତ କରିବ ନା ତାହାକୁ ନେଇ ଝଡ଼ ସୃଷ୍ଟିହେବ ତାହା ଦେଖିବାକୁ ବାକି ରହିଲା  ।